बालश्रम रोक्न प्रदेश सरकार गम्भीर : मन्त्री शर्मा- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

बालश्रम रोक्न प्रदेश सरकार गम्भीर : मन्त्री शर्मा

सन्जु पौडेल

तिलोत्तमा — लुम्बिनी प्रदेशका आन्तरिक मामिला तथा सञ्चारमन्त्री तिलकराम शर्माले बालश्रम न्यूनीकरणका लागि प्रदेश सरकार गम्भीर रहेको बताएका छन् ।अहिले पनि विभिन्न क्षेत्रमा बालबालिकालाई श्रमिकको रुपमा काम गरिरहेको बताउँदै त्यसको अन्त्य गर्न प्रदेश सरकारले खेल्नुपर्ने भूमिका र स्रोत व्यवस्थापनका सही कार्यान्वन गर्न मन्त्रालय तत्पर रहेको उनले बताए । 

बेस संस्थाले शुक्रबार बुटवलमा आयोजना गरेको लुम्बिनी प्रदेशस्तरीय बाल श्रमिक तथा बेचविखनको अवस्था अनुसन्धानको निष्कर्ष जानकारी तथा छलफल कार्यक्रममा बोल्दै मन्त्री शर्माले बालबालिकालाई श्रममुक्त बनाउने प्रदेश सरकारले योजनाहरु पनि अगाडि सार्ने बताए ।

इटा उद्योग, होटललगायत क्षेत्रमा धेरै बालश्रमिक काममा रहेको विभिन्न तथ्याङ्कले देखाउँदै आएको छ । कार्यक्रममा प्रदेश सरकारकी कानुन, महिला बालबालिका तथा ज्येष्ठ नागरिकमन्त्री रमा घर्तीले बालश्रम अन्त्य गर्न सरकारले गरेको लगानी खेर जान नदिने बताइन् । संघसंस्थाले गर्ने काममा सरकार हातेमालो गर्न तयार रहेको उनको भनाइ छ । उनले बालश्रममुक्त बनाउने ऐन र कानुन बने पनि कार्यान्वयनको पाटो फितलो रहेको बताइन् ।

त्रिभुवन विश्वविद्यालयका प्राध्यापक केशवप्रसाद अधिकारीले अध्ययनबाट १४ वर्षमुनिका १० प्रतिशत बालबालिका श्रममा रहेको देखिएको बताए । टोलीले प्रदेशका ७ वटा जिल्लामा पुगेको अध्ययन गरेको थियो ।

प्रकाशित : जेष्ठ १३, २०७९ १९:३९
प्रतिक्रिया
पठाउनुहोस्

सरकारी जग्गासमेत बैना गरी ठगी गर्ने दुई पक्राउ

कान्तिपुर संवाददाता

काठमाडौँ — सरकारी जग्गासमेत बैना गरी ठगी गर्ने दुई जनालाई काठमाडौं उपत्यका अपराध अनुसन्धान कार्यालयको टोलीले पक्राउ गरेको छ । पक्राउ पर्नेहरुमा भक्तपुर चाँगुनारायण नगरपालिका ७ बागेश्वरीका ७२ वर्षीय केशव प्रसाद अधिकारी र भक्तपुर नगरपालिका ८ का ५८ वर्षीय ईश्वर गाईजु छन् ।

खोटाङ बुईपा ३ घर भई दिक्तेल रुपाकोट मझुवागढी बस्ने धनिराम राईको जाहेरीका आधारमा उनीहरुलाई पक्राउ गरेको काठमाडौं उपत्यका अपराध अनुसन्धान कार्यालयका प्रवक्ता एसपी कृष्णप्रसाद कोइरालाले बताए ।

अधिकारी र गाईजुले भक्तपुर साविक सुडाल गाविस-४ (क) मा रहेको जग्गा सम्बन्धित जग्गा धनीसँग अनुमती नलिई झुक्याएर बिक्री गर्न करारनामा गरी बैना वापत ५ करोड २० लाख रुपैयाँ लिई ठगी गरेको प्रारम्भिक अनुसन्धानमा खुलेको प्रहरीले जनाएको छ ।

प्रहरीले शुक्रबार भक्तपुर मालपोत कार्यालयबाट उनीहरूलाई पक्राउ गरेको हो । उनीहरुलाई थप अनुसन्धान तथा कारबाहीका लागि जिल्ला प्रहरी परिसर भक्तपुर पठाइएको एसपी कोइरालाले बताए ।

प्रकाशित : जेष्ठ १३, २०७९ १९:३३
पूरा पढ्नुहोस्
प्रतिक्रिया
पठाउनुहोस्
×