राप्ती पुलमा यातायात बन्द

पुल छेउको सडक भत्किएपछि मर्मतका लागि बिहीबारदेखि एक साता यातायात बन्द गरिएको प्रमुख जिल्ला अधिकारी रामबहादुर कुरुम्बाङले बताए । लगातारको वर्षाले बाढी आएपछि मंगलबार एप्रोच सडक भत्किएको थियो ।

नेपालगन्जस्थित पुल डिभिजन कार्यालयले सडक मर्मतको काम गरिरहेको उनले जानकारी दिए । ८ सय ६० मिटर लामो र १० मिटर चौडा पुलको गत माघ १३ मा प्रधानमन्त्री केपी शर्मा ओलीले उद्घाटन गरेका थिए ।

१६ स्पान र १७ पिलर रहेको पुल ९४ करोड लगानीमा निर्माण भएको थियो । यो देशकै दोस्रो लामो मोटर गुड्ने पुल दाबी गरिएको छ । सबैभन्दा लामो पुलका रुपमा बर्दियाको कोठियाघाटस्थित कर्णाली नदी माथिको गेरुवा पुललाई लिइएको छ । उक्त पुल १ हजार १५ मिटर लामो छ ।