श्रीमती र छोराछोरीको कुटपिटबाट मृत्यु- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

श्रीमती र छोराछोरीको कुटपिटबाट मृत्यु

गगनशिला खड्का

गुल्मी — श्रीमती र छोराछोरीको कुटपिटबाट गुल्मीको रुरु गाउँपालिकामा ४७ वर्षीय एक व्यक्तिको मृत्यु भएको छ । रुरु गाउँपालिका-१ डाँडीपोखरीका ४७ वर्षीय रमेश ज्ञवालीको आफ्नै श्रीमती र छोराछोरीको कुटपिटबाट मृत्यु भएको जिल्ला प्रहरी कार्यालय गुल्मीका डीएसपी पुरुषोत्तम पाण्डेले जानकारी दिए ।

सामान्य विवादमा गत असोज ९ गते परिवारका सदस्यले कुटेर घाइते बनाएका ज्ञवालीको उपचारको क्रममा बुधबार मिसन अस्पताल पाल्पामा मृत्यु भएको प्रहरीले जनाएको छ ।

कुटपिटका कारण ज्ञवाली घाइते भएपछि स्थानीय स्वास्थ्य संस्थामा लगिएको थियो । तर अवस्था गम्भीर बन्दै गएका कारण मंगलबार पाल्पा रिफर गरिएको र अस्पतालमै उनको मृत्यु भएको थियो । घटनाको बारेमा जानकारी पाएपछि जिल्ला प्रहरी कार्यालय पाल्पाबाट प्रहरी निरिक्षक नविन मरासिनीको टोलीले अनुसन्धान गर्दा कुटपिटबाट मृत्यु भएको खुलेको प्रहरीले जनाएको छ ।

परिवारले उपचारकै क्रममा मृत्यु भएको भनेपनि आफन्तले हत्याको आरोप लगाएपछि विवाद भएको थियो । त्यसपछि आफन्तको दबाबमा फरेन्सिक जाँचको लागि ज्ञवालीको शव बुटवल लगिएको थियो।

प्रहरीले कुटपिटमा संलग्न उनकी श्रीमती पुष्पालाई नियन्त्रणमा लिइसकेको छ । बुधबार पाल्पाबाट नियन्त्रणमा लिएर गुल्मी ल्याइएकी उनलाई बिहीबार जिल्ला अदालत गुल्मीबाट म्याद थप गरी थप अनुसन्धानका लागि थुनामा राखिएको डीएसपी पाण्डेले बताए ।

यसैबीच, हराएको १६ दिनपछि गुल्मीको मालिका गाउँपालिकाका एक व्यक्तिको शव फेला परेको छ । भदौ २८ गतेदेखि हराएका मालिका गाउँपालिका– ७ घमिरका ३१ वर्षीय लेखनाथ पन्थीको बिहीबार घर नजिकैको गरेङखोलाको जंगलमा शव भेटिएको डीएसपी पाण्डेले जानकारी दिए ।

प्रकाशित : आश्विन १४, २०७८ २०:११
प्रतिक्रिया
पठाउनुहोस्

चट्याङ लागेर गुल्मीको इश्मामा ९ जना घाइते

गगनशिला खड्का

गुल्मी — चट्याङ लागेर गुल्मीमा ९ जना घाइते भएका छन् । इश्मा गाउँपालिका–३ तोरीपाटामा बुधबार राति परेको चट्याङ लागेर ९ जना घाइते भएको जिल्ला प्रहरी कार्यालय गुल्मीले जनाएको छ ।

चट्याङ लागेर १९ वर्षीया रिता नेपाली, २२ वर्षीया गीता नेपाली, ५० वर्षका झके नेपाली, २४ वर्षीय बालिक नेपाली, २२ वर्षीया सीता नेपाली, ३२ वर्षीया पार्वती नेपाली, २८ वर्षीया लक्ष्मी नेपाली, वर्षकी सीता नेपाली, ३२ वर्षकी पार्वती नेपाली, २९ वर्षीया जाल्पा नेपाली र १९ वर्षीया लक्ष्मी नेपाली घाइते भएको प्रहरीले जनाएको छ ।

घाइतेमध्ये रीतालाई बढी समस्या देखिएको पाल्पा पठाइएको छ । अन्यमध्ये झके नेपाली र गीता नेपालीको गुल्मी अस्पताल र अन्य ६ जनाको स्थानीय स्वास्थ्य चौकीमा उपचार भइरहेको छ । जिल्ला प्रहरी कार्यालय गुल्मीका प्रहरी नायब उपरीक्षक पुरुषोत्तम पाण्डेयले सबैभन्दा पहिले गोठमा बाँधिएको गाईलाई चट्याङ लागेको अनुमान गरिएको बताए ।

प्रकाशित : आश्विन १४, २०७८ १४:५१
पूरा पढ्नुहोस्
प्रतिक्रिया
पठाउनुहोस्
×