बुद्ध प्रतिमाको अनावरण- लुम्बिनी - कान्तिपुर समाचार

बुद्ध प्रतिमाको अनावरण

कान्तिपुर संवाददाता

कपिलवस्तु — कनकमुनि र क्रकुछन्द बुद्ध प्रतिमाको निग्लिहवा र गोटिहवामा अनावरण गरिएको छ । प्रदेश सरकारका चार क्याबिनेट मन्त्रीसहित पुगेका लुम्बिनी प्रदेशका मुख्यमन्त्री शंकर पोखरेलले शनिबार बुद्ध प्रतिमाको अनावरण गरेका हुन् । पर्यटकीय आकर्षण थप्न प्रदेश सरकारले उनीहरूकै जन्मस्थलमा बगैंचा–पार्कसहित पूर्ण कदका बुद्ध प्रतिमा स्थापना गरेको हो ।

कपिलवस्तु नगरपालिका–११, अरौराकोटमा कनकमुनि बुद्ध र कपिलवस्तु नगरपालिका–५, गोटिहवामा क्रकुछन्द बुद्धका साढे ६ फिट अग्ला र ३० इन्च चौडाइका प्रतिमा स्थापना गरिएका छन् । रूपन्देहीको तिलोत्तमा नगरपालिका–७, करैयाका मूर्तिकार गोविन्द चौधरीले सात महिना लगाएर बनाएका पित्तलका एक मूर्तिको तौल एक क्विन्टल रहेको छ ।

थेरवादी सम्प्रदायका भिक्षु र महायानी सम्प्रदायका लामाले मंगल पाठ गरेपछि मुख्यमन्त्री पोखरेलले द्वीप प्रज्ज्वलन गरी बौद्ध परम्परा अनुसार प्रतिमा अनावरण गरेका थिए । ‘शाक्यमुनि बुद्धभन्दा अघिका बुद्धका बारेमा धेरैलाई थाहा थिएन,’ प्रदेश शिक्षामन्त्री धर्मबहादुरलाल श्रीवास्तवले भने, ‘यहाँ बनेको प्रतिमा र पार्कले उनीहरूका बारेमा जान्ने र सोधखोज गर्न आउने बढ्ने अनुमान गरेका छौं ।’

ओझेलमा परेको प्राचीन नगरको महत्वलाई उजागर गर्ने भिक्षु महासंघका अध्यक्ष भिक्षु मैत्री महास्थवीरले बताए । ‘यसले शान्ति पर्यटनमा टेवा पुर्‍याउनेछ,’ उनले भने । भद्र कल्पमा जन्मेका कनकमुनि र क्रकुच्छन्द बुद्ध पाँचौं र छैटौं बुद्ध हुन् । शाक्यमुनि सातौं बुद्ध मानिन्छन् ।

प्रकाशित : असार २६, २०७८ १८:४१
प्रतिक्रिया
पठाउनुहोस्

एमाले कार्यदलमा जुटेन सहमति, नेता विष्ट भन्छन्- भोलि सार्थक निष्कर्षमा पुग्‍नेछौं

कान्तिपुर संवाददाता

काठमाडौँ — नेकपा (एमाले) को विवाद समाधानका लागि गठित कार्यदल शुक्रबार भएको भनिएको 'सहमति' लाई अन्तिम रुप दिन असफल भएको छ । 

सिंहदरबारस्थित अर्थमन्त्रालयमा शनिबार एक घण्टाभन्दा बढी समय बसेको कार्यदल बैठकले 'सहमति' लाई अन्तिम निष्कर्षमा पुर्‍याउन नसकेको हो । शुक्रबार बसेको कार्यदल बैठकमा सहमति जुटेको र त्यसलाई शनिबार अन्तिम रुप दिने नेताहरुले दाबी गरेका थिए ।

बैठकपछि कार्यदल सदस्य एवं नेता गोकर्ण विष्टले भोलि सार्थक निष्कर्षमा पुग्ने गरी बैठक सकिएको बताए । 'हामी विगत केही दिनदेखि पार्टी एकताको लागि अनौपचारिक र औपचारिक रूपमा लागिरहेका छौं । पार्टी एकताका समस्या के थिए भन्नेमा लागिरहेका छौं । अन्तिम समयमा आइपुगेका छौं । समस्याको समाधान खोज्ने क्रममा छौं । आज त्यो घोषणा गर्न सकिरहेका छैनौं', नेता विष्टले भने, 'भोलिको दिन एकताको निष्कर्ष सुन्ने दिन हुनेछ ।'

त्यस्तै नेता भीम रावलले छलफलको अन्तिम विन्दुमा रहेको बताउँदै छिट्टै निष्कर्षमा दिने दाबी गरे । 'हामीले विभिन्न विषयमा छलफल गरेका छौं । छलफलको अन्तिम विन्दुमा छौं । सम्भवतः छलफललाई छिट्टै पुरा गरेर निष्कर्षमा पुग्नेछौं ।'

कार्यदलका अर्का सदस्य घनश्याम भूसालले भने केही प्रतिक्रिया नदिई बाहिरिएका थिए ।

कार्यदलमा अध्यक्ष केपी शर्मा ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल छन् भने नेता नेपालको पक्षबाट भीम रावलको नेतृत्वमा घनश्याम भुसाल, सुरेन्द्र पाण्डे, गोकर्ण विष्ट र रघुजी पन्त रहेका छन् ।

प्रकाशित : असार २६, २०७८ १८:३४
पूरा पढ्नुहोस्
प्रतिक्रिया
पठाउनुहोस्
×