बुटवलको सडक विस्तार छिटो सक्न माग गर्दै स्थानीय आन्दोलित
बुटवल — विस्तार थालिएको बुटवलको राजमार्ग क्षेत्र छिटो सक्न माग गर्दै स्थानीय आन्दोलित भएका छन् । पूर्वपश्चिम र उत्तरदक्षिण राजमार्गमा पर्ने चौराहादेखि गोलपार्कसम्मको सडक समयमा नसकिँदा धुलोले बसिनसक्नु भएको भन्दै स्थानीय आन्दोलित भएका हुन् ।
चुरे तिनाउ संरक्षण समिति बुटवलका नाममा संगठित पीडितले विस्तार थालिएको सडक भताभुंग छोड्दा दुर्घटना बढेको बताए । धुलोले घरमा बसीनसक्नु भएको सडकमा सवारीका साधन हुत्तिने, उछिट्टने र गुल्टिने भइरहेकाले बाध्य भएर आन्दोलनमा उत्रिएको अध्यक्ष कमल गौतमले बताए ।
विस्तार थालिएको बुटवलको मुख्य सडक चौराहदेखि चिडियाखोलासम्मको सडकको दुरी करिब साढे ३ किलोमिटर छ । चार लेनको सडकलाई ६ लेनको बनाउन भन्दै ०७३ देखि निर्माण प्रक्रियामा लगिएको थियो । बेलहिया बुटवल व्यापारिक मार्ग आयोजनाले ०७३ चैतमा कंचनजंगा बिरुवा जेभीलाई ३० महिनामा सक्नेगरी ठेक्का दिएको थियो । अहिलेसम्म विस्तारको काम जम्मा ५ प्रतिशत सकिएको छ । ५ वर्षअघि विस्तार सुरु भएको सडकको बाँकी काम कहिले सकिने टुंगो छैन ।
यस्तै समितिले ज्योतिनगरको पहिरो नियन्त्रणको समुचित व्यवस्थापन र बस्ती सुरक्षित बनाउनुपर्ने झुम्सा खानेपानी योजना तुरुन्त सम्पन्न गर्नुपर्नेलगायत माग राखी दुई महिने संर्घषका कार्यक्रम सार्वजनिक गरेको छ । जसमा जिल्ला प्रशासन कार्यालय, मुख्यमन्त्रीको कार्यालय र बुटवल उपमहानगरपालिकाको कार्यालय र राजनीतिक दलका कार्यालयमा समस्या समाधानका लागि ध्यानाकर्षण गराउने, धर्ना दिनेलगायत कार्यक्रम तय भएका छन् ।
प्रकाशित : मंसिर २१, २०७८ २२:०९