बुटवलमा असार २० गतेदेखि नयाँ शैक्षिक सत्र
बुटवल — कोरोना संक्रमण दर कम भएपछि बुटवल उपमहानगरपालिकाले नयाँ शैक्षिक सत्र सञ्चालनको तयारी थालेको छ । जसअन्तर्गत असार २० गतेदेखि वैकल्पिक माध्यमबाट नयाँ शैक्षिक सत्रका कक्षा सञ्चालन हुनेछन् । त्यसअघि विद्यालयहरुलाई असार १३ गतेसम्म कक्षा १ देखि ९ सम्मका नतिजा प्रकाशन गर्न सूचित गरेको शिक्षा महाशाखा प्रमुख मित्रमणि खनालले बताए ।
शैक्षिक सत्र २०७८ सालको विद्यार्थी भर्ना, वार्षिक नतिजा प्रकाशन भएलगत्तै असार २० गतेदेखि अनिवार्य रुपमा सबै विद्यालयलाई वैकल्पिक विधिबाट शिक्षण–सिकाइ क्रियाकलाप गर्न विद्यालयहरुलाई निर्देशन दिइएको छ ।
सामुदायिक विद्यालयहरुले विद्यार्थी भर्नासँगै पाठ्यपुस्तक समेत उपलब्ध गराउने छन् । संस्थागत विद्यालयहरुलाई भने पाठ्यपुस्तकहरुको सूची उपलब्ध गराउन उपमहाननगरपालिकाले आग्रह गरेको छ ।
प्रकाशित : असार ८, २०७८ १३:५५