बुटवलको पहिरो व्यवस्थापन गर्न २ करोड ४५ लाख बजेट- लुम्बिनी - कान्तिपुर समाचार

बुटवलको पहिरो व्यवस्थापन गर्न २ करोड ४५ लाख बजेट

अमृता अनमोल

बुटवल — बुटवलमा चुरे क्षेत्रबाट खसेको पहिरो व्यवस्थापन गर्न चुरे तिनाउ संरक्षण समितिले क्षेत्रगत बजेट बाँडफाँट गरेको छ ।

चुरे तिनाउ संरक्षण समितिले चालु आर्थिक वर्षमा पहिरो व्यवस्थापनका लागि दुई करोड ४५ लाख रुपैयाँ बजेट विनियोजन गरेको थियो । उक्त बजेट ज्योतिनगर, लक्ष्मीनगर र पाखापानीकार लागि क्षेत्रगत रुपमा बाँडफाँट गरिएको हो । ज्योतिनगरका लागि एक करोड २५ लाख, लक्ष्मीनगरको लागि एक करोड पाँच लाख र पाखापानीको लागि १५ लाख रुपैयाँ विनियोजन गरिएको छ ।

यस्तै प्रदेशका मुख्यमन्त्री कुलप्रसाद केसीको अध्यक्षतामा बसेको सरोकारवालाको बैठकले यस वर्ष थप ४ करोड बजेट पठाइदिन आग्रह गरेको छ । तिनाउ चुरे संरक्षक समितिका अध्यक्ष कमल गौतमले जोखिमबाट बस्ती बचाउन तत्काल गर्नुपर्ने कामका लागि उक्त रकम मागिएको बताए ।

उनका अनुसार हाल विनियोजित बजेटबाट काम थाल्न उपभोक्ता समिति गठन गर्ने प्रक्रिया अघि बढेको छ । बुटवल उपमहानगरपालिकाले यस वर्ष पहिरो प्रभावित क्षेत्रको माटो सफाइ गर्न र बस्तीभित्रको कलभर्ट निर्माणका लागि ८५ लाख लगानी गरिसकेको छ । हाल १५ लाख रुपैयाँ थप विनियोजन गरी खोल्सी सुधारका लागि काम गरिरहेको छ ।

गतवर्ष वर्षायाममा गएको पहिरोले बुटवल ३ ज्योतिनगर क्षेत्रका एक दर्जन घर बगाएको थियो । करिब २४ घर विस्थापित भएका छन् भने ३ सयभन्दा बढी घर जोखिममा छन् । यस्तै लक्ष्मीनगर र पाखापानी क्षेत्रमा पनि पहिरो खसेर बस्तीमा जोखिम देखिएको छ ।

प्रकाशित : माघ १०, २०७८ १९:४२
प्रतिक्रिया
पठाउनुहोस्

पर्सामा ३ सय नाघे सक्रिय कोरोना संक्रमित

शंकर आचार्य

काठमाडौँ — कोरोनाको तेस्रो लहरमा पर्सामा सक्रिय संक्रमितको संख्या ३ सय नाघेको छ । जिल्ला प्रशासन कार्यालयको तथ्यांकअनुसार सोमबार दिउसो २ बजेसम्म जिल्लामा सक्रिय कोरोना संक्रमितको संख्या ३ सय ८ रहेको छ ।

कार्यालयका प्रशासकीय अधिकृत विनयकुमार श्रीवास्तवका अनुसार सक्रिय संक्रमितको संख्या दैनिक थपिँदैछ । नारायणी अस्पतालको प्रयोगशाला र नेपाल-भारत सीमामा रहेको हेल्थ डेस्कमा दैनिक भइरहेको पीसीआर र एन्टिजेन परीक्षणबाट संक्रमित थपिँदैछन् ।

सक्रिय संक्रमितमध्ये ६ जनामात्र अस्पताल भर्ना भएको श्रीवास्तवले बताए । भर्ना रहेका संक्रमितहरू सबै नारायणी अस्पतालमा उपचाररत रहेको उनले बताए । त्यस बाहेक ३ सय २ सक्रिय संक्रमित होम आइसोलेसनमै रहेको पनि उनले बताए ।

जिल्लामा आइतबार एकै दिन ४३ संक्रमित थपिएका छन् । नारायणी अस्पतालमा आइतबार गरिएको प्रयोगशाला परीक्षणबाट ४३ जनामा कोरोना संक्रमण पुष्टि भएको हो । अस्पतालका कोभिड संयोजक डा उदयनारायण सिंहका अनुसार आइतबार ७६ जनाको स्वाब संकलन गरी पीसीआर परीक्षण गर्दा ४३ जनामा कोरोना संक्रमण पुष्टि भएको हो ।

१५ देखि ८० वर्ष उमेर समूहका संक्रमितमध्ये २४ पुरुष र १९ महिला छन् । कुल संक्रमित पुष्टि भएका मध्ये २७ जना पर्साका स्थायी बासिन्दा हुन् । १२ जना बाराका तथा १/१ जना रौतहट, महोत्तरी, चितवन र काठमाडौं घर भई अस्थायी रुपले पर्सामा बस्दै आएकाहरू हुन् ।

उता नेपाल-भारत सीमास्थित हेल्थ डेस्कमा आइतबार एकै दिन ३६ जनामा कोरोना संक्रमण पुष्टि भएको छ । डेस्ककी प्रमुख डा अनिशा महतोका अनुसार आइतबार कुल ३ सय ८५ जनाको एन्टिजेन परीक्षण गर्दा ३६ जनामा कोरोना संक्रमण पुष्टि भएको हो । तीमध्ये १३ जना भारतीय नागरिक थिए ।

सोमबार दिउँसो २ बजेसम्म १ सय ८४ जनाको एन्टिजेन परीक्षण गर्दा १७ जनामा कोरोना संक्रमण देखिएको छ ।

प्रकाशित : माघ १०, २०७८ १९:४०
पूरा पढ्नुहोस्
प्रतिक्रिया
पठाउनुहोस्
×