राजापुरका बाढी पीडितलाई नभेटी फर्किए प्रधानमन्त्री- लुम्बिनी - कान्तिपुर समाचार

राजापुरका बाढी पीडितलाई नभेटी फर्किए प्रधानमन्त्री

कमल पन्थी

बर्दिया — बर्दियाको राजापुरमा बाढीको क्षतिबारे जानकारी लिन आएका प्रधानमन्त्री शेरबहादुर देउवा यहाँका बाढी पीडितलाई नभेटी काठमाडौंका लागि फर्किएका छन् ।



शुक्रबार बिहान ११ बजे आउने कार्यक्रम रहे पनि उनी दिउँसो करिब २ बजे मात्रै यहाँ आइपुगेका थिए । सुदूरपश्चिम प्रदेशबाट हेलिकप्टरमा आएका प्रधानमन्त्री देउवा राजापुरस्थित अमर सहिद दशरथ चन्द माविको चौरमा बनाइएको हेलीप्याडमा उत्रेर त्यहाँ बनाइएको मञ्चमा केहीबेर बसेपछि फर्किएका हुन् ।

उनले सम्बोधन गर्दै काठमाडौं पुगेर पीडितलाई राहत र क्षतिपुर्ति दिने निर्णय गर्ने भने बताए । उनीसँगै अर्थमन्त्री जनार्दन शर्मा लगायत केही सांसद आएका थिए । प्रधानमन्त्री देउवा बाढीग्रस्त क्षेत्रका बासिन्दालाई नभेटेकोमा लुम्बिनी प्रदेशसभाका सदस्य दीपेश चौधरी लगायत केही स्थानीय नेताहरुले असन्तुष्टि व्यक्त गरेका छन् ।

प्रकाशित : कार्तिक ५, २०७८ २०:३९
प्रतिक्रिया
पठाउनुहोस्

नेकपा (एस) को ७३ जिल्ला कमिटी गठन

कान्तिपुर संवाददाता

काठमाडौँ — नेपाल कम्युनिष्ट पार्टी (एकीकृत समाजवादी) ले ७३ जिल्ला कमिटी गठन गरेको छ । पार्टीका प्रचार विभाग प्रमुख तथा उपमहासचिव जगन्नाथ खतिवडाले शुक्रबार जारी गरेको विज्ञप्तिमा चारवटा गैरभौगोलिक जिल्ला कमिटीसमेत गठन गरिएको छ । पछिल्लो समय  वर्षा, बाढी, पहिरोका कारण कमिटी गठन कार्य स्थगित गरिएको छ ।

अहिले सङ्घीय तथा प्रदेशस्तरका निर्वाचन क्षेत्रीय कमिटी, स्थानीय तहका विभिन्न पालिका, वडा तथा टोल कमिटी गठनको प्रक्रिया जारी छ भने विभिन्न जिल्ला र केन्द्रबीच समन्वय स्थापित गर्ने सम्पर्क मञ्चको गठनका क्रममा छन् । देशबाहिर विभिन्न प्रवास कमिटीसमेत गठन भइरहेका छन् । पार्टी निर्माणका पक्षमा देशभरका हजारौं युवा, विद्यार्थी कार्यकर्ताको स्वःस्फूर्त सहभागिता रहेको विज्ञप्तिमा जनाइएको छ ।

पार्टीको आधिकारिक प्रकाशनतर्फ केन्द्रीय मुखपत्रका रूपमा ‘समाजवाद’ र गतिविधिमूलक प्रकाशन (बुलेटिन) का रूपमा ‘कलम’ को प्रकाशन तयारी भइरहेको छ । त्यसमध्ये ‘कलम’ को प्रकाशन एक साताभित्र सम्पन्न गर्ने गरी काम अगाडि बढेको जनाइएको छ । पार्टीको आधिकारिक वेबसाइट, विभिन्न सामाजिक सञ्जालमा पार्टीको उपस्थितिका निम्ति प्राविधिक कार्य अन्तिम चरणमा पुगेको उल्लेख गरिएको विज्ञप्तिमा पार्टीका पाँच सङ्घीय सांसदले मन्त्रिपरिषद्मा सहभागिता जनाएको भनिएको छ ।

प्रदेश १ र वाग्मती प्रदेश सरकारको आगामी नेतृत्व पार्टीले गर्ने सहमति ५ दलीय गठबन्धनको बैठकले गरिसकेको जनाइएको छ ।

गत भदौ ९ गते निर्वाचन आयोगबाट दर्ता प्रमाणपत्र प्राप्त गरेको पार्टीले केन्द्रीय कमिटीलाई पूर्णता दिने काम सम्पन्न भएको छ । सम्पूर्ण प्रदेश तथा प्रदेशस्तरका कमिटीका इञ्चार्ज, सहइञ्चार्ज, अध्यक्ष, सचिवसहितका पदाधिकारी तोकिएका छन् । केन्द्रीय आयोग र निकायहरु गठन भइसकेका छन् । केन्द्रीय विभागका प्रमुख, उपप्रमुखहरु तोकिएका छन् । ती विभागहरुलाई पूर्णता दिनका निम्ति देशभरबाट विभागको कार्यक्षेत्र, प्रकृति र चरित्रअनुसारका छनोट गर्ने कार्य अन्तिम चरणमा पुगेको छ । सबै जनसंगठन, पेशागत तथा सामुदायिक संगठनहरुको विभिन्न तहका कमिटी गठन, पुनर्गठन तथा रूपान्तरणका काम जारी छन् । पार्टीको सम्पूर्ण जिल्ला कमिटी, जनसंगठनसहित विविध पेशागत तथा सामुदायिक संगठनका इञ्चार्ज तथा सहइञ्चार्ज तोक्ने काम सम्पन्न भएको जनाइएको छ ।

प्रकाशित : कार्तिक ५, २०७८ २०:३७
पूरा पढ्नुहोस्
प्रतिक्रिया
पठाउनुहोस्
×