पूर्वसभापति र सचिव वडामै पराजित- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

पूर्वसभापति र सचिव वडामै पराजित

कान्तिपुर संवाददाता

रोल्पा — कांग्रेसको आसन्न १४ औं महाधिवेशनअन्तर्गत रोल्पामा पूर्वसभापति र बहालवाला सचिव वडामै पराजित भएका छन् । क्षेत्रीय प्रतिनिधिका आकांक्षी उनीहरू भदौ २३ गते सम्पन्न वडा निर्वाचनमै पराजित भएका हुन् । 

रोल्पा कांग्रेसका पूर्वसभापति कृष्णबहादुर घर्तीमगरलाई उनको जन्मगाउँ माडी गाउँपालिका–२ घर्तीगाउँमा पौडेल पक्षीय कार्यकर्ताले पराजित गरे । शक्ति प्रदर्शन गरिएपछि भएको निर्वाचनमा पौडेल पक्षीय कार्यकर्ताले एकतर्फी जित हासिल गरेका थिए । तत्कालीन कांग्रेस प्रजातान्त्रिकका जिल्ला सभापति भई करिब एक दशक नेतृत्व गरेका घर्तीमगरविरुद्ध वर्तमान सभापति अमरसिंह पुन मगर कस्सिएर लागेपछि घर्तीमगर वडाबाटै पराजित भएका हुन् ।

अघिल्लो जिल्ला अधिवेशनमा निर्वाचित हुन अनिच्छा देखाएका घर्तीमगर यसपटक निर्वाचित भएको भए केन्द्रीय सदस्य हुने बलियो सम्भावना थियो । उनी सभापति देउवाका विश्वासपात्र मानिन्छन् । २०३६ सालको विद्यार्थी आन्दोलनबाट राजनीतिमा लागेका उनी २०५९ सालमा तत्कालीन शेरबहादुर देउवा नेतृत्वको कांग्रेस (प्रजातान्त्रिक) रोल्पाको जिल्ला सभापति हुँदै पार्टी एकीकरणपछि पनि जिल्ला सभापतिमा कायम थिए । साविकको घर्तीगाउँ गाविसका पूर्वअध्यक्ष घर्तीमगर कांग्रेसको १२ औं महाधिवेशनमा वर्तमान सभापति अमरसिंह पुनलाई पराजित गरी सभापति भएका हुन् ।

वर्तमान जिल्ला कार्यसमितिका सचिव मोहन परियार पनि त्रिवेणी गाउँपालिका–३ लिङदुङमा वडा निर्वाचनमै पराजित भएका छन् । सुरुमा देउवा पक्षीय उनी पछि पौडेल पक्षमा लागेकाले वडाबाटै पराजित भएको कांग्रेसजनको भनाइ छ । तत्कालीन राजा ज्ञानेन्द्रको शासनकालमा उनी साबिकको जिविस रोल्पाको उपसभापति पदमा मनोनीत भएका थिए ।

कांग्रेसका संस्थापक जिल्ला सभापति एवं पूर्वसांसद सुरेन्द्र हमाललाई पनि वडामा निर्वाचन जित्न सकस देखियो । सुनिलस्मृति–२ खुंग्रीबाट एक जना युवा उम्मेदवारले आफ्नो नाम फिर्ता लिएपछि मात्रै हमाल वडामा निर्वाचित भएका थिए । ‘कार्यकर्ताले निकै छानबिन गरेर प्रतिनिधि चयन गरेका छन्,’ कांग्रेसका जिल्ला उपसभापति एवं सभापतिका दाबेदार किशोर आचार्यले भने, ‘सबैतिर कडा प्रतिस्पर्धा भएको देखियो ।’

युवाहरूसँग कडा प्रतिस्पर्धा गरेर वडाबाट जित हासिल गर्ने अगुवा नेताहरूमा पूर्वसहायक मन्त्री भीमकुमारी बुढामगर, पूर्वसांसद लेखनाथ आचार्य, जिल्ला सभापतिका दावेदार मानबहादुर खत्री र जिल्ला पार्टीका संस्थापक कुलचन्द आचार्य रहेका छन् ।

पार्टीको रोल्पा नगर समितिका सभापति चन्द्रप्रकाश आचार्यले सबैलाई मिलाएर ल्याउन निकै पहल गर्नुपरेको बताए । ‘अहिले युवाहरूले नेतृत्व लिने कोसिस गरेको पाइयो । निकैपछि कम्युनिस्टको किल्ला रोल्पामा कांग्रेस पुनः जागेको स्पष्ट भएको छ,’ उनले भने । कांग्रेस जिल्ला सभापति अमरसिंह पुनले थबाङ गाउँपालिकाको एउटा वडाबाहेक जिल्लाका ७१ वडामै पार्टीको वडा समिति गठन भएको बताए ।

प्रकाशित : भाद्र २९, २०७८ १०:४३
प्रतिक्रिया
पठाउनुहोस्

डोजरले हल्लाएको बस्ती बग्ने खतरा

जमिनको अवस्था पहिचान नगरी सडक विस्तार गर्दा समस्या
शमशेरविक्रम जीसी

प्यूठान — प्यूठान नगरपालिका–२, चितिखोलाका लालबहादुर सुनारले घरभन्दा माथि रहेको जंगलमा टहरो बनाएका छन् । बाँसले बारेर बनाइएको टहरोमा त्रिपालको छानो छ । पहिरोले घर बगाउने खतरा बढेपछि त्यहीं रात काट्ने तयारी स्वरूप टहरो बनाएको उनले बताए । 

घर र आसपास चिरा परेको देखिन थालेपछि करिब एक महिनादेखि उनी आफन्त र छिमेकीकहाँ आश्रय लिएर बसेका थिए । ‘घरमुनिबाट पहिरो जान थालेको छ । त्यसैले एक महिनादेखि छिमेकी र आफन्तको घरमा बस्दै आएका थियौं,’ सुनारले भने, ‘सधैं त्यसरी बसेर के गुजारा होला र भनेर घरमाथिको जंगलमा टहरो बनाएको हुँ ।’

लुम्बिनी प्रदेशको गौरवको आयोजना रामपुर–कपुरकोट सडक खण्डअन्तर्गत प्यूठान खण्डको दाखाक्वाडी–बर्जिबाङ–भिंगृ सडक विस्तार गर्ने क्रममा उनको घर जोखिममा परेको हो । सडक विस्तार गर्ने क्रममा बर्खामा ठूला मेसिन (डोजर) चलाएर काम गर्दा जमिन थर्किएर पहिरो जान थालेको सुनारले बताए । ‘सडक खन्नुअघि नै जोखिम हुन्छ भनेर जनप्रतिनिधिलाई जानकारी गराएका थियौं,’ उनले भने, ‘पछि केही भए व्यवस्था गरौंला भन्दै सडक विस्तारको काम अघि बढाए, अहिले घरविहीन भइयो ।’

अहिले चितिखोला बस्तीको चारैतिरबाट पहिरो जान थालेको छ । घरमुनीको बारीको आधा जमिनमा धाजा फाटेको उनले बताए । घरमुनिबाट पहिरो जान थालेपछि चितिखोलाका पूर्वे कामी पनि २५ दिनदेखि नातिको घरमा आश्रय लिंदै आएका छन् । वडा कार्यालयले त्रिपाल दिएको छ । ‘कतै सुरक्षित स्थानमा बस्नु भनेको छ,’ उनले भने, ‘घर छोडिसक्यौं, अब कता जानू ?’ वडा कार्यालयले उपलब्ध गराएको त्रिपालको छानो हालेर जंगलमा छाप्रो बनाउन थालेको उनले बताए ।

पहिरोले चितिखोलाका तीन घर सुनार परिवारका १५ जनालाई बेघरबार बनाएको छ । पानी नपरेका बेला दिउँसोमा घरमै बस्ने गरेको पूर्वेले बताए । ‘रात परेपछि छिमेकीकहाँ जान्थ्यौं,’ उनले भने, ‘अहिले आफ्नै छाप्रोमा बस्छौं ।’ तीन परिवार मिलेर टहरा निर्माणका जुटेको उनले सुनाए । ‘गरी खाने बारीमा पनि पहिरो जान थालेको छ,’ उनले भने, ‘अब घर बनाएर बस्ने ठाउँसम्म बचेन, कता ओत लाग्ने ? जंगलकै बास हुने भो ।’

दाखाक्वाडी–बर्जिवाङ–भिंगृ सडक विस्तार गर्दा उक्त बस्तीको अवस्थालाई बेवास्ता गरिएको स्थानीयले आरोप छ । त्यहाँको भूगोलको अवस्था पहिचान नगरी सडक विस्तार गर्दा पहिरोले बगाएको उनीहरूको दाबी छ । पहिरोले केही बस्ती र जानकारी माविको भवन जोखिममा परेको छ ।

ठूलो बाटो बनाउने बहानामा गाउँमा ‘काल’ पसेको स्थानीय हिमा कामीले दुखेसो पोखिन् । ‘घरमाथिबाट घरजत्रा ढुंगा पल्टिन ठिक्क परेका छन्, रुख ढलेर कतिबेला च्याप्छ भन्ने पिरलो उस्तै छ,’ उनले भनिन्, ‘बाटो खन्दा फालेको माटोले पनि तलबाट तान्ने अवस्था आएको छ ।’ अव्यवस्थित तरिकाबाट खनिएको सडकले गाउँ नै उठिबास लाग्ने अवस्था आएको उनले बताइन् । ‘पहिले गाडी राम्रै चलिरहेका थिए,’ उनले भनिन्, ‘सरकारले पिच बाटो बनाउने आश्वासन दिएर बाँच्नु न मर्नुको अवस्थामा पुर्‍यायो ।’ उनका अनुसार हालको अवस्था हेर्दा काल कुरेर बसेजस्तो भएको छ । ‘मरे मरिएला, बाँचे बाचिन्छ भन्दै भगवान् भरोसामा छौं,’ उनले भनिन् ।

गौरा–बंगलाचुली जेभी काठमाडौंले सडक निर्माण गरिरहेको छ । सडक पूर्वाधार विकास कार्यालय रोल्पामार्फत काम भइरहेको हो । मूल्य अभिवृद्धि करसहित ११ करोड ५६ लाख ८६ हजार १३ रुपैयाँ ३९ पैसामा २०७७ जेठ २७ गते ठेक्का सम्झौता गरेको थियो । अहिलेसम्म क्षतिका विषयमा कतैबाट उजुरी र जानकारी नआएको पूर्वाधार विकास कार्यालय प्रमुख दीपक खड्काले बताए । ‘बहुवर्षीय योजनाअन्तर्गत सडक विस्तारको काम अघि बढेको हो,’ उनले भने, ‘वर्षात बन्द भएपछि सडक विस्तारको काम पुनः सुरु हुन्छ ।’

प्रकाशित : भाद्र २९, २०७८ १०:४१
पूरा पढ्नुहोस्
प्रतिक्रिया
पठाउनुहोस्
×