तिनाउमा पौडी खेल्न गएका बालकको डुबेर मृत्यु
रुपन्देही — रुपन्देहीको बुटवल देवीनगरस्थित तिनाउ नदीमा शुक्रबार बिहान एक बालकको शव फेला पऱ्यो । उक्त शव देखेपछि स्थानीयले इलाका प्रहरी कार्यालय बुटवलमा खबर गरेका थिए ।
उक्त शव बुटवल–४, आदर्शनगरका ८ वर्षीय सुजन सारुको रहेको इलाका प्रहरी कार्यालय बुटवलका प्रहरी नायव उपरीक्षक मदन कुँवरले बताए ।
बिहीबार साँझ ४ बजेदेखि परिवारको सम्पर्कमा नरहेका सुजनले ‘पौडी खेल्न खोलामा जान्छु’ भन्दा परिवारले नजान भन्दै रोकेको र परिवारलाई छलेर पौडी खेल्न गएका थिए । हिजो साँझसम्म परिवारको सम्पर्कमा नआएपछि परिवारले बालक हराएको भन्दै इलाका प्रहरीमा जानकारी गराएका थिए ।
शुक्रबार बिहानै बुटवल–११ बुद्धनगरको पुलमुनि तिनाउ नदीमा ढुंगामा अड्किरहेको अवस्थामा सुजनको शव स्थानीयले देखेका हुन् । उनको शव आमाले पहिचान गरेकी थिइन् ।