जो गाविस अध्यक्ष जितेको २५ वर्षपछि वडाध्यक्ष भए- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

जो गाविस अध्यक्ष जितेको २५ वर्षपछि वडाध्यक्ष भए

मनोज पौडेल

कपिलवस्तु — उनी हक्की स्वभावका छन्; जे देख्यो त्यही बोल्छन्; स्वभावले कडा छन्; कुरा चपाएर बोल्दैनन्; कसैको अनावश्यक बढाइचढाइ पनि गर्दैनन् तर गाउँसमाजको काम र विकासमा उनी मिजासिला छन्; सधैं अग्रसर हुन्छन्; उत्तिकै सहज र सरस छन्; सबैसँग घुलमिल हुन्छन्; मास कन्ट्रोलिङको क्षमता पनि अब्बल छ । 

उनी सबैको कुरा र तर्क सुन्छन्; गाउँटोलमा कसैलाई कुनै समस्या पर्दा पनि अग्रसर हुन्छन् । उनी हुन् कपिलवस्तु नगरपालिका ९ जलरैयाका ६६ वर्षीय दीपकबहादुर गुरुङ ।

गाउँसमाजको असल सहयोगी बनेका कारण नै उनी चुनाव लडेदेखि पराजय बेहोर्नुपरेको छैन । पञ्चायतकालदेखि गणतन्त्रसम्म उनले मुख्य पदमै चुनाव जितेका छन् । गतवैशाख ३० गतेसम्पन्न स्थानीय तह निर्वाचनमा उनी कपिलवस्तु नगरपालिका ९ को अध्यक्षमा विजयी भए । उनी एक हजार ४५ मत ल्याएर एमालेबाट वडाध्यक्ष निर्वाचित भए ।

उनका निकटतम प्रतिद्वन्द्वी जसपाका चन्द्रराम यादवले ७ सय ५५ मत ल्याएका थिए । त्यसअघि बहुदलीय व्यवस्थामा ०५४ मा उनी साविक निग्लिहवा गाविस अध्यक्षमा विजयी भए । स्वतन्त्र रुपमा उम्मेदवारी दिएका उनलाई नेकपा एमालेले आफ्नो तर्फबाट कुनै उम्मेदवारी नदिएर समर्थन गर्‍यो । त्यसपछि उनी एमाले प्रवेश गरे । त्यसअघि पञ्चायतकालमा पनि उनी तेनुवा माझरे फेदराट गाउँ पञ्चायतबाट प्रधानपञ्चमा चुनाव जिते । २०४३ सालमा सबैभन्दा कम ३० वर्षको उमेरमा चुनाव जित्ने उनै थिए । साविकको निग्लिहवा गाविस अहिले कपिलवस्तु नगरपालिकाको वडा बनेको छ ।

‘भर्खरको उम्दा युवा थिएँ,’ उनले भने, ‘काम गर्ने जोसजाँगर भरिएको थियो ।’ निर्वाचित हुनासाथ सबैभन्दा पहिले गाउँपञ्चायतको नाम परिवर्तन गरे । गाउँभरि बुद्धकालीन पुरातत्त्व र सांस्कृतिक सम्पदा थियो । पहिचान जोगाउन र संरक्षण हुन्छ भन्दै तेनुवा माझरे फेदराट गाउँपञ्चायतको नाम परिवर्तन गरेर निग्लिहवा राखे । अहिले सबैले निग्लिहवा भनेर चिन्छन् । निग्लिहवामा भारतीय सम्राट अशोकले बनाएको अशोक स्तम्भ पनि छ । नेपालमा मात्र नभई संसारले निग्लिहवा चिन्न थालेका छन् । मैले गरेको धेरै काममा यो एउटा गर्भ गर्नलायक काम भएको उनी बताउँछन् ।

उनी माओवादी द्वन्द्व सुरु भएपछि विस्थापित भए । २०५८ जेठ १९ गते घर छाडेर ललितपुर गएर बस्न थाले । ललितपुरमा बसाइँ सरेको झन्डै २० वर्षपछि पुनः गाउँमा आएर बस्न थाले । स्थानीय निर्वाचन आयो । एमालेले उनलाई टिकट दियो; विजयी पनि भए ।

वडाध्यक्षको पदभार ग्रहणपछि बसेको पहिलो वडाको बैठकबाट उनले मुलुकमा सबैभन्दा धेरै पानी चरा आश्रय दिने जगदीशपुर ताललाई ‘बर्ड सेन्चुरी’ बनाउने निर्णय गरेका छन् । यसका लागि सरोकारवालासँग छलफल गरी प्रक्रिया अगाडि बढाइने उनले बताएका छन् ।

प्रकाशित : जेष्ठ १४, २०७९ १६:५२
प्रतिक्रिया
पठाउनुहोस्

बाँकेको मदरसामा चक्कु प्रहारबाट घाइते विद्यार्थीको मृत्यु 

रुपा गहतराज

नेपालगन्ज — बाँकेको नेपालगन्जस्थित फूलटेक्रामा रहेको मदरसा फैजाने मदिनामा अध्ययनरत दुई विद्यार्थीबीच चक्कु हानाहान हुँदा एक जनाको ज्यान गएको छ । 

जिल्ला प्रहरी कार्यालय बाँकेका प्रवक्ता तथा प्रहरी नायव उपरीक्षक मधुसूदन न्यौपानेका आफ्नै साथीले चक्कु रोपिँदा घाइते भएका मदरसामा अध्ययनरत कास्की रुपाकोट–६ का १६ वर्षीय जामुदिन मियाँको उपचारको क्रममा भारतमा मृत्यु भएको हो ।

बिहीबार साँझ ५ बजे मृतक मियाँ र सिराह मिर्चैयाका १२ वर्षीय मो. आशिक आपसमा खेल्दै गर्दा आशिकले समातेको चक्कु मियाको देब्रे छातीमा रोपिँदा मुटुमा चोट लागेको थियो । घाइते अवस्थामा उपचारका लागि भारतको लखनउ पुर्‍याइएका मियाँको उपचारका क्रममा मृत्यु भएको प्रहरीले जनाएको छ । ‘उपचारको क्रममा रहेका मियाँको शुक्रबार राति १० बजे नै मृत्यु भएको रहेछ,’ प्रहरी नायव उपरीक्षक न्यौपानेले भने,‘प्रहरीलाई शनिबार बिहानमात्र यसको जानकारी आएको हो ।’

प्रहरीका अनुसार मदरसाले उपलब्ध गराएको सीसीटीभी फुटेजमा दुवैले छातीले एक अर्कालाई धकेलाधकेल गर्दै गर्दा मियाँलाई आशिकले देब्रे छातीमा चक्कु प्रहार गरेको देखिएको छ । घटनाबारे प्रहरीले अनुसन्धान जारी राखेको जनाएको छ । मदरसाको तर्फबाट पनि घटनाबारेमा जानकारी गराइएको छैन ।

घटनामा संलग्न रहेका बालक प्रहरी नियन्त्रणमा रहेका छन् । प्रहरीका अनुसार पोस्टमार्टम गरेर शव आफन्तको जिम्मा लगाइएको छ । आफन्तबाट किटानी जाहेरी लिएर प्रहरी अनुसन्धान अघि बढाइने प्रहरी नायव उपरीक्षक न्यौपानेले जनाए ।

प्रकाशित : जेष्ठ १४, २०७९ १६:४९
पूरा पढ्नुहोस्
प्रतिक्रिया
पठाउनुहोस्
×