रुपन्देहीमा पूर्वघोषित सबै मेला-महोत्सव स्थगित- लुम्बिनी - कान्तिपुर समाचार

रुपन्देहीमा पूर्वघोषित सबै मेला-महोत्सव स्थगित

सन्जु पौडेल

तिलोत्तमा — रुपन्देहीमा पूर्वघोषित सबै मेला महोत्सव स्थगित हुने भएका छन् । कोरोना संक्रमणको जोखिम पुनः बढेसँगै सरकारले भौतिक रूपमा २५ जनाभन्दा बढी उपस्थित भई हुने सबै प्रकारका सभा, जुलुस, सम्मेलन, प्रदर्शन, भेला, जात्रा, महोत्सव गर्न रोक लगाएपछि सबै तयारी पूरा भएका मेला महोत्सव पनि स्थगित हुने भएका छन् ।

तिलोत्तमामा माघ १४ गतेदेखि व्यापार मेला आयोजना गर्ने तयारी रहेको थियो भने सैनामैना, देवदह र भैरहवा लगायत स्थानमा पनि मेला महोत्सव सञ्चालन गर्न व्यवसायी संघ संस्थाले तयारी गर्दै थिए ।

रुपन्देहीका प्रमुख जिल्ला अधिकारी ऋषिराम तिवारीले सरकारले गरेको निर्णयको सबैले पालना गर्नुपर्ने भन्दै कोरोना संक्रमणको दर बढिरहेका बेला मेला महोत्सव आयोजना गर्दा झन् जोखिम हुने बताए ।

सरकारले भीडभाड हुने कार्यक्रम गर्न रोक लगाएकाले रुपन्देहीमा पूर्वघोषित सबै मेला महोत्सव सञ्चालन गर्नका लागि जिल्ला प्रशासनले रोक लगाउने प्रमुख जिल्ला अधिकारी तिवारीले जानकारी दिए ।

‘सरकारले कोरोना संक्रमणको दर बढिरहेकाले २५ जनाभन्दा बढी उपस्थित भई हुने सबै कार्यक्रममा रोक लगाएको छ ।’ उनले भने, ‘जिल्लामा सबै तयारी पूरा भएका मेला महोत्सव स्थगित हुन्छन् । पछिल्लो समय भारतबाट आउने नेपालीमा कोरोना संक्रमण धेरै देखिएकाले रुपन्देहीका सीमानाकामा परीक्षणको दायरा बढाउने उनले बताए ।

उनले बुधबार जिल्लास्तरीय कोभिड संक्रमण व्यवस्थापन केन्द्र (डीसीएमसी) को बैठक बस्ने र जिल्लामा कोरोना संक्रमणको दर बढ्न नदिन सबै संयन्त्र अवलम्वन गरिने बताए ।

मंगलबार रुपदेहीको बेलहियानाकामा भएको ३ सय २८ वटा एन्टिजेन परीक्षणमा ५६ जना संक्रमित भएका छन् । तीमध्ये २ जना बेलहिया हेल्थ डेस्कका कर्मचारी रहेको डेस्का ल्याब टेक्निसियन लोकनाथ कंडेलले जनाए । जिल्ला स्वास्थ्य कार्यालयका अनुसार मंगलबार भएको १ सय ४९ वटा पीसीआर परीक्षणबाट जिल्लामा ४९ जनामा संक्रमण पुष्टि भएको छ ।

प्रकाशित : पुस २७, २०७८ १८:५५
प्रतिक्रिया
पठाउनुहोस्

अस्ट्रेलियामा कामदारको अभाव

संक्रमित नजिक भएकाले आइसोलेसन बस्नु नपर्ने
नारायण खड्का

अस्ट्रेलिया — कोरोना भाइरसका कारण पर्याप्त कामदार उपलब्ध नहुँदा अस्ट्रेलियामा कामदारको चर्को अभाव देखिएको छ । विशेषगरी महत्वपूर्ण क्षेत्रमा कामदारको अभाव पूरा हुन नदिन सरकारले दुई राज्यमा संक्रमित व्यक्तिको नजिक आएका (क्लोज कन्ट्याक्ट) लाई आइसोलेसन बस्नु नपर्ने नियम लागू गरेको छ ।


अस्ट्रेलियाले कोरोना भाइरसको संक्रमण देखिएसँगै विदेशीका लागि सीमा बन्द गरेको थियो । यहाँको कृषि तथा ग्रामीण क्षेत्रमा मुख्य रुपमा काम गर्ने अस्थायी भिसा वाहक कामदार आउन नपाएपछि जनशक्ति अभाव चर्किएको हो । त्यसका साथै स्थानीय रुपमा यहाँ रहेर काम गर्ने कामदारसमेत भाइरसको संक्रमणमा परेर आइसोलेसनमा बस्नुपरेपछि काम गर्ने कामदारको अभाव भएको हो ।

स्थानीय समाचारसंस्था एबिसीका अनुसार कृषि तथा ग्रामीण क्षेत्र मात्र नभएर कामदार अभाव अस्ट्रेलियाका प्राय: सबै क्षेत्रमा देखिएको छ । मुख्यगरी कृषि क्षेत्रमा देखिएको कामदार अभाव पूर्ति गर्न कृषकहरूले सरकारलाई आग्रह गरिरहेका छन् । तैपनि कामदारको अभाव पूर्ति अझै हुन नसकेको बताइन्छ ।

अस्ट्रेलियन च्याम्बर अफ कमर्सले दुई महिनाअघि सार्वजनिक गरेको एक सूचनामा करिब २ लाख ५० हजार कामदार आवश्यकता जनाइएको थियो । उक्त समयमा सरकारले अन्तर्राष्ट्रिय सीमा खुला गर्ने कुनै निर्णय गरिसकेको भने थिएन । अहिले अस्ट्रेलियाले दुवै खोप लगाएका र उपयुक्त भिसा वाहकलाई प्रवेश दिएको भए पनि कामदार अभाव अझै पूर्ति हुन सकेको छैन ।

पछिल्लो समयमा ओमिक्रोनका कारण संक्रमण दर दैनिक दसौं हजार हुन थालेपछि र ठूलो संख्यामा कामदारसमेत आइसोलेसनमा बस्नुपरेपछि यो समस्या अझ बढी देखिएको हो ।

यस्तै अस्ट्रेलियाका प्राय सबै राज्यले भिसावाहक विदेशीका साथै विद्यार्थीलाई समेत प्रवेशमा केही साता अघिदेखि सहज बनाइदिएका कारण उनीहरूको आगमन बढ्दै गएपछि यहाँ देखिएको कामदार अभावलाई ठूलो राहत हुने विश्वास लिइएको छ ।

यसैबीच न्यू साउथ वेल्स, भिक्टोरिया र क्युन्सल्याण्ड सरकारले कामदारको अभाव हुन नदिन अति आवश्यक ठानिएका स्थानमा काम गर्ने कर्मचारी संक्रमितको नजिक आएको भए पनि उनीहरू संक्रमित नभएसम्म काममा फर्किन पाउने नियम सुरु गर्ने समाचारमा जनाइएको छ । जसले अहिले देखिएको कामदारको समस्या केही हदसम्म समाधान हुने विश्वास लिइएको छ ।

ग्रामीण र कृषि क्षेत्रमा मात्र नभएर अस्ट्रेलियाका दुई ठूला सुपरमार्केट कोल्स र वुलवर्थले समेत आफ्नो वितरण शाखामा कामदार अभाव भएको उल्लेख गरेका छन् । त्यसका साथै अधिकांश पसलमा कामदार आवश्यकता परेको विज्ञापन देख्न सकिन्छ । न्यु साउथ वेल्समा आपतकालीन सेवामा काम गर्ने कर्मचारीका साथै खाद्य तथा खाद्य वितरण, कृषि, यातायात र उत्पादन क्षेत्रमा काम गर्ने कर्मचारीलाई ‘क्लोज कन्ट्याक्ट’ भए पनि केही सर्त पालना गरेर आइसोलेसन बस्नु नपर्ने भएको छ ।

उनीहरूको अनुपस्थितिले अति आवश्यक सेवामा बाधा पर्ने देखिनुपर्ने छ भने दैनिक रुपमा र्‍यापिड एन्टिजेन टेस्ट गर्नुपर्नेछ र मास्कको अनिवार्य प्रयोग गर्नुपर्नेछ । यदी पोजेटिभ वा भाइरसको लक्षण देखिएको खण्डमा भने आइसोलेसनमा बस्नुपर्नेछ । यस्तै क्युन्सल्याण्डले समेत यही नियमलाई लागु गर्ने जनाएको छ । कामदारले काममा अनिवार्य पीपीई लगाउनुपर्ने, भ्याक्सिन लगाएको हुनुपर्ने र निजी सवारीमा काममा आउने र जाने गर्नुपर्नेछ ।

प्रकाशित : पुस २७, २०७८ १८:४८
पूरा पढ्नुहोस्
प्रतिक्रिया
पठाउनुहोस्
×