गाडीमा डस्टबिनको व्यवस्था गर्न पश्चिम नेपाल बस व्यवसायीको निर्देशन- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

गाडीमा डस्टबिनको व्यवस्था गर्न पश्चिम नेपाल बस व्यवसायीको निर्देशन

सन्जु पौडेल

तिलोत्तमा — पश्चिम नेपाल बस व्यवसायी प्रालिले मातहतका सम्पूर्ण व्यवसायी, चालक, परिचालक, सहयोगी तथा शाखा इञ्चार्जहरूलाई गाडीभित्र अनिवार्य रुपमा डस्टबिनको व्यवस्था गर्न निर्देशन दिएको छ ।

तिलोत्तमा नगरपालिकाको पत्रअनुसार प्रालिले गाडीमा निस्कने फोहोरमैला डस्टबिनमा राखी फोहोरमैला फाल्ने ठाउँमा मात्र फाल्न निर्देशन दिएको हो ।

प्रालिले यात्रुहरूलाई पानीका खाली बोत्तल, कागज, प्लास्टिक वा अन्य फोहोरहरू बाटोमा फाल्न नदिन व्यवसायी, चालक, परिचालक, सहयोगीहरूलाई निर्देशन दिएको छ । निर्देशनको बोधार्थ तिलोत्तमा नगर प्रमुख, उप-प्रमुख, वातावरण शाखा तथा नगरस्तरीय टोल विकास संस्थालाई पठाइएको छ । जथाभावी फोहोरमैला फालेको पाइएमा सम्बन्धित निकायद्वारा फोहोरमैला व्यवस्थापन ऐन तथा कार्यविधिअनुसार कारबाही गरिने प्रालिद्वारा जारी निर्देशन पत्रमा उल्लेख गरिएको छ ।

तिलोत्तमा नगरपालिकाले प्रालि मातहत सञ्चालित बसहरूमा अनिवार्य रुपमा डस्टबिनको व्यवस्था मिलाउन पुस २० गते पत्राचार गरेको थियो । पूर्णसरसफाइ उन्मुख नगरपालिका घोषित तिलोत्तमामा गाडीबाट फालिने फोहोरका कारण सडकमा प्रदुषण बढेको पाइएपछि पश्चिम नेपाल बस व्यवसायीलगायतका यातायात संघसंस्थालाई आवश्यक सहयोगका लागि आग्रह गरिएको थियो ।

तिलोत्तमामा हरेक महिनाको १ र १५ गते नियमित सरसफाइ हुँदै आएको छ भने टोल विकास संस्थाहरूले आ-आफ्नो अनुकूलताका आधारमा शनिबार वा सार्वजनिक बिदाको दिन नियमित सरसफाइ गर्दै आएका छन् ।


प्रकाशित : पुस ३०, २०७८ २०:४७
प्रतिक्रिया
पठाउनुहोस्

लुम्बिनीमा संक्रान्तिको अवसरमा दुई दिन सार्वजनिक बिदा

सन्जु पौडेल

तिलोत्तमा — माघे संक्रान्तिको अवसर पारेर लुम्बिनी प्रदेशले शनिबार र आइतबार सार्वजनिक बिदा दिने भएको छ । माघे संक्रान्ति पारी लुम्बिनी प्रदेश सरकारले दुई दिन सार्वजनिक बिदा दिने निर्णय गरेको हो ।

प्रदेश सरकारको तर्फबाट माघ १ र २ गते प्रदेशभर सार्वजनिक बिदा दिँदै आएकाले त्यसलाई यथावत् राख्दै यस वर्ष पनि सो बिदालाई निरन्तरता दिइएको मुख्यमन्त्री कुलप्रसाद केसीका प्रेस संयोजक मानसिंह विकले जानकारी दिए ।

विगतमा प्रदेश सरकारको तर्फबाट पुस अन्तिम दिन प्रदेश सरकारको तर्फबाट सांस्कृतिक झाँकीसहित माघे संक्रान्ति एवं माघी मिलन कार्यक्रम आयोजना गर्ने गरिएकोमा यस पटक भने कोरोना संक्रमणका कारण सो कार्यक्रम स्थगित भएको छ ।

प्रकाशित : पुस ३०, २०७८ १६:२३
पूरा पढ्नुहोस्
प्रतिक्रिया
पठाउनुहोस्
×