लुम्बिनी प्रदेश सभाको बैठक सत्तापक्षबाटै बहिष्कार- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

लुम्बिनी प्रदेश सभाको बैठक सत्तापक्षबाटै बहिष्कार

घनश्याम गौतम

रूपन्देही — लुम्बिनी प्रदेश सभाको बैठक आधा घण्टाका लागि स्थगित भएको छ । बजेटमाथिको छलफल सकिएर मन्त्री र मुख्यमन्त्री शंकर पोखरेलले जवाफ दिएपछि सभामुख पूर्णबहादुर घर्तीले सहमतिका लागि आधा घण्टाको समय दिएका हुन् ।

समय दिनुअघि नै सत्ता पक्षले नै बैठक बहिष्कार गर्दै बैठकस्थलबाट मुख्यमन्त्री पोखरेलसहित मन्त्री र सदस्यहरु बाहिरिएका छन् ।

अहिले जारी छलफलमा सत्ता पक्षले सहमति गरेर अघि बढ्न आग्रह गरेको छ । विपक्षी गठबन्धनले बजेटलाई प्रक्रियामा लगेर टुंगो लगाउने अडान राखेको छ । मुख्यमन्त्री पोखरेलले बैठकमा जवाफ दिँदै बजेटलाई सफल बनाउन आग्रह गरेका छन् । उनले बजेट असफल हुँदा अस्थिरताको दुश्चक्रमा फस्दै गएकाले गम्भीर भएर छलफल गरी अघि बढ्न पनि आग्रह गरेका छन् ।

विपक्षी गठबन्धनले बजेटको विपक्षमा मतदान गर्ने निर्णय गरेका छन् । विपक्षी गठबन्धनको निर्णयसँगै सरकार संकटमा परेको छ । सरकारले असार १ गते ४० अर्ब ९५ करोड ९७ लाख रुपैयाँको बजेट प्रस्तुत गरेको थियो ।

विपक्षले सरकार अल्पमतमा रहेको भन्दै वैधानिक रुपले बहुमत सावित गर्न वा विश्वासको मत लिनुपर्ने अडान राख्दै बजेट माथिको छलफल अवरोध गर्दै आएको थियो । दुवै पक्षको सहमतिपछि आइतबारदेखि मंगलबारसम्म बजेट माथि छलफल भएको थियो ।

बिहीबार बजेटमाथि उठेका प्रश्नको जवाफ मन्त्री र मुख्यमन्त्रीले दिएपछि बजेट निर्णयार्थ प्रस्तुत गर्ने कार्यसूची तयार भएको थियो । बजेट निर्णयार्थ प्रस्तुत हुनु पूर्व सत्ता पक्षका मुख्य सचेतक भुमिश्वर ढकालले छलफलका लागि समय उपलब्ध गराउन माग गरेपनि विपक्षी गठबन्धनले प्रक्रियामा लैजान भनेपछि सत्ता पक्षका मुख्यमन्त्रीसहित सरकारका मन्त्री र प्रदेश सभा सदस्यहरु बैठकस्थलबाट बाहिरिएका हुन् ।

सरकार अल्पमतमा परेपछि बजेट थप अन्योलमा परेको छ । सत्ता पक्षका मुख्य सचेतक ढकालले छलफल गरेरै अघि बढ्ने बताए ।

प्रकाशित : असार ३१, २०७८ १७:३५
प्रतिक्रिया
पठाउनुहोस्

बजेट फेल गराउने लुम्बिनीका विपक्षी गठबन्धनको निर्णय

घनश्याम गौतम

रूपन्देही — लुम्बिनी प्रदेश सरकारको आगामी आव २०७८/७९ को बजेटको विपक्षमा मतदान गर्ने विपक्षी गठबन्धनले निर्णय गरेका छन् । प्रदेश सभा बैठकमा मन्त्रीहरुले जवाफ दिनेक्रम सकिएको छ । बजेट आजै निर्णयार्थ पेस हुँदैछ । 

लुम्बिनी प्रदेशका मुख्यमन्त्री शंकर पोखरेल अल्पमतमा रहेको दाबी गर्दै विपक्षी गठबन्धन नेकपा (माओवादी केन्द्र), नेपाली कांग्रेस, जनता समाजवादीको उपेन्द्र यादव समूह र राष्ट्रिय जनमोर्चाले बजेटको विपक्षमा मतदान गर्ने निर्णय गरेका हुन् । ८३ सदस्यीय प्रदेश सभामा अहिले नेकपा (एमाले)को पक्षमा तीन जना जसपाको महन्थ ठाकुर पक्षकासहित ४१ र विपक्षी गठबन्धनमा सभामुखसहित ४२ जना छन् । एमालेको सूर्य चिन्ह लिएर नवलपरासीको निर्वाचन क्षेत्र नं. १ (२)बाट निर्वाचित (हृदयेश त्रिपाठी) समूहका अजय शाही बिरामी परेको भन्दै अनुपस्थित भएपछि सरकारको बजेट पास नहुने भएको हो ।

सत्ता पक्षले लामो समयदेखि सहमतिमै बजेट पारित गर्ने प्रयास गरेपनि अन्तिम समयमा आएर सरकार पक्षको प्रयास सफल हुन नसकेको हो । स्वतन्त्र समूहबाट निर्वाचित शाही यसअघि मन्त्री बन्न नपाएपछि असन्तुष्ट बनेका थिए । प्रदेश सभा बैठकमा बजेट माथिको छलफल सकिएर अहिले सरकारका मन्त्रीहरुले जवाफ दिइरहेका छन् । मन्त्रीहरुको जवाफ सकिएपछि मुख्यमन्त्रीले सम्बोधन गर्नेछन् । त्यसपछि सभामुख पूर्णबहादुर घर्तीले बजेटको आर्थिक वर्ष ०७८/७९ को सेवा र सर्तका लागि लुम्बिनी प्रदेश संचित कोषबाट केही रकम खर्च गर्ने र विनियोजन गर्ने सम्बन्धमा व्यवस्था गर्न बनेको ‘विनियोजन’ विधेयक र प्रदेश सरकारको अर्थसम्बन्धी प्रस्तावलाई कार्यान्वयन गर्न बनेको विधेयक निर्णयार्थ पेश गर्ने कार्य सूची छ ।

सरकारका दुवै विधेयक निर्णयार्थ पेस हुँदा गठबन्धनका सबै प्रदेश सभा सदस्यले विपक्षमा मतदान गर्ने निर्णय भएको नेपाली कांग्रेसका प्रमुख सचेतक फकरुद्धिन खानले बताए । जसपाको उपेन्द्र यादव पक्षले प्रस्तावको विपक्षमा मतदान गर्न आफ्ना सदस्यलाई ह्वीप नै जारी गरेको छ । त्यस्तै माओवादी केन्द्रले पनि विपक्षमा मतदान गर्ने निर्णय गरेकाले बजेट फेल हुने माओवादी केन्द्रका नेता एवं निवर्तमान मन्त्री सुदर्शन बरालले बताए ।

प्रकाशित : असार ३१, २०७८ १६:३९
पूरा पढ्नुहोस्
प्रतिक्रिया
पठाउनुहोस्
×