तोकेको भाडादर नपाएको भन्दै जेठ २० देखि ट्रक थन्क्याउने व्यवसायीको घोषणा- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

तोकेको भाडादर नपाएको भन्दै जेठ २० देखि ट्रक थन्क्याउने व्यवसायीको घोषणा

सन्जु पौडेल

तिलोत्तमा — सरकारले समायोजन गरी तोकेको भाडादर नपाएको भन्दै लुम्बिनी प्रदेशका ट्रक व्यवसायीहरू आन्दोलित भएका छन् । उनीहरूले सरकारले तोकेको भाडादर व्यवहारमा पाउनुपर्ने भन्दै यही जेठ २० गतेदेखि ट्रक‚ घर र ग्यारेजमा थन्क्याई ढुवानी कार्य रोक्ने निर्णय गरेका हुन् ।

पश्चिमाञ्चल यातायात व्यवसायी समिति बुटवलको अगुवाइमा लुम्बिनी प्रदेशका अन्य ट्रक समितिले सहकार्य गर्दै समायोजित भाडादर कार्यान्वयनका लागि शनिबार एक कार्यक्रम गरी आन्दोलनका कार्यक्रम सार्वजनिक गरेका हुन् ।

एकातर्फ भारतीय ओभरलोडका गाडीहरूका कारण नेपाली यातयात व्यवसायी मारमा परेका छन् भने अर्कोतर्फ उचित भाडादर असुल नहुँदा पेशा नै संकटमा परेको गुनासो व्यवसायीको छ । आन्दोलनका कार्यक्रमसँगै व्यवसायी संस्थाले लोडिङ कार्डलाई व्यवस्थित र पारदर्शी बनाउने, विभिन्न ट्रक समितिहरूको प्रतिनिधित्वमा अनुगमन गर्ने र सरकारले तोकेको भाडा प्राप्तिका लागि ट्रान्सपोर्ट व्यवसायीसँग पनि सहकार्य गर्ने निर्णय गरी अघि बढेको पश्चिमाञ्चल यातायात व्यवसायी समितिका अध्यक्ष यमप्रसाद पाण्डेले बताए ।

उनले ट्रक व्यवसायीको पेशा रेड जोनमा पुगेकाले बाध्य भएर व्यावसायीलाई बचाउनका लागि आन्दोलनमा जानु परेको बताए ।

राप्ती ट्रक व्यवसायी समितिका प्रशासनिक सचिव उमेश मजगैयाले भाडादर कार्यान्वयन नहुँदा ट्रक व्यवसाय धराशायी हुने अवस्थामा पुगेको जनाए । उनले ढुवानी व्यवसायीहरूले सहयोग गरेमा सरकारले तय गरेको भाडा असुलीमा सहयोग हुने धारणा राखे ।

प्रकाशित : जेष्ठ १४, २०७९ १७:१६
प्रतिक्रिया
पठाउनुहोस्

हरिजनको मृत्युबारे छानबिन गर्न ५ सदस्यीय समिति गठन

कान्तिपुर संवाददाता

काठमाडौँ — गृह मन्त्रालयले रोल्पा कारागारमा झुन्डिएर आत्महत्या गरिएको भनिएका बन्दी सुन्दर हरिजनको मृत्युबारे छानबिन गर्न ५ सदस्यीय समिति गठन गरेको छ ।

कारागार विभागका निर्देशक झरेन्द्रप्रसाद चापगाईंको संयोजक्तवमा समिति गठन गरेको हो । समितिलाई घट्ना सम्बन्धमा स्थलगत रूपमा समेत अध्ययन अनुसन्‍धान गरी १० दिनभित्र प्रतिवेदन पेस गर्न भनिएको छ ।


गृह मन्त्रालयले समितिको प्रतिवेदन प्राप्त भएपछि घटनाबारे सत्यतथ्य उजागर हुने जनाएको छ । मन्त्रालयका प्रवक्ता फणीन्द्रमणि पोखरेलले भविष्यमा यस्ता घटना हुन नदिन सुधारका उपाय अवलम्बन गरिने पनि बताए ।

शनिबार कान्तिपुरले एउटा व्यक्तिले गरेको कसुरमा हरिजनलाई कारागार चलान गरिएको सम्बन्धी विस्तृत समाचार प्रकाशित गरेको थियो ।

यो पनि पढ्नुहोस् :

अपराधीको सट्टा जेलमा राखिएका दलित किशोरको ज्यान गयो

प्रकाशित : जेष्ठ १४, २०७९ १७:१४
पूरा पढ्नुहोस्
प्रतिक्रिया
पठाउनुहोस्
×