राप्ती पुलमा यातायात बन्द- लुम्बिनी - कान्तिपुर समाचार

राप्ती पुलमा यातायात बन्द

दुर्गालाल केसी

दाङ — बाढीले एप्रोच सडक भत्काएपछि राप्ती गाउँपालिका ७ छोड्की सिसहनिया र गढवा गाउँपालिका ६ महदेवा जोड्ने राप्ती पुलमा यातायात बन्द भएको छ ।

बाढीले भत्काएको राप्ती पुलको एप्रोच सडक । तस्बिर : कान्तिपुर ।

पुल छेउको सडक भत्किएपछि मर्मतका लागि बिहीबारदेखि एक साता यातायात बन्द गरिएको प्रमुख जिल्ला अधिकारी रामबहादुर कुरुम्बाङले बताए । लगातारको वर्षाले बाढी आएपछि मंगलबार एप्रोच सडक भत्किएको थियो ।

नेपालगन्जस्थित पुल डिभिजन कार्यालयले सडक मर्मतको काम गरिरहेको उनले जानकारी दिए । ८ सय ६० मिटर लामो र १० मिटर चौडा पुलको गत माघ १३ मा प्रधानमन्त्री केपी शर्मा ओलीले उद्घाटन गरेका थिए ।

१६ स्पान र १७ पिलर रहेको पुल ९४ करोड लगानीमा निर्माण भएको थियो । यो देशकै दोस्रो लामो मोटर गुड्ने पुल दाबी गरिएको छ । सबैभन्दा लामो पुलका रुपमा बर्दियाको कोठियाघाटस्थित कर्णाली नदी माथिको गेरुवा पुललाई लिइएको छ । उक्त पुल १ हजार १५ मिटर लामो छ ।

प्रकाशित : असार २४, २०७८ २२:३०
प्रतिक्रिया
पठाउनुहोस्

घोराहीमा घर भत्किँदा ३ महिने शिशुको मृत्यु

दुर्गालाल केसी

दाङ — लगातारको वर्षाले घोराहीमा घर भत्किँदा तीन महिने शिशुको मृत्यु भएको छ । उनकी आमा र दिदी घाइते भएका छन् ।

घोराही उपमहानगरपालिका १७ क्वाडीमा बिहीबार बिहान ३ बजेतिर घरको गारो भत्किँदा मनीषा चौधरीकी तीन महिनाकी छोरी विन्दु चौधरीको घटनास्थलमै मृत्यु भएको जिल्ला प्रहरी प्रवक्ता डीएसपी मुकुन्द रिजालले बताए।

मनीषा र उनकी ९ वर्षीया छोरी बाटुली चौधरी घाइते भएका छन् । घाइते आमा छोरीको राप्ती स्वास्थ्य विज्ञान प्रतिष्ठानमा घोराहीमा उपचार भइरहेको छ ।

प्रकाशित : असार २४, २०७८ १३:०२
पूरा पढ्नुहोस्
प्रतिक्रिया
पठाउनुहोस्
×