जिसस दाङमा गठबन्धनको एकल उम्मेदवारी- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

जिसस दाङमा गठबन्धनको एकल उम्मेदवारी

दुर्गालाल केसी

दाङ — जिल्ला समन्वय समितिमा सत्ता गठबन्धनको एकल उम्मेदवारी परेको छ । जेठ २९ गते हुने निर्वाचनका लागि बुधबार कांग्रेस र माओवादी केन्द्रका उम्मेदवारहरुले मात्रै मनोनयन दर्ता गरेका छन् । एमालेलगायतका अन्य दलले मनोनयन दर्ता गरेनन् ।

गठबन्धनबाट प्रमुख र उपप्रमुखसहित ६ सदस्य कांग्रेसले पाएको छ भने माओवादी केन्द्रले २ सदस्यमात्र पाएको छ । प्रमुखमा कांग्रेसका नित्यानन्द शर्माको उम्मेदवारी परेको छ । शर्मा राप्ती गाउँपालिका ७ बाट सदस्यमा निर्वाचित भएका थिए । उपप्रमुखमा कांग्रेसकै चेतना चौधरीले उम्मेदवारी दिएकी छन् । उनी बबई गाउँपालिका ७ बाट सदस्यमा निर्वाचित भएकी थिइन् ।

कांग्रेसबाट खुला सदस्यमा कुलबहादुर बुढा, महिला सदस्यमा हरिदेवी पोखरेल, कल्पना शेर्पाइली, जुनकुमारी बुढा र कल्पना शेर्पाइली तथा दलित महिला सदस्यमा सरस्वती नेपालीले उम्मेदवारी दिएका छन् ।

खुला सदस्य बुढा लमही नगरपालिका ७ बाट सदस्यमा निर्वाचित भएका हुन् । महिला सदस्य पोखरेल घोराही उपमहानगरपालिका ९ बाट, शेर्पाइली घोराही १३ बाट, बुढा घोराही १४ बाट र दलित महिला सदस्य नेपाली तुलसीपुर उपमहानगरपालिका १४ बाट सदस्यमा निर्वाचित भएका हुन् ।

माओवादी केन्द्रका तर्फबाट खुला सदस्यमा टोपाराम चौधरी र दुर्पति चौधरीले उम्मेदवारी दर्ता गराएका छन् । टोपाराम दंगिशरण गाउँपालिका वडा नं. ३ बाट सदस्यमा निर्वाचित भएका हुन् । दुर्पति राप्ती गाउँपालिका वडा नं. ३ बाट सदस्यमा निर्वाचित भएकी हुन् ।

जिल्लाका १० स्थानीय तहमध्ये कांग्रेसले १ नगरपालिका र ४ गाउँपालिकामा प्रमुख, उपप्रमुख र दुई गाउँपालिकामा उपाध्यक्ष जितेको छ । माओवादी केन्द्रले तीन गाउँपालिकामा अध्यक्ष जितेको छ । एमालेले २ उपमहानगरपालिकामा प्रमुख र उपप्रमुखका साथै १ गाउँपालिकामा उपाध्यक्ष जितेको छ ।

प्रकाशित : जेष्ठ २५, २०७९ २०:४४
प्रतिक्रिया
पठाउनुहोस्

फाप्ला अन्तर्राष्ट्रिय मैदान पूर्वाधार निर्माण समिति

मन्त्रिपरिषद्ले मनोनीत गर्‍यो अध्यक्षमा शाही
कान्तिपुर संवाददाता

काठमाडौँ — सरकारले धनगढीस्थित फाप्ला अन्तर्राष्ट्रिय क्रिकेट मैदान तथा खेलग्राम पूर्वाधार निर्माण विकास समितिको अध्यक्षमा अभियन्ता सुवास शाहीलाई मनोनीत गरेको छ । सोमबार बसेको मन्त्रिपरिषद् बैठकले युवा तथा खेलकुद मन्त्रालयको सिफारिसमा उक्त निर्णय गरेको हो ।

शाही फाप्ला क्रिकेट रंगशाला निर्माण अभियानका अभियन्ता हुन् । सरकारले वैशाख २६ मा ‘फाप्ला अन्तर्राष्ट्रिय क्रिकेट मैदान तथा खेलग्राम पूर्वाधार निर्माण विकास समिति आदेश २०७९’ राजपत्रमा प्रकाशित गरेको थियो । उक्त आदेशबमोजिम मन्त्रिपरिषद्ले समितिलाई पूर्णता दिएको हो ।

विकास समिति आदेशमा रंगशाला तथा खेलमैदान निर्माणमा मुख्य कार्यकारी भूमिका रहने समिति ९ सदस्यीय हुने व्यवस्था गरिएको छ ।

धनगढी मुख्य चौराहादेखि ५ किलोमिटर उत्तरपश्चिममा अवस्थित फाप्ला क्षेत्रको साढे ३८ बिघा क्षेत्रफलमा सरकारले फाप्ला अन्तर्राष्ट्रिय क्रिकेट मैदान र खेलग्राम निर्माण गर्ने टुंगो लागिसकेको छ । फाप्लाको पहिचानदेखि जग्गा प्राप्तिसम्म अनवरत रूपमा खटिएका शाही नेतृत्वको विकास समितिलाई उक्त क्षेत्रमा क्रिकेट रंगशालासहित विभिन्न खेलका पूर्वाधार निर्माणको जिम्मेवारी हुनेछ ।

शाहीको नेतृत्वमा सन् २०१५ देखि नै फाप्लामा अन्तर्राष्ट्रिय क्रिकेट रंगशाला निर्माण अभियान थालिएको थियो। गौचरणका रूपमा रहेको फाप्लालाई शाहीले स्तरोन्नति गर्दै सुरुमा स्थानीय लिगहरू सञ्चालन गरेका थिए । नेपालको पहिलो पहिलो फ्रेन्चाइज लिग क्रिकेटका रूपमा धनगढी प्रिमियर लिग (डीपीएल) को आयोजना शाहीले फाप्लामै गराएपछि यसले चर्चा पाएको थियो ।

कांग्रेस सभापति शेरबहादुर देउवा प्रधानमन्त्री नियुक्त भएपछि भने फाप्ला मैदान तथा खेलग्राम पूर्वाधार निर्माण विकास समितिको कार्यले गति लिएको हो ।

अध्यक्ष शाहीले सुदूरपश्मिमको ड्रिम प्रोजेक्ट रहेको फाप्लाको निर्माण कार्य अघि बढाउने जिम्मेवारी दिएर आफूलाई विश्वास गरेकामा नेपाल सरकारप्रति आभार व्यक्त गरे । उनले विकास समितिको गठनसँगै अब रंगशाला निर्माणको कामले गति लिने र निर्धारित समयमै रंगशाला निर्माणमा प्रतिबद्ध रहने बताए ।

गठन आदेशअनुसार पहिलो बैठक बसेको मितिले तीन वर्षसम्म समितिको कार्यकाल रहने व्यवस्था गरिएको छ । यदि पूर्वाधार निर्माणको कार्य तोकिएको समयमा सम्पन्न नभएमा समितिको सिफारिसमा नेपाल सरकारले एक–एक वर्ष गरी दुई पटकसम्म पदावधि थप गर्न सक्ने आदेशमा उल्लेख छ ।

शाहीको अध्यक्षतामा बन्ने ९ सदस्यीय समिति सदस्यमा धनगढी उपमहानगरपालिका र कृष्णपुर नगरपालिकाका नगर प्रमुख पदेन सदस्य रहनेछन् । त्यसबाहेक सुदूरपश्चिम प्रदेश सरकारको खेलकुद हेर्ने मन्त्रालयका सचिव, कैलालीका प्रमुख जिल्ला अधिकारी, सहरी विकास तथा भवन निर्माण विभाग, संघीय आयोजना कार्यान्वयन ईकाई कैलालीका प्रमुख, उद्योग वाणिज्य संघ कैलालीका अध्यक्ष, खेलकुद क्षेत्रमा योगदान पुर्‍याएका महिलामध्येबाट सरकारले मनोनयन गर्ने एक सदस्य हुनेछन् । शाहीसँगै महिला सदस्यमा सरकारले कल्पना दियाकोटीलाई मनोनयन गरेको छ ।

प्रकाशित : जेष्ठ २५, २०७९ २०:२५
पूरा पढ्नुहोस्
प्रतिक्रिया
पठाउनुहोस्
×