‘हनी ट्य्राप’ मा धनाढ्य- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

‘हनी ट्य्राप’ मा धनाढ्य

लोभमा पारेर नजिक हुने र बलात्कार अभियोग लगाएर पैसा असुल्ने गरेको आरोपमा तीन पक्राउ 
दुर्गालाल केसी

दाङ — गत असार ६ मा एक कानुन व्यवसायीलाई घोराही–१५ की ३२ वर्षीया एक महिलाले ‘लेनदेन मुद्दामा सहयोग गरिदिनुपर्‍यो’ भनेर फोन गरिन् । पटक–पटक फोन गरेपछि उनी भेट्न बोलाइएको घोराही–१५ को कोहिनुर रेस्टुरेन्ट पुगे ।

उनी र उनका एक साथी महिलाले बियर खाए, कानुन व्यवसायीसँग केहीबेर छलफल गरे । अन्त्यमा निस्कने क्रममा ती महिलाले ‘मलाई किन हातपात गरेको, म अब जबर्जस्ती करणीको मुद्दा हाल्छु’ भन्दै गालीगलौज गर्न थालिन् । लामो वादविवाद चल्यो । अन्ततः उनीहरू अर्को दिन भेटेर कुरा गर्ने सर्तमा घरघर गए ।

भोलिपल्टदेखि घोराही–१५ कै ३५ वर्षीया अर्की महिलाले ती कानुन व्यवसायीलाई फोन गरेर तत्काल कुरा मिलाउन दबाब दिन थालिन् । आरोप लगाउने महिलाका पहुँच भएकी र उनले तत्काल मुद्दा हाल्न सक्ने भएकाले छिटो आएर पैसा दिई मिलाउनुपर्ने कुरा गरिन् । धेरै दिनसम्म फोनमै कुराकानी हुँदै अन्त्यमा छलफलका लागि ती पुरुषलाई असार २८ मा घोराहीकै सागर एन्ड सुनील रेस्टुरेन्ट तथा लजमा बोलाइयो । लजमा रहेका ती दुई सहित घोराही–५ की ३२ वर्षीया अर्की महिलाले पैसाका लागि ‘बार्गेनिङ’ गरे । दिउँसो २ बजे पुगेका ती पुरुष राति ९ बजेसम्म पनि होटलबाट निस्कन पाएनन् ।

५० लाख रुपैयाँ नदिए मुद्दा हाल्ने धम्की दिएर उनलाई निरन्तर तनाव दिइयो । कतिबेला पुलिसको सई, असई, हवल्दारलाई फोन गरेको भन्दै उनलाई तर्साइयो । कतिबेला ‘अब एकछिनमा पुलिस बोलाएर यहींबाट पक्राउ गराउँछौं’ भनियो । अन्त्यमा लामो दबाबपछि १८ लाख रुपैयाँ दिन सहमत गराइयो । ती पुरुषले एक साथीलाई बोलाएर तत्काल १ लाख नगद दिए र १७ लाखको सिभिल बैंकको चेक दिए । भदौ १५ को मितिमा दिइएको चेक भजाउन ती महिला दुईपटक बैंक पुगे तर चेक साटिएन । त्यतिबेलासम्म ती पुरुषले उक्त खाताको पैसा अर्को बैंकको खातामा सारिसकेका थिए । महिलाको षड्यन्त्रबाट पीडित भएका पुरुष सामाजिक प्रतिष्ठा बिग्रने डरले केही समय निकै विक्षिप्त भए । अन्त्यमा प्रहरीको शरणमा पुगे । प्रहरीले लामो अनुसन्धानपछि उनीहरूबीच भएका फोनवार्ता र प्रत्यक्ष वार्ताका अडियो रेकर्ड तथा चेकसहित तीन महिलालाई पक्राउ गर्‍यो ।

यस्ता घटना समाजमा धेरै भएको जानकारी पाएपछि अनुसन्धान भइरहेको जिल्ला प्रहरी प्रमुख एसपी सुरेशप्रसाद काफ्लेले बताए । ‘पीडित पुरुष आत्महत्याको सोचमा समेत पुगेका रहेछन् । अन्त्यमा कानुनी सहारा लिने निधो गरेपछि प्रहरीले अनुसन्धान थाली सबै प्रमाणसहित महिलाहरूलाई पक्रन सफल भयो,’ उनले भने, ‘हनी ट्र्यापमा पारेर रकम असुल्न खोजेको देखिएको छ । पीडितहरू इज्जतको डरले यस्ता घटना बाहिर ल्याउन सक्दैनन् ।’ रकम असुल्न ती महिलाहरूले विभिन्न गुन्डासमेत प्रयोग गरेको उनले बताए । ‘विभिन्न व्यक्तिहरू प्रयोग गरेर रकम असुल्ने प्रयास भएको छ, धम्की दिइएको छ,’ उनले भने, ‘विभिन्न प्रलोभनमा पारेर नजिक हुने र अन्त्यमा बलात्कारको आरोप लगाएर फसाउन खोजेको देखिन्छ । समाजमा यस्ता पीडित अरू पनि हुन सक्छन् ।’ यस घटनाले अन्य घटनालाई निरुत्साहित गर्न सहयोग पुग्ने उनले बताए ।

डरत्रास देखाई रकम असुलेको आरोपमा पक्राउ गरिएका तीन महिलालाई प्रहरीले आइतबार सार्वजनिक गरेको छ । हनी ट्र्यापमा धनाढ्यहरू परिरहेको बजार हल्ला आए पनि यसअघि उजुरी नै नआएको प्रहरीले जनाएको छ । ‘हामीले यस्ता घटना त धेरै सुनेको हो तर अहिलेसम्म कसैले पनि उजुरी गर्न सकेको थिएन । यो नयाँ घटनाका रूपमा आएको छ,’ डीएसपी मुकुन्दप्रसाद रिजालले भने, ‘अब अन्य ठगिएका व्यक्तिहरू पनि सम्पर्कमा आउन सक्छन् ।’ सामाजिक प्रतिष्ठा भएका र राम्रो कमाइ भएका व्यक्तिहरू खोजेर विभिन्न तरिकाले नजिक हुने र अन्त्यमा हनी ट्र्यापमा पारेर फसाउने गरेको रिजालले बताए । ‘सामाजिक इज्जतको डरले सजिलै पैसा दिन सक्ने व्यक्तिहरूलाई लक्षित गरेर महिलाहरू यस्तो काममा लागेको देखिन्छ,’ उनले भने, ‘धेरै व्यक्ति इज्जतकै डरले प्रहरीसम्म आउनै सक्दैनन् । भित्रभित्रै मानसिक रूपमा तनाव बेहोरेर बसिरहेको देखिन्छ ।’

पक्राउ परेका महिलाहरूविरुद्ध मुलुकी अपराध संहिता, २०७४ को ठगी, आपराधिक विश्वासघात तथा आपराधिक लाभसम्बन्धी कसुरको दफा २५३ को उपदफा १ र २ बमोजिम कसुर गरेको अभियोगमा मुद्दा दर्ता हुने रिजालले बताए । उपदफा ३ ‘ख’ बमोजिम कसैको व्यवसायमा गैरकानुनी तरिकाले कुनै क्षति पुर्‍याउने वा चरित्रमा झूटो दोष लगाउने नियतले डरत्रास देखाई आपराधिक लाभ लिएमा तीन वर्षसम्म कैद र ३० हजार रुपैयाँसम्म जरिवानाको प्रावधान छ ।

पहिले पनि भएका थिए घटना

२०७४ जेठ २९ मा तुलसीपुरका व्यवसायी ५३ वर्षीय राजकुमार श्रेष्ठको हनी ट्र्यापमै परेर ज्यान गएको थियो । तुलसीपुरकी १८ वर्षीया पूजा घर्तीले जेठ २७ मा बोलाएर सल्यान पुर्‍याइएका श्रेष्ठ अपहरणमा परेका थिए । पैसाको बार्गेनिङ गर्दागर्दै जंगलमा असुरक्षा भएपछि अपहरणकारीले श्रेष्ठलाई छत्रेश्वरीस्थित झिम्पेको लेकमा हत्या गरेका थिए । त्यतिबेला घटना देखेका कारण घोराही–१२ हापुरका २८ वर्षीय रणबहादुर घर्तीसमेत मारिएका थिए ।

प्रकाशित : आश्विन ४, २०७८ ०८:४२
प्रतिक्रिया
पठाउनुहोस्

विभूषण : पारदर्शितामा प्रश्न

कान्तिपुर संवाददाता

काठमाडौँ — संविधान दिवसमा सरकारले ९ सय ३ जनाले मानपदवी दिने घोषणा गरेको छ । पारदर्शिताको विषयमा निरन्तर प्रश्न उठे पनि सरकारले यस वर्ष पनि मापदण्ड स्पष्ट नगरी पदक प्रदान गर्ने निर्णय गरेको छ । योगदानका आधारमा स्वाथ्यकर्मी, सुरक्षाकर्मी, कर्मचारी, समाजसेवी, राजनीतिकर्मी, न्यायाधीश, उद्यमी र पेसाकर्मीलाई मात्र होइन, पहुँचका आधारमा केही व्यक्तिलाई पदक बाँडेकामा आलोचना पनि भएको छ ।

मन्त्रिपरिषद्को सिफारिसमा राष्ट्रपतिबाट घोषणा गरिएका विभूषणमध्ये सबैभन्दा ठूलो नेपाल रत्न कांग्रेसका संस्थापक एवं पूर्वप्रधानमन्त्री कृष्णप्रसाद भट्टराईलाई दिने निर्णय भएको छ । यस्तै कांग्रेसका दिवंगत नेता सुवर्णशमशेर राणा र पूर्वप्रधानमन्त्री एवं नेकपा एकीकृत समाजवादीका वरिष्ठ नेता झलनाथ खनाललाई राष्ट्र गौरवबाट विभूषित गर्ने निर्णय भएको छ ।

सरकारले पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल पत्नी सीतालाई ‘राजनीतिक अभियन्ता’ का रूपमा ‘प्रसिद्ध प्रबल जनसेवाश्री’ घोषणा गरेको छ । पूर्वप्रधानमन्त्री एवं नेकपा एकीकृत समाजवादीका अध्यक्ष माधवकुमार नेपालका बुबा स्वर्गीय मंगलकुमार उपाध्याय (नेपाल) लाई ‘साहित्यकार’ का रूपमा प्रबल जनसेवाश्री (मरणोपरान्त) प्रदान गर्न थालिएको छ ।

पछिल्लोपटक ओली सरकारले संविधान दिवसका दिन विभूषित हुनेको विवरण २०७८ असार २० अगावै संकलन गरिसकेको थियो । तर, नाम छनोटको काम अघि बढ्नै लाग्दा सर्वोच्चको परमादेशबाट ओली प्रधानमन्त्रीबाट हटे । असार २९ मा कांग्रेस सभापति शेरबहादुर देउवा प्रधानमन्त्री बने । त्यसको तीन सातापछि गृहमन्त्री बालकृष्ण खाँणको नेतृत्वमा प्राध्यापक भूषण श्रेष्ठ, व्यवसायी कुशप्रसाद मुल्मी, वरिष्ठ कलाकार मदनदास श्रेष्ठ, पूर्वउपरथी नरबहादुर कँडेल, त्रिभुवन विश्वविद्यालयका पूर्वरजिस्ट्रार गोविन्द शर्मा र इन्जिनियर ओमप्रकाश महतो सदस्य र गृह सचिव टेकनारायण पाण्डे सदस्यसचिव सम्मिलित विभूषण समिति गठन गरेको थियो । सोही समितिले नाम टुंगो लगाएको हो । हरेक वर्ष विभूषण पाउनेको संख्या २ सय नबढ्ने गरी मापदण्ड बनेकामा गत वर्ष नै मापदण्ड संशोधन गरी ‘आवश्यक मात्रामा’ दिन सक्ने व्यवस्था गरिएको हो ।

उक्त मापदण्डमा राजनीतिक, सामाजिक, आर्थिक, शान्तिसुरक्षा र प्रशासन, शिक्षा र प्रशासन, सूचना/सञ्चार, विज्ञान, प्रविधि, भाषा/साहित्य–कला/संस्कृति, खेलकुद र राष्ट्रिय जीवनका अन्य महत्त्वपूर्ण क्षेत्रका व्यक्तिलाई विभूषण प्रदान गर्न सकिने प्रावधान राखिएको छ । यसले हरेक वर्ष विभूषण छनोटमा देखिएका विकृति हट्ने अनुमान गरिएको थियो । तर, संशोधित मापदण्डमा कोटा हटाएर संख्या निर्धारण गर्ने अधिकार विभूषण समितिलाई दिएपछि विगतबाटै निरन्तरता पाएको विभूषण प्रदानसम्बन्धी अपारदर्शी नै रहेको छ ।

गृह मन्त्रालयका अनुसार २०७७ मा ५ सय ९४ जनालाई विभूषण बनाउन सरकारले करिब १२ करोड रुपैयाँ खर्च गरेको थियो । त्यस्तै २०७६ मा ६ सय ३३ जनालाई विभूषण बनाउन ८ करोड ५० लाख रुपैयाँ खर्च भयो । २०७५ मा ५ सय १८ जनालाई विभूषण सिफारिस गरिएकामा ५ करोड ६९ लाख रुपैयाँ खर्च भएको थियो । यसपटक भने करिब १५ करोड खर्च हुने गृह मन्त्रालयको अनुमान छ ।

केन्द्र सरकारको सिको गर्दै वाग्मती प्रदेश सरकारले पनि २२ जनालाई पदक बाँड्ने भएको छ । माघ २९ मा प्रदेश सरकार स्थापना दिवसका दिन विभिन्न क्षेत्रमा योगदान पुर्‍याएकालाई विभूषण पदक वितरण गर्न लागेको हो ।लुम्बिनी प्रदेश सरकारले ५७ जनालाई प्रदेश पदकले विभूषित गर्दैछ । माओवादी केन्द्रका कुलप्रसाद केसी मुख्यमन्त्री भएका बेला माओवादीनिकट व्यक्ति र समितिमा रहेका सदस्यका वरिपरिका धेरै जना पदक पाउने सूचीमा छन् ।

प्रकाशित : आश्विन ४, २०७८ ०८:१६
पूरा पढ्नुहोस्
प्रतिक्रिया
पठाउनुहोस्
×