रोल्पाका ७२ मध्ये २ वडामा महिला अध्यक्ष 

पश्चिम रोल्पाको त्रिवेणी गाउँपालिका ३ बुढागाउँ लिङदुङकी तिला वली डाँगीले पुरुष उम्मेदवारलाई पराजित गर्दै जित हासिल गरेकी हुन् । तिलाले ४ सय ७० मत पाएर विजयी बनिन् भने उनका प्रतिद्वन्द्वी कांग्रेसका बालाराम डाँगीले २ सय ६८ मत ल्याए । अघिल्लो पटक ८१ मतान्तरले पराजित भएकी उनले पुनः टिकट पाएपछि यो पटक भने जित हासिल गर्न सफल भइन् ।

‘संयोग पनि अचम्मको मिल्यो’, तिला भन्छिन्, ‘मेरो प्रतिद्वन्द्वी नाताले जेठाजु पर्ने उम्मेदवार हुनुभयो । म माओवादी केन्द्रबाट र जेठाजु कांग्रेसबाट उम्मेदवार थियौं । फरक पार्टीबाट उही पदमा जेठाजु-बुहारी निर्वाचनको मैदानमा होमियौं ।’ वडाध्यक्ष बन्न शिक्षण पेशाबाट राजीनामा दिएर उम्मेदवार भएका जेठाजु बालारामलाई उनले २ सय २ मतान्तरले पराजित गरिन् ।

करिब १२ वर्षसम्म शिक्षक बनेकी तिला र बालारामले एउटै विद्यालयमा पढाएका थिए । विद्यार्थी राजनीतिबाट माओवादीमा आबद्ध भएकी उनका पति पनि शिक्षक हुन् । विजयी भएपछि टिकट दिने पार्टी र मतदान गर्ने जनतालाई उनले धन्यवाद दिएकी छन् । महिलाका समस्यालाई नजिकबाट बुझ्दै समाधान गर्दै जाने उनको धारणा छ । उनी माओवादी केन्द्र गाउँ कमिटीकी कोषाध्यक्ष समेत हुन् ।

वडाध्यक्षमा निर्वाचित हुने अर्की महिला हुन्‚ तुलसी पुन मगर । माओवादी केन्द्रका तर्फबाट उनी रुन्टीगढी गाउँपालिका ८ झेनामकी वडाध्यक्ष बनिन् । उनी पनि पुरुष उम्मेदवारलाई पराजित गर्दै वडाध्यक्षमा निर्वाचित भएकी हुन् । तुलसीले ३ सय ९३ मत पाइन् भने उनका प्रतिद्वन्द्वी कांग्रेसका खिम रोकामगरले ३ सय १७ मत ल्याए । उनले महिला, जनजाति र पछि पारिएकाहरूको पक्षमा काम गर्ने बताइन् । ‘महिलाले पनि केही गर्न सक्छन् भन्ने ठानेर मप्रति विश्वास गर्ने जनतालाई धन्यवाद दिन चाहन्छु‚’ उनले भनिन् ।

यस्तै सबै वडामध्ये एउटामा मात्रै दलित वडाध्यक्ष निर्वाचित भएका छन् । रोल्पा नगरपालिका ५ मा वडाध्यक्षका रुपमा माओवादी केन्द्रका तर्फबाट उम्मेदवार बनेका टोपबहादुर नेपाली विजयी बनेका हुन् । कांग्रेसका नन्दबहादुर महरालाई पराजित गरेर विजयी भएका हुन् । नेपालीले ४ सय ९५ मत ल्याए भने महराले ४ सय ३ मत ल्याएका थिए । उनी दोस्रोपटक वडाध्यक्ष निर्वाचित भएका हुन् । माओवादी केन्द्रसहित केही साना दलले विभिन्न पदमा दलितलाई उम्मेदवार बनाएका थिए । अनिवार्य उम्मेदवार बाहेक अन्य पदमा दलित निर्वाचित भएनन् ।