रानीमहल जाने सडकमा पुन: पहिरो- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

रानीमहल जाने सडकमा पुन: पहिरो

माधव अर्याल

पाल्पा — पर्यटकीयस्थल रानीमहल जाने सडकमा शुक्रबार पुन: पहिरो खसेको छ । पहिरो खसेपछि रानीमहल क्षेत्रमा पुगेका सय बढी पर्यटक अलपत्र परेका छन् । तानसेन–रानीमहल सडक खण्डको बैुकण्ठे भीरमा खसेको पहिरो ठूलो भएकाले पन्छाउन कठिनाई भएको छ ।

पहिरोका कारण रानीमहल घुम्न पुगेका पर्यटक बीच बाटोमै र रानीमहल क्षेत्रमा अलपत्र परेको स्थानीय हात्तीढुंगाका श्रीधर गैरेले जानकारी दिए । माथिल्लो भागबाट समय समयमा ढुंगा झर्ने क्रम नरोकिएकाले समस्या आएको छ ।

चार–पाँच घण्टादेखि पहिरो निरन्तर खसिरहेकाले सडक सञ्चालन गर्न समस्या भएको स्थानीय रिसोर्ट सञ्चालक बसन्त कुँवरले जानकारी दिए । सानो डोजरले काम गर्न नसकेर फर्किएको र ठूलो मेसिनको लागि पहल भइरहेको स्थानीयले जानकारी दिएका छन् । सडक पूर्वाधार विकास कार्यालयका प्रमुख प्रेमनारायण बस्यालले सानो मेसिन पुगेपनि काम गर्न नसक्ने भएपछि पुन: ठूलो मेसिन पठाउन समन्वय भइरहेको जानकारी दिए । एक्सकाभेटर कालोपत्र सडकमा टायर राखेर गुडाउनुपर्ने भएकाले केही समय ढिला हुने उनले बताए ।

तस्बिर : बसन्त कुँवर

रानीमहल घुम्नका लागि देशका विभिन्न स्थानबाट पुगेका सय बढी पर्यटक बीच सडकबाट फर्किन बाध्य भएका छन् । ५० बढी आन्तरिक पर्यटक भने सडक खुल्ने आशमा रानीमहल क्षेत्रमै बसेका छन् ।

ढुंगा खस्न नरोकिएकाले पैदल यात्रा गर्न समेत कठिनाइ भएको सवारी चालक रविन सारुले जानकारी दिए । पहिरोले सवारी साधन रोकिएकाले खान र समयमा गन्तव्यमा पुग्न समस्या यात्रुको गुनासो छ । रानीमहलमा तीन दिनअघि पनि वर्षासँगै पहिरो खसेर सय बढी पर्यटक अलपत्र परेका थिए ।

सडक पूर्वाधार विकास कार्यालयका प्रमुख बस्यालले पाल्पा जिल्लाभरको आकस्मिक मर्मतका लागि आएको १० लाख बजेट रानीमहल क्षेत्रमा खसेको पहिरो पन्छाउँदा सकिने अवस्था आएको बताए ।

प्रकाशित : कार्तिक ५, २०७८ १४:४९
प्रतिक्रिया
पठाउनुहोस्

दाहालको रिफ्रेसमेन्ट : जिपलाइनमा सरर

कान्तिपुर संवाददाता

काठमाडौँ — नेकपा माओवादी केन्द्रका अध्यक्ष पुष्पकमल दाहालले धुलिखेल पुगेर जिपलाइनको अनुभव लिएका छन् ।

पारिवारिक भ्रमणका क्रममा नातिनातिनीसहित धुलिखेल पुगेका उनले क्लासिक जिपलाइनको अनुभव लिएका हुन् । साहासिक गतिविधिमा आफूलाई रुचि लाग्ने बताउँदै दाहालले आफूले जिपलाइनको मज्जा लिएको बताए । पारिवारिक घुमघाममा यस्ता गतिविधि गर्दा अझै रमाइलो भएको उनको भनाइ छ ।

जिपलाइनको टेक अफ (थाक्लेडाँडा, धुलिखेल) देखि ल्यान्डिङ स्टेसन (खावा, पाँचखाल) सम्मको दूरी ११ सय मिटर रहेको छ । भर्टिकल ड्रप दुई सय ४० फिट रहेको जिपलाइन ७० किलोमिटर प्रतिघण्टाको औसत गतिमा पार हुन्छ ।

काठमाडौंबाट करिब ३५ किलोमिटर दूरीमा रहेको जिपलाइन २०७५ फागुनदेखि व्यावसायिक रुपमा सुरु भएको हो । तस्बिरहरू : धुलिखेल जिपलाइन


प्रकाशित : कार्तिक ५, २०७८ १४:२९
पूरा पढ्नुहोस्
प्रतिक्रिया
पठाउनुहोस्
×