गौतम बुद्ध विमानस्थललाई थप लगानी गर्न एडीबी तयार छ : पौडेल    - लुम्बिनी - कान्तिपुर समाचार

गौतम बुद्ध विमानस्थललाई थप लगानी गर्न एडीबी तयार छ : पौडेल    

माधव ढुंगाना

भैरहवा — पूर्वअर्थमन्त्री तथा एमाले नेता विष्णु पौडेलले भैरहवामा निर्माणाधीन गौतम बुद्ध अन्तराष्ट्रिय विमानस्थल आयोजनाको दोस्रो चरणको निर्माण कार्यका लागि लगानी गर्न एसियाली विकास बैंक(एडीबी) तयार रहेको बताएका छन् ।

उद्योग व्यापार संगठन रुपन्देहीको १४औं वार्षिक साधारण सभा तथा सातौं अधिवेशनको शनिबार भैरहवामा उद्घाटन गर्दै नेता पौडेलले दोस्रो चरणको निर्माणका लागि थप ७ अर्ब रुपैयाँ लाग्ने र यसका लागि एडीबीसँग कुराकानी भैसकेको पनि बताए ।

थप लगानी गर्न एडीबी तयार रहे पनि सम्झौता प्रक्रिया अघि बढाउन भने अहिलेको सरकारले नसकेको भन्दै उनले सरकारको आलोचना गरे । ‘यसमा कुनै पनि खालको र कुनै पनि ढंगबाट बिलम्ब गरिनु हँुदैन,’ पौडेलले भने, ‘दोस्रो चरणको काम सुरु गर्नका लागि हामीले पहलकदमी जारी राख्ने छौं ।’उनले पहिलो फेजको निर्माण सम्पन्न भएसँगै दोस्रो फेजका निर्माण कार्यको पनि थालनी गरिने दाबी गरे ।

‘गौतम बुद्ध अन्तर्राष्ट्रिय विमानस्थललाई विश्वकै सुविधासम्पन्न र अत्याधुनिक विमानस्थलहरुमध्येमा समावेश हुन सक्ने गरी निर्माण गर्न चाहन्छौं,’ पौडेलले भने, ‘विश्वको जस्तोसुकै विमान पनि यस विमानस्थलमा उडान र अवतरण सक्ने खालको निर्माण गर्ने छौं ।’

प्रकाशित : आश्विन ९, २०७८ १२:३०
प्रतिक्रिया
पठाउनुहोस्

विकासले नछोएको लेकाली गाउँ

आनन्द गौतम

ताप्लेजुङ — सामान्यतः हिमाली क्षेत्रका बस्ती पातलै हुन्छन् । तर, आपत्विपत्मा सहयोग चाहिन्छ भन्ने उद्देश्यले एकै ठाउँमा झुरुप्प भएर बसेका हुन्छन् । फक्ताङलुङ–७ मा यस्तै एउटा बस्ती छ ‘याङमा’ । 

४२ सय मिटर उचाइमा रहेको याङमा जिल्लाकै सबैभन्दा उच्च र दुर्गमको बस्ती हो । भोटे जातिको मात्रै बसोबास भएको उक्त बस्तीमा १७ घर छन् । बसोबास भने १० परिवारको मात्रै छ । नेपाल–चीन सीमाना टिप्ताला भञ्ज्याङ नजिकैको यो बस्ती राज्यको नजरबाट कैयौं गुणा टाढा रहेको स्थानीय बासिन्दा गुनासो गर्छन् ।

टेलिफोन छैन, स्कुल छैन । सामान्य चोटपटक लागे अहेब र अनमी भेट्न पूरै एक दिन हिँडेर मात्र स्वास्थ्य चौकी पुगिन्छ । चीनले बेला/बेला चामल, नुन, तेल, पिठोलगायत खाद्यवस्तु दिए पनि नेपाल सरकारबाट त्यसो हुन नसकेको गुनासो स्थानीयवासीको छ ।

आलु साट्न चेने झर्दा वर्षमा एक पटक औल क्षेत्रका बासिन्दासँग साक्षात्कार भए पनि यहाँका बासिन्दाले नयाँ मान्छेसमेत देख्न पाउँदैनन् । आधारभूत आवश्यकतामा पर्ने खाद्यान्न, शिक्षा, स्वास्थ्यबाट वञ्चित भएको गुनासो गर्ने फिन्जो शेर्पा चार महिनाअघि याकले हान्दा आफूले उपचार पाउन कठिन भएको सुनाउँछन् ।

याकको सिङले उदिनेर उनको घाँटीमा चोट लाग्यो र गम्भीर घाइते बने । उपचारका लागि बोकेर स्वास्थ्य संस्था लैजान गाउँमा युवा थिएनन् । भएका सबै चौंरी गोठतिर थिए । गोठ पनि झन्डै एक दिनको पैदलमा रहेको टिप्ताला भञ्ज्याङ उक्लिसकेका थिए ।

द्विदेशीय सीमा रक्षक बस्ती भएपनि यहाँका बासिन्दाले स्वास्थ्य, शिक्षा त परैको कुरा सञ्चार सुविधासमेत नपाएको वडाध्यक्ष छेतेन शेर्पा भोटे बताउँछन् । थोरै जनसंख्या भएकैले आफ्नो समस्यालाई सम्बन्धित ठाउँमा पुर्‍याउन नसक्दा राज्यले उपेक्षा गरेको गुनासो जनप्रतिनिधिकै छ ।

‘कमसेकम एउटा टेलिफोन टावर दिनुहोस् भनेर गाउँपालिकाबाट पाँच पटक नेपाल टेलिकममा अनुरोध पत्र पठायौं,’ भोटेले भने, ‘खै अहिलेसम्म वास्ता पनि गरिदिएन ।’ आफू वडाध्यक्ष भए पनि माथिल्लो तहमा पहुँच नभएको बताउने भोटे नेपाल टेलिकमले वर्षमा अर्बौं रुपैयाँ नाफा गरेको सुनिरहँदा र आफूहरूले फोन सम्पर्कबाट समेत वञ्चित हुनुपर्दा दुःख लाग्ने सुनाउँछन् ।

याङमामा आधारभूत विद्यालय भए पनि शिक्षक नियमित नबसेपछि गाउँपालिकाले दरबन्दी कट्टा गरेको छ । बालबालिकालाई आवासीय सुविधासहित नजिकका विद्यालयमा पढाउने भनिए पनि अहिलेसम्म सम्भव भएको छैन । सरकारले स्वास्थ्य चौकी स्थापना गरे पनि अहिलेसम्म स्वास्थ्य कर्मी पठाएको छैन ।

प्रकाशित : आश्विन ९, २०७८ १२:२९
पूरा पढ्नुहोस्
प्रतिक्रिया
पठाउनुहोस्
×