पाल्पामा पहिरोले एक्स्काभेटर र ट्याक्टर पुरिए : एकको मृत्यु, एक घाइते- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

पाल्पामा पहिरोले एक्स्काभेटर र ट्याक्टर पुरिए : एकको मृत्यु, एक घाइते

माधव अर्याल

पाल्पा — पाल्पाको तिनाउ गाउँपालिका–६, मस्याम झ्याङ्लामा पहिरोले दुइटा एक्स्काभेटर र एउटा ट्याक्टर पुरिँदा एक जनाको मृत्यु भएको छ भने एक जना घाइते भएका छन् । 

पहिरोमा पुरिएर बर्दियाको बाँसगढी नगरपालिका–३, घरभई तानसेन नगरपालिका–८, डुम्रेमा अस्थायी बसोबास गर्ने २७ वर्षीय महेन्द्र पुनको मृत्यु भएको छ । पुन लु ४ त ६६२९ नम्बरको ट्याक्टरका सहयोगी हुन् । लु १ क २४९६ नम्बरको एक्स्काभेटर चालक रैनादेवी छहरा गाउँपालिका–१, सिद्धेश्वरका सरोज बुढा घाइते भएका छन् ।

गम्भीर घाइते भएका पुन र बुढालाई लुम्बिनी मेडिकल कलेज लगिएकामा बिहान ३ बजे पुनलाई चिकित्सकले मृत घोषणा गरेको प्रहरीले जनाएको छ । शुक्रबार मध्यरातमा कच्ची सडकमा हिलोमा फसेको ट्याक्टर निकाल्न गएका दुइटा एक्स्काभेटरसमेत पुरिएको जिल्ला प्रहरी कार्यालयका प्रहरी नायब उपरीक्षक रामेश्वर त्वातीले जानकारी दिए ।

सिद्धार्थ राजमार्गको डुम्रेबाट कच्चीसडक होलीघाटतर्फ ढुंगा लोड गरी गएको लु ४ त ६६२९ नम्बरको ट्याक्टर पहिरो खसेको हिलोमा फसेको थियो । सोही ट्याक्टर निकाल्न लु १ क २४९६ र लु १ क २४९७ नम्बरको एक्स्काभेटर गएका थिए । प्रहरी चौकी प्रभासका अनुसार तीनवटै सवारी साधन पहिरोमा पुरिएको छ । घटनाका सम्बन्धमा थप अनुसन्धान भइरहेको प्रहरीले जनाएको छ ।

तस्बिर सौजन्य : प्रहरी चौकी प्रभास

प्रकाशित : श्रावण २, २०७८ १०:०५
प्रतिक्रिया
पठाउनुहोस्

एक सातादेखि कालीगण्डकी करिडोर अवरुद्ध 

माधव अर्याल

पाल्पा — अविरल वर्षासँगै खसेको पहिरोले कालीगण्डकी करिडोरअन्तर्गत पाल्पा–पूर्वी नवलपरासी सडकखण्ड एक सातादेखि अवरुद्ध भएको छ । करिडोरअन्तर्गत रामपुर नगरपालिकाको काशीवन, स्याउलीबजार, साखर्दी खोलालगायत दर्जन बढी स्थानमा पहिरो खसेकाले सवारी साधन सञ्चालन हुन नसकेको हो । 

कालीगण्डकी करिडोरअन्तर्गत पाल्पा–पूर्वी नवलपरासी सडक खण्डको रामपुर नगरपालिका–१, स्याउलीवननजिकै खसेको पहिरो । तस्बिर : कान्तिपुर 


लामो समयदेखि सडक अवरुद्ध भए पनि खुलाउनेतर्फ ध्यान कसैको पुग्न नसक्दा आवतजावतमा समस्या भएको तनहुँको घिरिङ–१, पुट्टारका ज्यामबहादुर विकले बताए । उनका अनुसार रामपुरमा उपचार र खाद्यान्नका लागि जान पनि स्याङ्जा हुँदै जानु परेको छ । कालीगण्डकी करिडोरअन्तर्गत रामपुरदेखि पाल्पाकै बाँकामलाङसम्म र पूर्वी नवलपरासीका विभिन्न स्थानमा खसेको पहिरो नहटाउँदा त्यस भेगका बासिन्दालाई छिमेकी जिल्ला तनहुँ र स्याङजा हुँदै पाल्पाको रामपुर नगरपालिका र निस्दी गाउँपालिका केन्द्र जानु परेको छ ।

तनहुँ, स्याङजा र पूर्वी नवलपरासीका साथै पाल्पाकै पूर्वी भेगका बासिन्दाको उपचार, खाद्यान्नका लागि बजार केन्द्र रामपुर भए पनि एक सातादेखि आवतजावत बन्द भएको स्थानीय दानस मल्ल ठकुरीले जानकारी दिए । कालीगण्डकी करिडोरको पिपलडाँडा–गैडाकोट १ सय ३५ किलोमिटर खण्ड स्तरोन्नति र कालोपत्रको काम भइरहेको छ । निर्माण व्यवसायी, स्थानीय सरकार कसैले पनि सडक खुलाउन ध्यान नदिँदा स्थानीयले सवारी साधनमा आवतजावत गर्न पाएका छैनन् ।

‘आफ्नै गाउँपालिकामा कागजपत्र लिएर फरफारकका लागि जान आठ घण्टा लाग्यो,’ लालीगुराँस प्रावि, निस्दी गाउँपालिका–१, बाँकामलाङका मधुसुधन सोतीले भने, ‘लामो समयदेखि सडक बन्द हुँदा यस भेगका धेरैले दु:ख पाएका छन् । एकै दिनमा हुने कामका लागि तीन दिन खर्चिनु परेको छ ।’ ग्रामीण सडक बन्द भएकाले यही सडक भएर यात्रा गर्नुपर्ने हुन्छ । पूर्वी नवलपरासीको बौदिकाली, पाल्पाको निस्दी, रामपुर नगरपालिकाको केही वडा, तनहुँको घिरिङ गाउँपालिकालगायतका क्षेत्रमा यातायात ठप्प भएको छ । पहिरोका कारण पैदल हिँड्नसमेत जोखिम रहेको स्थानीयले बताए ।


प्रकाशित : असार ३१, २०७८ १०:३७
पूरा पढ्नुहोस्
प्रतिक्रिया
पठाउनुहोस्
×