कृष्णनगरमा फेरि झाडाका बिरामी थपिँदै- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

कृष्णनगरमा फेरि झाडाका बिरामी थपिँदै

सरकारी अधिकारीले रोग नियन्त्रणमा भएको भने पनि बिरामी तीन गुणा बढे
मनोज पौडेल

कपिलवस्तु — कृष्णनगर नगरपालिकामा फेरि झाडापखालाका बिरामी बढ्न थालेका छन् । प्रकोप फैलिएयता सबैभन्दा कम गत सोमबार १२ जनाको उपचार गरिएको थियो । बिहीबार बहादुरगन्जस्थित शिवराज अस्पतालमा बिरामी ह्वात्तै बढेर ४० पुगेका हुन् । 

मंगलबार २० र बुधबार २७ जना अस्पताल पुगेका थिए । ‘सरकारी अधिकारीले झाडापखाला नियन्त्रणमा आएको भन्छन्,’ एक स्वास्थ्यकर्मीले भने, ‘एकैपटक ३ गुणा बढ्नुले त्यस्तो संकेत गर्दैन । यसलाई हल्का रूपमा लिनुहुन्न, फेरि प्रकोप समस्याका रूपमा बाहिर आउने लक्षण देखिएको छ ।’

१८ दिनमा शिवराज अस्पतालमा मात्रै १ हजार ५ जना उपचारका लागि आएका छन् । त्यसमध्ये ४१ जनालाई रिफर गरिएको थियो । डिस्चार्ज भएर बाँकी रहेका ४० जनाको अस्पतालमै उपचार भइरहेको छ । प्रकोपले दुई बालक, एक बालिका र एक ४५ वर्षीय पुरुषको मृत्यु भएको सरकारी तथ्यांक छ ।

स्थानीयले भने ६ जनाको मृत्यु भएको दाबी गरेका छन् । त्यस्तै निजी क्लिनिकमा पनि ७ सयभन्दा बढीको उपचार भएको स्थानीयले बताए । ‘झाडापखाला नियन्त्रणमा आइसक्यो भनेर बसेका थियौं,’ अस्पतालमा मेसु मुकेश चौधरीले भने, ‘तर, अवस्था सामान्य छैन ।’ फेरि योजना बनाएर समुदायमै सचेतना गर्न आवश्यक देखिएको उनले बताए ।

बिरामी बढ्न थालेपछि बरन्डा, गल्ली र खुला आकाशमुनि राखेर उपचार गर्न थालिएको छ । १५ बेडको अस्पतालमा बेड अभाव भएपछि वैकल्पिक उपाय अपनाएर उपचार गर्न थालिएको हो । अघिल्लो पटक ल्याएर उपयोग गरी फर्काइएको टेन्टको १० बेड फेरि ल्याइएको छ ।

बिरामी बढेपछि औषधिको पनि अभाव हुन थालेको छ । ‘असोज तेस्रो साता प्रदेश र जिल्लाबाट औषधि आउँदा सहज भएको थियो । बिरामीले राम्रो उपचार पाएका थिए । फेरि औषधि अभाव हुन थाल्यो,’ मेसु चौधरीले भने, ‘दुई–चार दिनसम्म पुग्ने

मात्र छ ।’ गत असोज १८ देखि फैलिएको झाडापखालाको प्रकोप दुई सातापछि संक्रामक रोग हैजा भएको पुष्टि भएको थियो । २१ जनाको दिसाको नमुनामध्ये ५५ वर्षीय दुई पुरुष, ७२ वर्षीय एक पुरुष र पाँच वर्षीया बालिकामा हैजाको जीवाणु भेटिएको हो ।

अस्पतालमा एक जनामात्रै डाक्टर हुँदा उनी २४ सै घण्टा खटिनुपरेको छ । अहिले अस्पतालमा नर्सिङ स्टाफ अभाव नभए पनि चिकित्सकको अभाव छ ।

‘रातमा सुत्न पनि पाइँदैन,’ अस्पतालका मेसु चौधरीले भने, ‘इमर्जेन्सी र राउन्डमै रात बित्ने गर्छ ।’ तीन सातायता आरामै गर्न नपाएको उनले बताए । समुदायमा सचेतना छर्दै पानी शुद्ध पार्ने क्लोरिन झोल र ट्याब्लेट वितरण गरिरहेको जिल्ला स्वास्थ्य कार्यालय प्रमुख हेमराज पाण्डेले बताए ।

प्रकाशित : कार्तिक ५, २०७८ ०७:१८
प्रतिक्रिया
पठाउनुहोस्

मुख्यमन्त्री आचार्यले शुक्रबार विश्वासको प्रस्ताव राख्ने

देवनारायण साह

मोरङ — प्रदेश १ का मुख्यमन्त्री मुख्यमन्त्री भीमप्रसाद आचार्यले शुक्रबारको प्रदेशसभा बैठकमा विश्वासको मतका लागि प्रस्ताव राख्ने भएका छन् । सभामुख प्रदीपकुमार भण्डारीले प्रदेशसभाको नवौं तथा हिउँदे अधिवेशनको तेस्रो बैठक शुक्रबार दिउँसो १ बजे बोलाएका छन् । 

मुख्यमन्त्रीले प्रतिनिधित्व गर्ने दल विभाजित भए ३० दिनभित्र विश्वासको मतका लागि प्रदेशसभासमक्ष प्रस्ताव राख्नुपर्ने संवैधानिक व्यवस्था छ । निर्वाचन आयोगले एमालेका १० प्रदेश सांसद एकीकृत समाजवादीमा गएको निर्णय भदौ २५ मै गरेको थियो । उक्त निर्णयअनुसार मुख्यमन्त्री आचार्यले असोज २३ भित्रै विश्वासको प्रस्ताव राख्नुपर्ने थियो । तर मुख्यमन्त्री आचार्यले असोज २५ मा मात्रै विश्वासको मत लिने सूचना प्रदेशसभा सचिवालयका सचिव गोपालप्रसाद पराजुलीलाई दिएका थिए ।

प्रदेशसभा नियमावलीको नियम १२८ (१) मा मुख्यमन्त्रीले प्रदेशसभाबाट विश्वासको मत प्राप्त गर्न ३० दिनभित्र प्रस्ताव पेस गर्ने सूचना सचिवलाई दिनुपर्ने उल्लेख छ । नियम १२८ (२) मा उपनियम (१) बमोजिम दिइने सूचना प्रस्तावमाथि छलफल हुने दिनभन्दा दुई दिनअगावै दिनुपर्ने भनिएको छ ।

सचिव पराजुलीले शुक्रबार बिहान १०ः३० बजे सभामुख भण्डारीले कार्यव्यवस्था परामर्श समितिको बैठक बोलाएको जानकारी दिए । ‘कार्यव्यवस्था परामर्श समितिले निर्धारण गरेको कार्यसूचीअनुसार प्रदेशसभा बैठक अघि बढ्छ,’ उनले भने । प्रदेशसभा बैठकमा अन्य बिजनेस भने छैन ।

एमालेका प्रमुख सचेतक बुद्धिकुमार राजभण्डारीले शुक्रबार मुख्यमन्त्रीले विश्वासको मतका लागि बैठकमा प्रस्ताव राख्ने बताए । प्रमुख प्रतिपक्षी कांग्रेसका नेता राजीव कोइरालाले मुख्यमन्त्री आचार्यले आफैंले निर्माण गरेको संविधानको उल्लंघन गरेर असंवैधानिक रूपमा मुख्यमन्त्री बनिरहनु आपत्तिजनक भएको बताए । उनले मुख्यमन्त्री आचार्यले असंवैधानिक रूपमै सरकारको आयु लम्ब्याउन खोजिरहेको आरोप लगाए । मुख्यमन्त्री आचार्यले सदनमा विश्वासको प्रस्ताव राखेपछि गठबन्धन दलका सबै सांसद मिलेर विफल बनाउने कोइरालाले बताए ।

एकीकृत समाजवादीका नेता राजेन्द्र राईले बाढीपहिरोका नाममा सरकारले अझै केही दिन आयु लम्ब्याउन खोजेको आरोप लगाए । ‘मुख्यमन्त्री आचार्य हिउँदे अधिवेशन सुरु भएकै दिनदेखि स्पष्ट रूपमा सदनमा अल्पमतमा परेको देखिनुभएको छ,’ उनले भने, ‘अब मुख्यमन्त्रीज्यूले विश्वासको मतका लागि प्रस्ताव राखेपछि गठबन्धन दलका सबै सांसद एकजुट भएर औपचारिक रूपमा अल्पमतमा रहेको सिद्ध गर्छौं ।’

मुख्यमन्त्री आचार्यविरुद्ध कांग्रेस, माओवादी केन्द्र, एकीकृत समाजवादी, जनता समाजवादी पार्टी र संघीय लोकतान्त्रिक राष्ट्रिय मञ्चले गठबन्धन बनाएका छन् । मुख्यमन्त्री आचार्यलाई विश्वासको मत प्राप्त गर्न ४६ सांसद आवश्यक हुन्छ । ९२ सदस्यीयमा एमालेका सभामुखसहित ४१, कांग्रेसका २१, माओवादी केन्द्रका १५, एकीकृत समाजवादीका १०, जनता समाजवादी पार्टीका ३, संघीय लोकतान्त्रिक राष्ट्रिय मञ्च र राप्रपाका १/१ जना सांसद छन् ।

प्रकाशित : कार्तिक ५, २०७८ ०७:०८
पूरा पढ्नुहोस्
प्रतिक्रिया
पठाउनुहोस्
×