१६.१२°C काठमाडौं
काठमाडौंमा वायुको गुणस्तर: १५२

नाकामै छैन हेल्थ डेक्स

स्वास्थ्य परीक्षणमा कडाइ गर्न चिकित्सकको सुझाव

बर्दिया — ओमिक्रोन भेरिएन्ट छिमेकी मुलुक भारतमा देखिए पनि त्यससँग सीमा जोडिएको बर्दियाका नाकामा स्वास्थ्य मापदण्ड अपनाइएको छैन । भारतसँग जोडिएको नाकाबाट यात्रुको आवतजावत निरन्तर छ ।

नाकामै छैन हेल्थ डेक्स

पहिलो र दोस्रो लहरको कोरोना संक्रमण फैलिएपछि गुलरियाको नेपाल–भारत सीमास्थित सुरजपुरमा हेल्थ डेक्स राखिएको थियो । तर, अहिले सीमा नाकामा कतै पनि हेल्थ डेक्स छैनन् । सीमामा खुलेआम नेपाली र भारतीय नागरिकको आउजाउ छ । तीव्र गतिमा फैलिइरहेको ओमिक्रोन बिहीबार मात्रै भारतको कर्नाटकमा दुई जनामा पुष्टि भएको थियो ।

गुलरिया–१० का दीपु चौधरीले प्रशासनिक लापरबाहीले यहाँ पनि ओमिक्रोन फैलिने त्रास बढेको बताए । ‘प्रशासनले सबै तयारी गरेको बताए पनि स्वास्थ्य मापदण्ड नै अपनाउन सकेको छैन,’ उनले भने, ‘भारतका विभिन्न प्रान्तमा काम गरेर फर्केका शंकास्पद मानिसको स्वास्थ्य परीक्षण नै गरिंँदैन ।’ केही गैरसरकारी संस्थाले सीमामा हेल्थ डेक्स राख्न लगानी गर्ने बताए पनि प्रशासनिक निकायले खासै चासो नदिएको स्थानीयको गुनासो छ । जिल्लाका गुलरिया, गणेशपुर, रजनवा, जमुनी, कटी, ताराताल, विछिया, भिम्मापुरलगायत खुला सीमाबाट मानिसहरूको आवतजावत बाक्लो छ ।

जिल्ला अस्पताल गुलरियाका मेडिकल सुपरिन्टेन्डेन्ट डा. सुभाष पाण्डेयले सीमामा स्वास्थ्य परीक्षण कडाइका साथ गर्नुपर्ने बताए । ‘लक्षण देखिएका यात्रुको एन्टिजेन परीक्षण गर्नु पर्छ,’ उनले भने, ‘खोप नलगाएकालाई अनिवार्य लगाउन सबैले पहल गर्नु पर्छ ।’

दोस्रो चरणको कोरोना संक्रमणबाट जिल्लामा २ सय १९ जनाको मृत्यु भएको स्वास्थ्य कार्यालयले जनाएको छ । त्यस अवधिमा ७ हजार ५ सय ४० जना कोरोना संक्रमित भएका थिए । हाल कोरोनाका २२ जना सक्रिय संक्रमित छन् । तीमध्ये १७ जना होम आइसोलेसन र ५ जना अस्पतालमा उपचार गराइरहेको स्वास्थ्य प्रमुख गोकर्ण गिरीले बताए । सीमामा कडाइ नभए ओमिक्रोन भेरिएन्ट फैलिने जोखिम हुने उनले जनाए । सीमामा जोखिम बढ्नासाथ खुला नाका बन्द गर्ने तयारी गरिने प्रमुख जिल्ला अधिकारी सन्तबहादुर सुनारले बताए । ‘सीमापारि ओमिक्रोन देख्नासाथ सीमा बन्द गर्नुपर्ने हुन्छ,’ उनले भने, ‘विभिन्न संघसंस्थामार्फत क्वारेन्टाइनका लागि अस्थायी क्याम्प राख्नेबारे छलफल भइरहेको छ ।’

प्रकाशित : मंसिर १९, २०७८ १०:५९
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?