बबईको मूल नहर निर्माण तीव्र
बर्दिया — तीन दशकअघिबाट निर्माण सुरु गरिएको बबई सिंचाइ आयोजनाको काम अघि बढेको छ । समयभित्रै सम्पन्न गर्ने गरी राष्ट्रिय गौरवको बबई सिंचाइ आयोजनाअन्तर्गत पश्चिम मूल नहरको कामले गति लिएको हो । गुलरिया नगरपालिका–१ को खैरापुरसम्म नहर निर्माण सुरु भएको छ । ३४ किलोमिटरको पूर्वी मूल नहर २८ वर्षपछि गत वर्ष सम्पन्न भएको थियो ।
डेढ दशकदेखि सुरु भएको पश्चिम मूलनहरको २८ किमि सम्पन्न भएको छ । बाँकी काम अहिले अघि बढेको हो । आयोजनाको भौतिक प्रगति करिब ५७ प्रतिशत मात्र छ । निर्माण सुरु भएको आयोजना करिब ३३ वर्ष पुगे पनि कामले तीव्रता पाएको थिएन ।
बबई मूल नहरको हेडबक्स परेवा ओडारदेखि पश्चिम मूल नहर गुलरिया रत्नापुरसम्मको लम्बाइ ४२ किमि छ । आर्थिक वर्ष ०८१/०८२ सम्म पश्चिमी मूल नहर सम्पन्न गर्न जग्गाधनीलाई मुआब्जा दिन थालिएको आयोजनाले जनाएको छ । नहर निर्माण हुन थालेपछि सिंचाइ सुविधाको आशामा किसान खुसी भएको गुलरिया नगरपालिकाको मथुराहरिद्वारका किसान दीपक चौधरीले बताए ।
‘नहर आउने भन्दै किसान खुसी छन्,’ उनले भने, ‘वर्षौंदेखि आकाशे पानीको भरमा रहेका किसान नहर बन्ने भएपछि अन्नबाली बढी उत्पादन हुनेमा विश्वस्त बनेका हुन् ।’ प्रथम चरणमा पूर्वतर्फको २१ हजार हेक्टर र पश्चिमतर्फ १५ हजार हेक्टर जमिनमा सिंचाइ पुर्याउने योजनाको लक्ष्य छ ।
