कपिलवस्तुमा अक्सिजन उत्पादन सुरु- लुम्बिनी - कान्तिपुर समाचार

कपिलवस्तुमा अक्सिजन उत्पादन सुरु

कान्तिपुर संवाददाता

कपिलवस्तु — कपिलवस्तुमा पहिलोपटक अक्सिजन उत्पादन थालिएको छ । सदरमुकाम तौलिहवास्थित जिल्ला अस्पतालमा नयाँ जडान गरिएको मेसिनबाट सातासम्मको परीक्षण उत्पादनपछि नियमित उत्पादन थालिएको हो ।

१ करोड २८ लाख रुपैयाँ लागतमा फेयर ट्रेड प्रालिले प्लान्ट जडान गरेको हो । २० एमएमक्यू क्षमताको मेसिनले प्रतिमिनेट दुई सय लिटर अक्सिजन उत्पादन गर्ने बताइएको छ । चीनबाट आयात गरिएको मेसिनमा कम्प्रेसर, फिलिङ ड्रायर, एडप्सन ड्रायर, फिल्टर, सेप्रेसन सिस्टम, गेस बफर टेङ्क, स्टेरिलाइजिङ फिल्टर र ट्रान्सफर्मर रहेको निर्माण कम्पनीका इन्जिनियर देवेन्द्र श्रेष्ठले बताए । गत असार ८ गते सम्झौता भई असार मसान्तसम्म काम सम्पन्न गर्ने समयसीमा दिइएकामा प्राविधिक कारणले ढिलो भएको अस्पतालका मेडिकल सुपरिन्टेन्डन्ट डा. किशोर बन्जाडेले बताए ।

निर्माण कम्पनीले मेसिन जडान गरी उत्पादन गर्न जीसी रिसर्च एण्ड डेभलप्मेन्टलाई जिम्मा दिएको थियो । अस्पतालमा न्यून मात्रामा अक्सिजन खपत भइरहेकाले अहिले थोरै मात्रामा उत्पादन गरिएको छ । गत वैशाखमा संक्रमण तीव्र हुँदा जिल्लामा अक्सिजनको समस्या परेको थियो । एकपटकमा १० वटा सिलिन्डर भर्न सकिने क्षमता छ । आवश्यकताअनुसार उत्पादन बढाउँदै लगिनेछ । अस्पतालमा १ सय ४० वटा साना–ठूला सिलिन्डर छन् । पूर्ण क्षमतामा चलाउन सके जिल्लाका अन्य अस्पताललाई पनि अक्सिजन आपूर्ति गर्न सकिने डा. बन्जाडेले बताए ।

प्रकाशित : भाद्र ३०, २०७८ ११:०७
प्रतिक्रिया
पठाउनुहोस्

नगर प्रमुख र अधिकृतलाई अवहेलना मुद्दा

कान्तिपुर संवाददाता

धनुषा — धनुषाको हंसपुर नगरपालिकाका प्रमुख रामज्ञान मण्डल र प्रमुख प्रशासकीय अधिकृत रामलोचन मण्डललाई उच्च अदालत जनकपुरले आदेश पालना नगरेको भन्दै अदालतमा उपस्थित हुन आदेश दिएको छ ।

नगरपालिकामा सरुवा भएका प्रमुख प्रशासकीय अधिकृत केशवकुमार अधिकारीलाई हाजिर गर्नबाट रोक लगाएको भन्दै उनीहरूविरुद्ध अवहेलना मुद्दा परेको हो ।

अधिकारीलाई संघीय मामिला तथा सामान्य प्रशासन मन्त्रालयले साउन २८ गते हंसपुरमा खटाएको थियो । अदालतले भदौ ९ गते अधिकारीलाई हाजिर गर्नबाट रोक लगाउने कार्य नगर्नू–नगराउनू भन्दै नगरपालिकाको नाममा अन्तरिम आदेश जारी गरेको थियो ।

तर नगर प्रमुख र प्रमुख प्रशासकीय अधिकृतले अधिकारीलाई हाजिर हुन नदिई अदालतको आदेश अवेहलना गरेको ठहर गर्दै भदौ २३ गते न्यायाधीश हरिप्रसाद वाग्ले र रमेश ढकालको संयुक्त इजलासले उनीहरूलाई उपस्थित हुन आदेश दिएको हो । अवहेलना मुद्दाबारे आफ्नो व्यहोरा र प्रमाणसहित ७ दिनभित्र बयानका लागि उपस्थित हुन उच्च अदालतले आदेश दिएको छ ।

अदालतले अन्तरिम आदेश जारी गरे पनि अधिकारीलाई उपस्थित नगराउनु नगरपालिकाले लिखित रूपमा नै ठाडै अदालतको आदेशलाई चुनौती दिएको देखिएको उच्च अदालतले ठहर गरेको छ । मन्त्रालयको निर्णयअनुसार सरुवा भएर आए पनि हाजिर हुन नदिएपछि नगरपालिकालाई विपक्षी बनाएर अधिकारीले उच्च अदालतमा रिट निवेदन दायर गरेका थिए ।

प्रकाशित : भाद्र ३०, २०७८ १०:५६
पूरा पढ्नुहोस्
प्रतिक्रिया
पठाउनुहोस्
×