एमालेको अनुरोधपछि लुम्बिनी प्रदेशसभाको बैठक स्थगित - लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

एमालेको अनुरोधपछि लुम्बिनी प्रदेशसभाको बैठक स्थगित 

अमृता अनमोल

बुटवल — सोमबारका लागि आह्वान गरिएमने लुम्बिनी प्रदेशसभाको बैठक स्थगित गरिएको छ । प्रमुख प्रतिपक्षी दल एमालेले आफ्ना वडा र स्थानीय तहको अधिवेशनका कारण बैठकमा सहभागी हुन नसक्ने जनाएपछि सोमबारका बोलाइएको बैठक स्थगित गरिएको हो ।

सभामुख पूर्णबहादुर घर्तीले एमालेको लिखित अनुरोधका आधारमा सोमबार बोलाइएको बैठक स्थगित गरिएको बताए ।

अबको बैठक यही कात्तिक ११ गते बिहीबार बोलाइएको छ । यसअघि पनि एमाले विधान अधिवेशनका कारण असोजमा बैठक स्थगित गरिएको थियो । बैठकमा सहभागिता जनाएपनि सूर्य चिन्हबाट चुनाव लडेका तर हाल सरकारमा सहभागी भएका दुई प्रदेशसभा सदस्यलाई पदमुक्तको माग गर्दै लगातार बैठक अवरुद्ध गर्दै आएको छ ।

नवलपरासी पश्चिमबाट सूर्य चिन्हबाट निर्वाचित स्वतन्त्र प्रदेशसभा सदस्य अजयबहादुर शाही र दाङको उपनिर्वाचनमा नेकपाबाट विजयी भएर नेकपा विघटनपछि माओवादी केन्द्र रोजेकी विमला खत्री ओलीलाई एमालेले कारबाही गरेकाले पदमुक्त गर्न सभामुखलाई दबाब दिँदै आएको छ ।

विरोधको कार्यक्रम अब चल्ने सदनमा पनि जारी रहने एमाले संसदीय दलका प्रमुख भूमिश्वर ढकालले बताए । यसअघि असोज २० गते बसेको प्रदेशसभा बैठकले अघिल्लो सरकारले अध्यादेशमार्फत ल्याएको बजेट प्रतिस्थापन गर्दै नया बजेट पेस गरेको थियो ।

प्रकाशित : कार्तिक ८, २०७८ १३:३६
प्रतिक्रिया
पठाउनुहोस्

आकर्षक बन्यो नर्भिक अस्पतालको 'आइपिडी' 

कान्तिपुर संवाददाता

काठमाडौँ — थापाथलीस्थित नर्भिक अस्पतालले आइपिडी (इन प्यासेन्ट डिपार्टमेन्ट)लाई आकर्षक बनाएको छ । ओपिडीबाट सुरु भएको नर्भिकको स्तरोन्नति गर्ने काम अझै जारी छ । यो क्रममा आइपिडीलाई अझ स्तरीय र आधुनिक बनाइएको हो ।

गत फागुन ९ गतेदेखि नर्भिकले पूर्ण ‘डिजिटलाइज्ड ओपिडी’ संचालनमा ल्याएको थियो । सोही बेला भएको घोषणाअनुसार अन्य युनिटहरुको समेत स्तरोन्नति गर्ने क्रममा आइपिडीलाई विश्वस्तरीय बनाइएको अस्पतालले जनाएको छ ।

आइपिडीका सबै कोठाहरु आधुनिक साजसज्जाले सजाइएको छ । पूर्ण रुपमा विश्वस्तरीय, बिरामीमैत्री र बिरामीका कुरुवा तथा आफन्तलाई समेत सहज हुने हिसाबले पुनर्निर्माण गरी स्तरोन्नति गरिएको नर्भिक अस्पतालका प्रमुख कार्यकारी अधिकृत अजयकुमार मिश्रले जानकारी दिए ।

मिश्रकाअनुसार नर्भिकले आफ्नो सम्पूर्ण सेवालाई पूर्ण रुपमा डिजिटलाइज्ड गरी अत्याधुनिक बनाउने कामको ओपिडीबाट सुरुआत गरेको थियो । त्यसकै निरन्तरताको रुपमा आइपिडी समेत पुनर्निर्माण भएको हो । ‘अस्पताल हाताभित्र पुग्दा दुर्गन्ध आउने, अव्यवस्थित भीडभाडका दृष्य कसैले देख्न नपरोस् भन्ने हाम्रो उद्देश्य हो’ मिश्रले भने ‘यही उद्देश्यले बिरामीको हितलाई सर्वोपरि मान्दै ठूलो लगानी थपेर यो काम गरेका हौं ।’

नर्भिकले अन्य विभाग तथा अस्पताललाई नै यही ढंगले परिवर्तन गरी सेवालाई पूर्ण आधुनिक, समयसापेक्ष र डिजिटलाइज्डको योजना बनाएको छ ।


प्रकाशित : कार्तिक ८, २०७८ १३:२५
पूरा पढ्नुहोस्
प्रतिक्रिया
पठाउनुहोस्
×