स्थानीय सरकार संचालनबारे लुम्बिनीमा गाउँपालिकाका जनप्रतिनिधिसँग छलफल- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

स्थानीय सरकार संचालनबारे लुम्बिनीमा गाउँपालिकाका जनप्रतिनिधिसँग छलफल

घनश्याम गौतम

रूपन्देही — स्थानीय सरकारमा निर्वाचित नयाँ नेतृत्वका लागि आगामी कार्यदिशा र प्राथमिकताका विषयमा छलफल सुरु भएको छ । गाउँपालिका राष्ट्रिय महासंघले लुम्बिनी प्रदेशका निर्वाचित अध्यक्ष र उपाध्यक्षलाई स्थानीय सरकार संचालनका विषयमा आइतबार बुटवलमा अन्तरक्रिया एवं छलफल गरेको हो ।

छलफलमा स्थानीय सरकारबाट अहिलेसम्म भएका उपलब्धि र आगामी प्राथमिकताका विषय, संघीय खानेपानी मन्त्रालय र प्रदेश पर्यटन, ग्रामीण तथा सहरी विकास मन्त्रालयले स्थानीय तहमा खानेपानी तथा सरसफाई क्षेत्रका नीति, कानुन र कार्यक्रममा सम्बन्धमा छलफल भएको थियो ।

छलफलमा सहभागी स्थानीय तहका नयाँ जनप्रतिनिधिले त्यस्ता कार्यक्रमलाई निरन्तरता दिनेमा प्रतिबद्धता जनाएका थिए । कार्यक्रममा गाउँपालिका राष्ट्रिय महासंघका केन्द्रीय महासचिव बंशलााल तामाङ, महासंघका केन्द्रीय सदस्यहरु, लुम्बिनी प्रदेशका ७३ वटै गाउँपालिकाका नवनिर्वाचित अध्यक्ष तथा उपाध्यक्षको सहभागिता रहेको गाउँपालिका महासंघ लुम्बिनी प्रदेश अध्यक्ष मधुकृष्ण पन्तले बताए ।

कार्यक्रममा स्थानीय सरकारले गर्नु पर्ने काम र अधिकारका विषय उल्लेख भएको पात्रो एवं त्यसको मोबाइल एप पनि सार्वजनिक गरिएको थियो । स्थानीय शासन प्रक्रिया सबलीकरणका लागि गाउँपालिका राष्ट्रिय महासंघले अहिलेसम्म खेलेको भूमिका र आगामी कार्यदिशा तथा स्थानीय सरकारको उपलब्धि र आगामी प्राथमिकताका विषयमा छुट्टाछुट्टै कार्यपत्र पनि प्रस्तुत गरिएको गाउँपालिका महासंघको केन्द्रीय कार्यालय प्रमुख राजेन्द्रप्रसाद प्याकुरेलले बताए ।


प्रकाशित : जेष्ठ २२, २०७९ १७:१०
प्रतिक्रिया
पठाउनुहोस्

निर्वाचनमा गठबन्धनको घेरा तोड्यौं : भट्टराई

आनन्द गौतम

ताप्लेजुङ — नेकपा एमालेका सचिव एवं संघीय सांसद योगेश भट्टराईले स्थानीय तह निर्वाचनमा गठबन्धनको घेरा तोड्न सफल भए पनि अलिकति घाइते हुनुपरेको बताएका छन् । गृह जिल्ला ताप्लेजुङमा आइतबार निर्वाचित जनप्रतिनिधिलाई बधाई एवं शुभकामना कार्यक्रमलाई सम्बोधन गर्दै उनले एउटा सिपाही सामान्य घाइते हुँदा उसको युद्ध नसकिने र अझ रणनीतिक कौशलताका साथ अगाडि बढ्नुपर्ने बताए । 

जनपक्षीय उम्मेदवारलाई जिताउन २०४३ को निर्वाचनदेखि प्रजातन्त्र प्राप्तिपछिका हरेक निर्वाचनलाई मूल्यांकन गर्दा यो पटक पार्टीमा सबैभन्दा बढी अन्तर्घात भएको आफूले पाएको पनि उनले दाबी गरे ।

पार्टीमा बसेर अन्तर्घात गर्नु गैरजिम्मेवार कार्य भएको भन्दै उनले यसको पृष्ठभूमिदेखि नै गएर समीक्षा गर्नुपर्ने पनि बताए । भने, ‘मैले ४३ सालदेखिको निर्वाचन नजिकबाट देखे भोगेको छु । नेकपा एमालेभित्र पहिलो पटक अन्तर्घात भन्छन् हो त्यस्तो यत्ति ठूलो देखिएको छ, यसको गम्भीर समीक्षा गर्नुपर्छ ।’ उम्मेदवार छनौटदेखि नै कमजोरी भयो कि, किन भयो भनेर समीक्षा गर्नुपर्ने उनले बताए ।

माओवादी केन्द्र र नेकपा एकीकृत समाजवादीप्रति लक्षित गर्दै भट्टराईले एमाले दुई/चार सिट जितेर च्याँखे थाप्ने पार्टी नभएको दाबी गर्दै कार्यकर्तालाई इखालु भएर लाग्न निर्देशन दिए । ‘इख नभएको मान्छे र बिख नभएको सर्प काम दिँदैन भन्छन्,’ भट्टराईले थपे, ‘हामीसँग प्रतिरोधी क्षमता हुनुपर्छ र अलिकति इखालु बन्नु पर्छ ।’

दोस्रो आवधिक निर्वाचनबाट निर्वाचित जनप्रतिनिधिलाई अब सिक्दैछौं भन्ने छुट नभएकाले काम गरेर देखाउन आग्रह गरे । उनले उपभोत्ता समिति सबैभन्दा धेरै विवादमा परेका र त्यसमा जनप्रतिनिधि जोडिएकाले ठेक्का प्रक्रियामा जान पनि जनप्रतिनिधलाई निर्देशन दिए । हरेक जनप्रतिनिधिले तीन दिनसम्ममा स्थानीय सरकार सञ्चालन ऐन पढ्न उनले आग्रह गरे । ‘हाम्रो कानुनी मुलुक हो, तपाईंले म यसो, उसो गर्छु भनेर मात्रै हुँदैन,’ भट्टराईले थपे, ‘कानुन अनुसारको काम गर्नुपर्ने भएकाले तपाईंले अनिवार्य अध्ययन गर्नु पर्छ ।’

प्रत्येक जनप्रतिनिधि वा पार्टीका पराजित उम्मेदवारलाई दुई हप्तामा एक पटक त्यो सम्भव नभए महिनामा एक पटक जनताका घरदैलोमा अनिवार्य पुग्न पनि निर्देशन दिए । कहिल्यै संगठन र प्रशिक्षण नगर्ने काग्रेस संगठन र प्रशिक्षणमा लागेकाले तर सिकाउने एमाले कार्यकर्ताले त्यसलाई गति दिन नसकेको उनको गुनासो थियो ।

प्रकाशित : जेष्ठ २२, २०७९ १६:५४
पूरा पढ्नुहोस्
प्रतिक्रिया
पठाउनुहोस्
×