कांग्रेसका क्रियाशील सदस्यको नामावली सच्याउन माग- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

कांग्रेसका क्रियाशील सदस्यको नामावली सच्याउन माग

कान्तिपुर संवाददाता

परासी — पश्चिम नवलपरासीमा नेपाली कांग्रेसको क्रियाशील सदस्यताको विषयमा विवाद चर्किएको छ । जिल्लामा कांग्रेस केन्द्रीय सदस्य देवेन्द्रराज कँडेल र संविधानसभा सदस्य तथा कांग्रेस नेता विक्रम खनाल समूहबीच क्रियाशील सदस्यता वितरण सम्बन्धमा सुरुवाती चरणदेखि नै विवाद थियो ।

वडा, नगर र क्षेत्रबाट स्वीकृत भएर केन्द्रमा पठाइएको नाम परिवर्तन भएपछि अहिले थप विवाद चर्किएको हो । जिल्लाका केही वडामा क्रियाशील सदस्यको नामावली केन्द्रमा थपघट गरेको भन्दै कांग्रेसको एक समूहले त्यो रद्द गर्न माग गरेको छ । संघीय क्षेत्र कार्य समिति क्षेत्र नं. २ का सभापति नरेन्द्रकुमार गुप्ता र सोही क्षेत्रका प्रदेश कार्यसमिति सभापति दिनेशमणि पाठकले आइतबार विज्ञप्ति जारी गर्दै जिल्ला र क्षेत्रले समेत टुंग्याउन नसकेका नामहरू जिल्लाका केही नेताको दबाबमा केन्द्रमा थपघट गरेको आरोप लगाएका छन् ।

विज्ञप्तिमा रामग्राम नगरपालिका–३, १५, १६ र पाल्हीनन्दन गाउँपालिका–४ मा सदस्यतासम्बन्धी वडास्तरबाटै विवाद उत्पन्न भएकामा केन्द्रमा गठित छानबिन समितिको प्रतिवेदनले समेत उक्त वडाहरूमा नयाँ सदस्यता थप नगरी १३ औं महाधिवेशनका सदस्यबाट अधिवेशन गर्न राय दिएको तर अधिवेशन आफू अनुकूल बनाउन जिल्लाका केही नेताले केन्द्रमा दबाब दिएर नामावली थपघट गरेको उल्लेख छ ।

अन्य पालिकाहरूका केही वडामा पनि एकपक्षीय रूपमा नामावली थपघट गर्ने, पोस्टिङ भइसकेका नाम झिकेर आफू अनुकूलका व्यक्तिको नाम राख्ने कार्य भइरहेकाले त्यसतर्फ समेत केन्द्रीय पदाधिकारीको ध्यानाकर्षण गराउँदै त्यस्ता नामावली रद्द गर्न माग गरिएको कांग्रेस नेता तथा संघीय क्षेत्र नम्बर २ का सभापति नरेन्द्रकुमार गुप्ताले बताए ।

जिल्लाबाट नयाँ र पुराना गरी ९ हजार बढी क्रियाशील सदस्यको नामावली पठाइएको पार्टी जिल्ला समितिले जनाएको छ । जिल्ला सभापतिका लागि अहिले संविधानसभा सदस्य विक्रम खनाल समूहबाट अर्जुनकुमार पोखरेल र प्रतिनिधिसभा सदस्य एवं केन्द्रीय सदस्य देवेन्द्रराज कँडेल समूहबाट मोहन शर्माको नाम चर्चामा छ ।

प्रकाशित : श्रावण १८, २०७८ ०९:१९
प्रतिक्रिया
पठाउनुहोस्

‘कु’ मार्फत सत्ता हत्याएका म्यानमारका सेना प्रमुखले आफैलाई प्रधानमन्त्री घोषित गरे

२ वर्ष संकटकाल थप्ने तयारी
इकान्तिपुर डेस्क

काठमाडौँ — ‘कु’ मार्फत देशको सत्ता हत्याएका म्यानमारका सेना प्रमुख मिन आङ ह्लाइङले आफूलाई प्रधानमन्त्री घोषित गरेका छन् ।

म्यानमारका सेना प्रमुख मिन आङ ह्लाइङ । फाइल तस्बिर : रोयटर्स

यसै वर्षको फेब्रुअरीमा राष्ट्रपति विन मिन्ट, नेसनल लिग फर डेमोक्रेसी(एनएलडी) की नेतृ आङ सान सुकीलगायतलाई गिरफ्तार गर्दै सत्ता हातमा लिँदै म्यानमार सेनाले एक वर्षका लागि संकटकाल घोषणा गरेको थियो । सेना प्रमुख ह्लाइङले म्यानमारमा २ वर्ष संकटकाल थप्ने संकेत पनि गरेका छन् । सन् २०२३ को अगस्टसम्म संकटकाल थप्ने म्यानमार सेनाको योजना रहेको बुझिएको छ ।

आइतबार सरकारी टेलिभिजनमार्फत करिब एक घण्टा सम्बोधन गरेका सेना प्रमुख ह्लाइङलले ‘स्वतन्त्र तथा निष्पक्ष बहुदलीय चुनाव’ गराउने ‘वाचा’ पनि गरेका छन् । उनले जनताबाट चुनिएर आएका एनएलडीका नेताहरूलाई ‘आतंकवादी’ को संज्ञा दिएका छन् । साथै एनएलडी समर्थकलाई उनले ‘उग्रवादी’ बताएका छन् । गत फेब्रुअरी १ गिरफ्तार गरिएकी नेतृ सुकीमाथि सेनाले विभिन्न मुद्दा चलाएको छ ।

फाइल तस्बिर : रोयटर्स

सेनाको कुविरुद्ध भएको प्रदर्शनमा सयौं प्रदर्शनकारीको मृत्यु पनि भएको थियो । विश्वभरबाट म्यानमारमा प्रजातन्त्र बहालीका लागि आग्रह गरिए पनि सेनाले मानेको छैन । पछिल्लो समय म्यानमा कोरोना संक्रमण पनि बढिरहेको छ । सेना प्रमुख ह्लाइङले विरोधीहरूले ‘जानीजानी कोरोना फैलाएको’ आरोपसमेत लगाउन भ्याए ।

उनी 'कु'पछि गठन गरिएको संयन्त्र राज्य प्रशासन परिषद्(एसएसी) का अध्यक्षसमेत हुन् । अब कामचलाउ सरकार गठन भएपछि त्यो संयन्त्र नरहने बताइएको छ । राज्य प्रशासनलाई चुस्त बनाउन कामचलाउ सरकार गठन गरिएको सेनाले दाबी गरेको छ । सेना प्रमुख ह्लाइङले दक्षिणपूर्वी एसियाली राष्ट्रहरूको संगठन ‘आसियान’ ले तोकेका कुनै विशेष दूतसँग काम गर्न तयार रहेको बताएका छन् ।

सम्बन्धित समाचार

प्रकाशित : श्रावण १८, २०७८ ०९:१८
पूरा पढ्नुहोस्
प्रतिक्रिया
पठाउनुहोस्
×