आइतबारबाट नेपालगन्ज नाका सञ्चालनमा
नेपालगन्ज — सरकारले नेपाल भारतका प्रमुख नाका खोल्ने निर्णय गरेको दुई सातापछि नेपालगन्ज नाका पूर्णरुपमा सञ्चालनमा आएको छ । भारतकातर्फबाट नेपाल सरकारले गरेको नाका खोल्ने निर्णय कार्यान्वयनपछि आइतबार दिउँसो १ बजेबाट नेपालगन्ज नाका सञ्चालनमा आएको हो ।
सरकारले गरेको निर्णयपछि जिल्ला प्रशासन कार्यालय बाँकेले नेपाल प्रवेश गर्ने भारतीय सवारी साधनहरुको भन्सार पास तयारी गरेको थियो । तर भारतीय पक्षबाट कार्यान्वयन नभएकाले नाका खुल्न सकेको थिएन ।
बाँकेका प्रमुख जिल्ला अधिकारी शिवराम गेलालले सरकारले नाका खोल्ने निर्णय आइतबार दिउँसोबाट कार्यान्वयनमा आएको बताए । उनले नेपालगन्ज नाका पूर्णरुपमा खोलिएको बताए । नाका खुला भएपछि नेपाली सवारी साधनहरु भारत प्रवेश गर्न पाएका छन् । नाकामा भिडभाड बढेको छ ।
कोरोना भाइरसको संक्रमण सुरु भएयता पश्चिम तराईको सबैभन्दा ठूलो नेपालगन्ज नाका बन्द गरिएको थियो । तर नेपाल भारत दुई मुलुकका नागरिकहरुलाई भने पैदल आउजाउ गर्न दिइएको थियो ।
प्रकाशित : आश्विन १७, २०७८ १६:३५