कांग्रेस नेता गुट बनाएरै दौडधुपमा- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

कांग्रेस नेता गुट बनाएरै दौडधुपमा

वडा अधिवेशनमा आफ्नो पक्षमा क्षेत्रीय प्रतिनिधि ल्याउन नेताहरुको लबिङ तीव्र
वीरेन्द्र केसी

अर्घाखाँची — कांग्रेसको १४ औं महाधिवेशनको कार्यतालिका तोकिएपछि गुल्मी र अर्घाखाँचीका जिल्ला सभापति पदका आकांक्षी माहोल बनाउन दौडधुपमा लागेका छन् । विभिन्न पेसा व्यवसायका लागि संघ र प्रदेश राजधानीमा रहेका पार्टी कार्यकर्तासँग भेटघाट, बैठक र छलफलसहित आफ्नो पक्षमा वातावरण बनाउन केन्द्रीय नेताहरूकहाँ धाइरहेका हुन् । 

आफूले जिल्ला सभापति जित्नका लागि भदौ १८ गते हुन लागेको वडा अधिवेशनमा आफ्नो पक्षमा क्षेत्रीय प्रतिनिधि ल्याउन नेताहरूको लबिङ तीव्र छ । कांग्रेस नेतृत्वमा सरकार गठन भएपछि यतिबेला सभापतिका आकांक्षी नेताहरू काठमाडौंमा केन्द्रीय सभापति एवं प्रधानमन्त्री शेरबहादुर देउवा र अन्य मन्त्रीलाई बधाईसँगै वरिष्ठ नेता रामचन्द्र पौडेललगायत पार्टीका शीर्ष नेताहरूकहाँ पुगेका छन् ।

गुल्मी कांग्रेस सभापति भुवन श्रेष्ठ दुई साता राजधानी बसेर जिल्ला फर्किएका छन् । उनी पुनः अधिवेशनबाट पार्टी सभापतिमा दोहोरिने कसरतमा छन् । प्रधानमन्त्री, मन्त्रीलाई बधाई दिँदै अन्य नेताहरूलाई भेटेर फर्केका हुन् । सभापतिका आकांक्षी जिल्ला सचिव खिलध्वज पन्थी राजधानीमा छन् । नेतासँग भेटघाटसहित गाउँमा विकास निर्माणका योजनामा बजेट पारिदिन विभिन्न विभागीय प्रमुख र मन्त्रालयमा निवेदन दिए । अर्का आकांक्षी विष्णु बलाल जिल्लाका कार्यकर्ता भेटघाटमा व्यस्त छन् ।

जिल्ला नेताहरू अहिले देउवा र वरिष्ठ नेता पौडेल समूहमा विभाजित भएरै प्रचारमा जुटेका छन् । श्रेष्ठ, पन्थी र बलाल पौडेल पक्षधर हुन । गुल्मीमा कमजोर रहेको देउवा समूह मिलेरै नेतृत्वमा जाने रणनीतिमा छ । उक्त समूहबाट सभापतिमा कालिगण्डकी गाउँपालिका अध्यक्ष वेदबहादुर थापाको चर्चा छ । चन्द्र केसी र छन्द पहराई प्रदेशमा जाने भएपछि थापाको चर्चा भएको हो । सभापति बन्न गाउँमा जनाधार कमजोर भएकाले अन्य पदमा मिलेरै छिर्ने रणनीतिमा छ । आउँदो संसदीय निर्वाचनमा पार्टीलाई जिताउन र संगठन बलियो बनाउन आफू एकपटक सभापतिमा दोहोरिन चाहेको सभापति श्रेष्ठले बताए । अहिले गाउँदेखि केन्द्रसम्म अधिवेशन केन्द्रित भेटघाट र गतिविधि भइरहेको उनले बताए । राजधानीमा रहँदा गुल्मीबाट विभिन्न पेसा, व्यवसाय र रोजगारका सिलसिलामा काठमाडौंमा बस्ने गुल्मीबासी कांग्रेसलाई श्रेष्ठ र पन्थीले भेटघाट गरे । युवामाझ पन्थी लोकप्रिय छन् । पौडेल पक्षमा तीन जना उम्मेवार भएकाले सभापतिमा जित्न सकिने रणनीति देउवा समूहले बनाउँदैछ । सबैको सहमति र सल्लाह अनुसार अधिवेशनबाट नेतृत्व लिन अघि बढ्ने थापाले बताए । केन्द्रीय सदस्य चन्द्र भण्डारीको गृहजिल्ला हो गुल्मी । अघिल्लो महाधिवेशनमा भण्डारी देउवातिर भए पनि यसपालि छैनन् । अधिकांश नेता/कार्यकर्ताले नयाँ नेतृत्व खोजेकाले आफू सभापतिमा अघि सरेको सचिव पन्थीले बताए । ‘विभिन्न पेसामा काठमाडौं, बुटवलमा रहेका कांग्रेस कार्यकर्तासँग भेटघाट गरेको छु,’ उनले भने ।

अर्घाखाँचीका नेता काठमाडौं आउजाउ गरेका छन् । जिल्ला सभापति विष्णु मुस्कान दुई साता काठमाडौं बसेर भेटघाट गरी बुधबारदेखि बुटवलका कार्यकर्तासित भेटघाटमा लागेका छन् । ‘महाधिवेशन तोकिएकै समयमा हुनुपर्छ भनेर दबाब दिन काठमाडौं गएको हुँ,’ उनले भने, ‘प्रधानमन्त्री, मन्त्रीलाई बधाईसँगै पार्टी नेताहरूसँग भेटघाट गरें । मन्त्री र विभाग प्रमुखसँग अर्घाखाँचीका चालु विकास योजना र नयाँ योजनाका लागि बजेट माग गरेको छु ।’ राजधानी रहँदा पार्टी नेता/कार्यकर्तासँग महाधिवेशन केन्दित छलफल र सरसल्लाह गरेर फर्केको उनले बताए । केन्द्रीय नेतादेखि जिल्लाका अधिकांश नेता/कार्यकर्ताको सल्लाहअनुसार आफू पुनः सभापतिमा दाहोरिन चाहेको उनले बताए । उनी वरिष्ठ नेता पौडेल निकटतम् हुन् ।

अर्घाखाँचीबाट जिल्ला सभापतिका चार जना आकांक्षी देखिएका छन् । पौडेल समूहबाट मुस्कान र महासमिति सदस्य युवा नेता केशव श्रेष्ठ छन् । देउवा गुटबाट महासमिति सदस्य एवं शिक्षक संघका अध्यक्ष यादवप्रसाद घिमिरे र बाबुराम पौडेल मैदानमा उत्रिएका छन् । पौडेल समूहको बाहुल्य रहेको जिल्लामा पार्टी केन्द्रीय नेताले गुट बनाएरै अधिवेशन केन्द्रित गतिविधि सञ्चालन गरेपछि मुस्कान र श्रेष्ठमध्ये एक जना सभापतिको उम्मेदवार बन्न भेटघाटमा कार्यकर्ताले दबाब दिएका छन् । मुस्कान अघिल्लो अधिवेशनमा निर्विरोध सभापति भएका थिए । श्रेष्ठ निकट समूहले मुस्कानलाई लुम्बिनी प्रदेश महामन्त्री वा केन्द्रीय सदस्य बन्न सुझाव दिएका छन् । मुस्कान निकट कार्यकर्ताले एकपटक सभापतिमा दोहोरिन दबाब दिएका छन् । समयमै क्रियाशील सदस्यता पार्टी केन्द्रलाई बुझाउने अर्घाखाँची पहिलो जिल्ला भएकाले र संगठन निर्माणमा राम्रो भूमिका निर्वाह गरेकाले धेरैले आफूलाई सभापतिमा दोहोर्‍याउन चाहेको मुस्कानले बताए ।

‘सभापतिमा मेरो आकांक्षा छ,’ श्रेष्ठले भने, ‘मुस्कान दाइ प्रदेश वा केन्द्रमा गएर मलाई समर्थन गर्न भनेको छु । परिस्थिति अनुसार हामी दुईमध्ये एक जना मात्रै सभापतिको उम्मेदवार बन्छौं ।’ देउवा समूहकी कांग्रेस केन्द्रीय सदस्य एवं संघीय संसदीय दलकी सचेतक पुष्पा भुसालले सभापतिमा घिमिरेलाई अघि सारेकी छन् । उनी यसपालि आफू निकटलाई सभापति बनाउन दौडपुधमा छन् । देउवा समूहमा घिमिरेभन्दा आफू पुरानो भएकाले बाबुराम सहयोग जुटाउन केन्द्रीय नेताकहाँ धाएका छन् । ‘देउवा समूहबाट म नै सभापतिको उम्मेदवार हुँ,’ उनले भने, ‘मलाई सबैको सहयोग रहन्छ ।’

अर्घाखाँचीमा अघिल्लो अधिवेशनमा संस्थापन र इतर समूहको गुट थिएन । यसपालि देउवा र पौडेल गुट बनाएर लबिङमा लागेको गाउँका कार्यकर्ताले मन पराएका छैनन् ।

प्रकाशित : भाद्र १६, २०७८ १२:०९
प्रतिक्रिया
पठाउनुहोस्

चुरेको पहिरोले उठीबास

घना बस्तीमा पहिरो पसेपछि जोखिममा परेका परिवार सुरक्षित स्थान खोजेर सर्दै
सन्जु पौडेल

लुम्बिनी — सोमबार बिहान साढे ११ बजेतिर बुटवल–३ ज्योतिनगरकी कमला पाण्डे खाना पकाइरहेकी थिइन् । त्यही बेला टिनले छाएको २ कोठे घरभित्र हिलोसहितको लेदो पस्न थाल्यो ।

प्यारालाइसिस भएर बिस्तरामा परेका ७१ वर्षीय श्रीमान् कृष्णदत्तलाई निकालेर सार्ने उपाय कमलाको रहेन । ‘आत्तिँदै वरपरकाले सुन्ने गरी चिच्याएँ,’ ६८ वर्षकी उनले भनिन्, ‘तीन जना छिमेकी भाइहरू आएर बोकेर तलसम्म लगिदिनु भयो ।’ श्रीमान्लाई रिक्सामा राखी छोरीको घरमा लगिएको उनले सुनाइन् । उनी बुटवलको बुद्धनगरमा आश्रय लिएर बसेका छन् ।

अविरल वर्षाले देशैभरि पारेको असरसँगै बुटवल–३ मा २३ वर्षपछि चुरे पहाडदेखि खसेको पहिरोले १० घर पूर्णरूपमा क्षतिग्रस्त भए भने २ सयभन्दा बढी घरधुरी उच्च जोखिममा छन् । २०५५ सालको पहिरोपछि राष्ट्रपति चुरे संरक्षणले बर्सेनि बजेट निकासा गरी ज्योतिनगरको डाँडामा चेक ड्याम बनाएको छ । यसपटक आएको पानीले पहाडका रुख, ठूला ढुंगासहित ड्याम नै नाघेर बस्तीमा पसी विस्थापित गराएको हो । पूर्ण रूपमा घरमा क्षति भएका स्थानीय आफन्तकहाँ आश्रय लिएर बसेका छन् भने जोखिममा रहेकाहरूले अन्यत्र कोठा भाडामा लिई सर्ने काम गरिरहेका छन् ।

चुरे पहाडको तीन स्थानबाट पहिरो खसेको छ । एउटा पहिरोले पहिलो दिन ४ र अर्को दिन ७ गरी ११ घरमा पूर्णरूपमा क्षति गरेको हो भने अर्को पहिरो डाँडामा रहेको जनज्योति प्राविदेखि लक्ष्मीनगर पार्क हुँदै सडकमा बगिरहेको छ । जसलाई घरमा पस्न नदिन स्थानीयले नाली निकास भएको स्थानमा सडक फोडी निकास दिएका छन् । त्यस्तै, अर्को पहिरोले बहुमुखी क्याम्पसको मैदान हुँदै बिटीआई, नेपाल हाइड्रो पावर र मुख्य सडकमा नै असर गरिरहेको छ । तीनवटै स्थानमा हिलोसहित लेदो माटो डोजरको सहायताले पन्छाई सफा गर्ने काम भइरहेको छ ।

स्थानीय अमृत खड्काले अहिले जोखिम भएका १ सय ५० बढी घरका स्थानीय बस्तीबाट अन्यत्र सरिसकेको बताए । पानी ट्यांकी र पर्खालले एउटा बस्तीलाई जोगाएको उनले जानकारी दिए । ‘पहिरो खाली स्थान हुँदै तल आएको छ,’ उनले भने, ‘पानी ट्यांकी फुट्यो भने ज्योतिनगर पूरै र लक्ष्मीनगरमा पनि क्षति पुग्ने निश्चित छ ।’ मुख्य सडक हुँदै लक्ष्मीनगर र ज्योतिनगरमा २ हजारभन्दा बढी घरधुरी छन् । अहिले ती सबै घर जोखिममा रहेको उनले बताए ।

बुटवल उपमहानगरपालिकाका वातावरण इन्जिनियर योगेश चापागाईंले तत्काललाई पहिरो खसेको मुख्य स्थानमाथिको भाग कटान गरी पोन्डिङ गर्ने र पानी परिहाले माथिबाट बग्ने भल त्यही खाडलमा जम्मा भई बस्तीमा असर नगर्ने गरी काम सुरु गरेको बताए । बुटवल उपमहानगरपालिका–४ का वडाध्यक्ष टंक पराजुलीले वडा ३ र ४ को सीमामा रहेको मितेरी खोल्सा र वडा ३ को खोल्साबाट लेदोसहितको माटो बगेर आउन थालेपछि जोखिम बढेको बताए । त्यस्तै लक्ष्मीपार्कको पश्चिम–उत्तरतर्फको भाग ढुंगा–माटोले भरिएको उनले सुनाए । पराजुलीका अनुसार लक्ष्मीपार्कको पूर्वतर्फबाट बग्ने सुखौरा खोलामा लगाइएको चेक ड्याम कतै बगाएको छ भने कतै क्षति पुगेको छ । उपमहानगरपालिकाको बुटवल–वसन्तपुर केबलकार र रिङरोड हिउँद र वर्षायाममा पहिरो खस्ने स्थानमै पर्छ । उक्त रोड निर्माणको काम अहिले रोकिएको छ । अदालतमा मुद्दा विचाराधीन रहेकाले काम अघि नबढेको स्थानीयले बताए ।

राष्ट्रपति तराई मधेस चुरे संरक्षण समिति बुटवलका जलाधार व्यवस्थापन अधिकृत विमल राउतका अनुसार अहिलेको पहिरोको तुलनामा २०५५ सालको पहिरो सानो रहेको थियो । यसपटक चुरेबाट एकै ठाउँमा जोडिएर खसेकाले धेरै क्षति भएको उनले बताए । आफूहरूले लक्ष्मीनगरको डाँडामा चेक ड्याम बनाएको र त्यसले पहिरो बस्तीमा पस्नबाट जोगाएको भन्दै उनले ज्योतिनगरमा भने काम गर्न नपाउँदै माथिको चेकड्याम नाघेर पहिरो आएको बताए ।

‘केबुलकार पहिरो खसेको स्थानदेखि पश्चिमतर्फको साइडमा बनाउने भनिएको छ,’ उनले भने, ‘त्यसका लागि अध्ययन त भएको होला तर बुटवलको सिद्धबाबा क्षेत्रभित्र पर्ने स्थान जोखिमयुक्त स्थानमै पर्छ ।’ चुरे क्षेत्रमा ठूला संरचना बनाउनु जोखिमपूर्ण भएकाले वातावरणीय मूल्यांकन गर्दा त्यसको व्यवस्थापन गरिने भने पनि कार्यान्वयन गर्न चुनौती रहेको उनले सुनाए । केबुलकार निर्माण गर्दा प्राकृतिक क्षतिलाई न्यूनीकरण गर्दै वातावरणीय संरक्षणका लागि स्रोत बढाउनेतर्फ ध्यान दिनुपर्ने उनको भनाइ छ ।

प्रकाशित : भाद्र १६, २०७८ १२:०६
पूरा पढ्नुहोस्
प्रतिक्रिया
पठाउनुहोस्
×