जबरजस्ती करणी आरोपितको उपचारका क्रममा मृत्यु- लुम्बिनी - कान्तिपुर समाचार

जबरजस्ती करणी आरोपितको उपचारका क्रममा मृत्यु

रूपा गहतराज

नेपालगन्ज — बाँकेको नरैनापुरमा ६५ वर्षीय महिलालाई जबरजस्ती करणी गरेको आरोपमा प्रहरी नियन्त्रणमा रहेका व्यक्तिको मृत्यु भएको छ । नरैनापुर-५ मटेहियाका ३५ वर्षीय रामपाल यादवको प्रहरी नियन्त्रणमा रहेकै बेला मृत्यु भएको हो । 

बुधबार बिहान प्रहरीको नियन्त्रणमा रहेका यादवको उपचारका क्रममा अस्पतालमा मृत्यु भएको हो ।

‘खोज्दै जाँदा बुधबार राति १ बजे घरबाटै नियन्त्रणमा लिएका थियौं । स्थानीयले पनि कुटेका रैछन‚’ ईलाका प्रहरी कार्यालय भोजपुरका इन्चार्ज प्रहरी निरीक्षक वीरबहादुर सुनारले भने,‘नियन्त्रणमा लिएपछि मेडिकल गर्न लक्षमपुर स्वास्थ केन्द्रमा लगेका थियौं तर जबरजस्ती करणीको घटना भएकाले भेरी अस्पतालमा लगेको बेला अस्पतालले मृत घोषणा गर्‍यो ।’

जिल्ला प्रहरी कार्यालय बाँकेका डीएसपी मधुसुदन न्यौपानेले प्रहरी नियन्त्रणमा रहेका यादवलाई उपचारका लागि अस्पताल पुर्‍याउँदा मृत्यु भएको बताए । उनले घटनाबारे थप अनुसन्धान भइरहेको बताए ।

प्रकाशित : जेष्ठ ५, २०७९ १२:०८
प्रतिक्रिया
पठाउनुहोस्

बाँकेमा दाजुभाइबीचमै प्रतिस्पर्धा : भाइ जिते, दाजु हारे

रूपा गहतराज

नेपालगन्ज — स्थानीय तह निर्वाचनमा बाँकेका दुई स्थानमा दाजुभाइबीचको प्रतिस्पर्धामा भाइले चुनाव जितेका छन् । नेपालगञ्ज उपमहानगरपालिका–१ को वडाध्यक्षमा दाइलाई हराउँदै भाइले जित हात पारेका हुन् । नेकपा एमालेबाट उम्मेदवारी दिएका प्रमोद रिजालले ७ सय ८१ मत प्राप्त गर्दै वडाध्यक्षमा निर्वाचित भए ।

उनका प्रतिद्वन्द्वी नेपाली कांग्रेसका उम्मेदवार विनोद रिजालले ५ सय ८१ मत प्राप्त गरे । विनोद प्रमोदका सहोदर दाजु हुन् । कांग्रेसबाट उम्मेदवारी दिएका विनोदले २०४६ देखि विद्यार्थी राजनीति सुरु गरेका थिए । उनी हाल तरुण दल बाँकेको सचिव छन् ।

भाइ प्रमोद निवर्तमान वडाध्यक्ष हुन् । उनी उपमहानगरपालिकाको प्रवक्ता समेत थिए । ‘वडामा गरेका राम्रा कामहरुको मुल्याकंन गरेर जनताले अनुमोदन गर्नुभयो । थप जिम्मेवारी बोध गरेको छु,’ उनले भने, ‘हामी आ–आफनो पार्टीबाट प्रतिनिधित्व गरेकाले सम्बन्धमा कुनै तिक्तता छैन ।’

त्यस्तै, कोहलपुर नगरपालिकामा पनि दुई सहोदर दाजुभाईबीच प्रतिस्पर्धा थियो । वडा नं ३ मा भाइ माधव रिजाल र दाजु तारकेश्वर रिजालबीचको प्रतिस्पर्धामा भाइ माधव निर्वाचित भएका छन् ।

कोहलपुर नगरपालिका–३ को वडा अध्यक्षमा नेकपा एमाले उम्मेदवार माधवले माओवादीका उम्मेदवार ताराकेशर रिजाललाई ३ सय मतको अन्तरले पराजित गरेका हुन् । रिजालले कुल १ हजार ३ सय ७ मत प्राप्त गरेका थिए ।

माधवले २०७४ सालमा निर्वाचित वडाध्यक्ष हुन् भने दाजु तारकेश्वर त्यतिबेला ६५ मतले पराजित भएका थिए । ‘दुबैले आ–आफनो जितका लागि प्रतिस्पर्धा गरेका हौ,’ भाइ माधवले भने, ‘यो बिल्कुलै राजनीतिक प्रतिस्पर्धा मात्र हो ।’


प्रकाशित : जेष्ठ ४, २०७९ ११:५५
पूरा पढ्नुहोस्
प्रतिक्रिया
पठाउनुहोस्
×