दसैंमा बढेन व्यापार, सीमा खुलेपछि भारतीय बजारतिरै गए उपभोक्ता - लुम्बिनी - कान्तिपुर समाचार

दसैंमा बढेन व्यापार, सीमा खुलेपछि भारतीय बजारतिरै गए उपभोक्ता 

अमृता अनमोल

बुटवल — दसैमा पनि पश्चिम क्षेत्रको मुख्य बजार बुटवलमा खासै चहलपहल भएन । व्यापारीहरू ग्राहक कुरेर बसेका भेटिए । साविकमा भन्दा केही ग्राहक बढे तर, किनमेल बढेन । यसैले व्यापारको अनुपातमा खासै भएन । ‘सिमा खुल्यो धेरै सामान किन्ने मान्छे सुनौलितिरै गएका छन् । यहाँ त अत्यावश्यक सामाग्री किन्ने मात्रै ग्राहक आएका छन्,’ अमरपथको सपना साडी सेन्टरकी संचालक समिरा ध्वजुले भनिन्, ‘पोहोर साल सिमा बन्द थियो । उता जाने ग्राहक रोकिएका थिए । कोरोनाको त्रास भएपनि दसैंमा अलि व्यापार बढेको थियो ।’ यसपालि गतवर्षजत्तिको पनि व्यापार नभएको उनले गुनासो गरिन् । 

कोरोनाका कारण बन्द नेपाल भारत सिमानाका असोज पहिलो सातादेखि खुलेको छ । दसैंको मुखमा सीमा खुलेपछि सीमावर्ती क्षेत्रका धेरै उपभोक्ता सामान किन्न भारतीय बजार गएका छन् । यसले व्यापार हुने आशमा नयाँ सामाग्री थपेर झकीझकाउ बनाएपनि बुटवलका मुख्य बजार अमरपथ, ट्राफिकचोक, विपीपथ, राममन्दिर लाइनका ठूला ठूला बस्त्रालय, फैन्सी र खाद्यान्न पसलमा ग्राहकको भीड छैन । अघिल्लो दसैंमा धेरै व्यापार गरेका व्यापारी पनि यसपालि निराश छन् । ‘दसैको मुखमा सिमा खोल्दा हाम्रा ग्राहक खोसिए,’ अमरपथको ह्याप्पी गर्ल फैंन्सीकी संचालक मनिषा गौतमले भनिन्,‘कोरोनाले खस्कीएको व्यापार चाडबाडले पनि बढ्न सकेन ।’

धेरै उपभोक्तालाई नेपालमा भन्दा भारतीय बजारमा सामान सस्तो पाइने भ्रम छ । यही भ्रमले बुटवलसहित सीमा क्षेत्रका धेरै उपभोक्ता घरअगाडिको बजार छोडेर भारतीय बजारमा जान्छन् । आउजाउमा महंगो गाडीभाडा तिर्छन् । चाहिने भन्दा धेरै सामान किन्छन् र फजुलमा रकम खर्च गर्छन् । ‘यता छिरेका ग्राहक पनि कोरोनाको संकट, अव्यवस्थित भन्सार, बढ्दो उत्पादन लागत लगायतले स्वदेशी उत्पादन र बजार खस्किइरहेका बेला सीमावर्ती भारतीय बजारमा किनमेल बढेको रुपन्देही व्यापार संघका अध्यक्ष यमलाल लोहनीले बताए । उपभोक्ताको भारतीय बजारप्रतिको बढ्दो लगावले स्वदेशी बजार र उत्पादन संकटमा परेको उनले बताए । ‘सीमाक्षेत्र व्यवस्थित नगर्ने हो भने सीमावर्ती बजार खस्कने मात्रै होइन नामो निशान नहुनेगरी मेटिनेछन् ।’ उनले भने ।

उपभोक्तालाई स्वदेशी बजारभाउबारे जानाकारी नहुँदा पनि धेरै भारतीय बजारमा गएको पाइन्छ । तर, चाडबाडमा किनिने धेरै सामान स्वदेशमै सस्तो छ । बुटवल उद्योग वाणिज्य संघकाअनुसार ऊनी, जिन्स, सुती साडी लगायतका कपडा पनि भारतभन्दा नेपालमा करिब १० देखि २५ प्रतिशत सस्तो छ । अन्तराष्ट्रिय बहुचर्चित कम्पनीका उपभोग्य सामानमा नेपाल लिभर र भारत लिभर भएर निस्कने हर्लिक्स, बुुष्ट, चिया, दुध, ल्याक्टोजिन, तेल, जीरा लगायत प्रतिकिलो ३० देखि ५० रुपैयाँ सस्तो छ । ‘उपभोक्तालाई स्वदेशी बजारभाउबारे जानाकारी नहुँदा पनि धेरै उता गएको पाइन्छ,’ बुटवल उद्योग वाणिज्य संघका अध्यक्ष उज्जवल कसजुले भने, ‘व्यापार बढाउन आफ्ना उपभोक्तालाई आफ्ना सामानबारे सही सुचना दिन र सचेत बनाउन जरुरी छ ।’

व्यवसायीहरूले उपभोक्ताप्रति हार्दिकता नदेखाउनु, पसलहरूमा मूल्यसूचि नहुनु र स्वदेशी उत्पादनको प्रचार नहुनुले पनि उपभोक्ताहरू स्वदेशी बजारको सट्टा भारतीय बजारमा गएका भेटिन्छन् । यस्तोमा स्वदेशी व्यापारी र त्यससंग सम्बन्धित संघसस्थाले आफ्ना पसलमा मूल्यसूची राख्ने र भारतभन्दा स्वदेशमा सस्तो पाइने सामाग्रीको प्रचार गर्नुपर्ने उपभोक्ताहित संरक्षण मन्चका लुम्बिनी प्रदेश अध्यक्ष तेजप्रसाद पाठकले बताए ।

प्रकाशित : आश्विन २७, २०७८ १७:३१
प्रतिक्रिया
पठाउनुहोस्

मोरङको बैंक लुटपाट गर्ने समूह प्रहरीद्वारा सार्वजनिक

जितेन्द्र साह

विराटनगर — मोरङको धनपालथान गाउँपालिका–४, कर्सियाको बीपी चोकस्थित सिटीजन्स बैंकको शाखामा भएको लुटपाटमा संलग्नमध्ये पक्राउ परेका मुख्य योजनाकारसहित ३ जनालाई बुधबार प्रहरीले सार्वजनिक गरेको छ ।

प्रहरीका अनुसार पक्राउ पर्नेमा मुख्य योजनाकार विराटनगर महानगरपालिका–८ का ३२ वर्षीय श्याम मुखिया, भारत अररिया सेखपुरा–५ का २८ वर्षीय सुनील यादव र अररिया गोराहा–४ का ३० वर्षीय विजय सहनी हुन् ।

पक्राउ परेका सुनील यादवले प्रयोग गरेको कटुवा पेस्तोल र एक राउन्ड गोली, घाइते विजय सहनीबाट बरामद १ मोबाइल, घटनास्थलबाट पेस्तोलको एक राउण्ड गोली, १ खोका र घाइते सुरक्षागार्ड ३८ वर्षीय शितल कुमालको शरीरबाट निकालिएको एक गोली पनि प्रहरीले पत्रकार सम्मेलनमा सार्वजनिक गरेको छ ।

सुरुआती अनुसन्धानमा पहिचान भएका घटनामा संलग्न थप ६ जनाको खोजी भइरहेको मोरङ प्रहरी प्रमुख एसपी जनार्दन जीसीले बताए । उनका अनुसार सीसीटीभी फुटेजमा सात लुटेरा बैंकभित्र र अन्य दुई बाहिर देखिन्छन् । लुटेरामध्ये कसले केमा हालेर रकम लिएर गयो र एक पछि अर्को गर्दै कसलाई दियो भन्ने प्रष्ट भइसकेको एसपी जीसीले बताए ।

उनका अनुसार बैंकमा रकम लुटको क्रममा हतारोमा आफैँले बोकेको पेस्तोलबाट गोली चलेर घाइते भएका विजय सहनीलाई लिएर भारततिर भाग्ने क्रममा धनपालथान गाउँपालिका–२, खयरबना चोकबाट तीन जना पक्राउ परेका थिए ।

लुटेराहरुले भाग्ने क्रममा प्रयोग गरेको को २५ प ३८९९ नम्बरको मोटरसाइकलसमेत बरामद भएको जीसीले बताए । एसपी जीसीका अनुसार बैंकबाट लुटेको झन्डै २२ लाख रुपैयाँ लिएर लुटेराहरुमध्येका अर्को समूह फरार छ ।

प्रहरीका अनुसार सोमबार अपराह्न एक्कासी बैंकभित्र प्रवेश गर्ने क्रममा लुटेरा समूहमध्येका दुई जनाले सुरक्षा गार्ड ३८ वर्षीय शीतल कुमालको खुकुरी खोसेपछि पेस्तोल ताकेर उनलाई नियन्त्रणमा लिने प्रयास गरेका थिए । प्रतिकार गर्दा पछाडिबाट अर्को लुटेराले प्रहार गरेको गोली सुरक्षागार्ड कुमालको दुवैतिरको पातामा लागेको प्रहरीले जनाएको छ । प्रहरीका अनुसार तीमध्ये एक गोली छेडेर र अर्को छोएर गएको थियो ।


घटनालगतै उपचारका लागि विराटनगरस्थित न्यूरो अस्पतालमा भर्ना गरिएका कुमालको अवस्था खतरामुक्त रहेको एसपी जीसीले जानकारी दिए । पक्राउमध्ये विजय र पहिचान भएका अधिकांश फरारहरुलाई विभिन्न अपराधमा भारतीय प्रहरीले खोजी गरिरहेको एसपी जीसीले बताए । उनका अनुसार दुवैतिरको प्रहरीले मिलेर उनीहरुको खोजी गरिरहेका छौँ ।

गार्मेन्ट व्यापारमा घाटा लागेपछि निराशामा रहेका मुखियाले भारतीय लुटेराहरुसँग सम्पर्क गरेर घटना हुनु दुई साता अगाडि मात्र लुटको योजना बनाएको उनले बताए । एसपी जीसीका अनुसार घटनामा संलग्नहरुलाई डाका, हातहतियार एवं खरखजाना, ज्यान मार्ने उद्योग एवं संगठित अपराधमा मुद्दा चलाउने तयारी भएको छ ।

२२ असोजमा विराटनगरको मेनरोडस्थित एक गार्मेन्टमा भएको लुटमा पनि उक्त समूहको संलग्नता हुनसक्ने देखिएको प्रहरीले जनाएको छ । मोटरसाइकलमा आएका तीन जनाले उक्त गार्मेन्टको काउन्टरमा रहेको ११ हजार रुपैयाँ नगद र साहु तथा कर्मचारीबाट तीन थान मोबाइल लुटेका थिए ।

थोरै रकम मात्र फेला परेपछि रन्थनीएका लुटेरामध्ये एकले आफूले बोकेको पेस्तोलको पछाडिको भागमा प्रहार गरी गार्मेन्ट सञ्चालकलाई घाइते बनाएका थिए । ‘२२ असोजमा लुटिएको मोबाइल र लुटेराबाट बरामद भएको मोबाइल एवं प्रयोग भएको पेस्तोल बारे बुझ्ने प्रक्रिया जारी छ,’एसपी जीसीले भने ।

प्रकाशित : आश्विन २७, २०७८ १७:२४
पूरा पढ्नुहोस्
प्रतिक्रिया
पठाउनुहोस्
×