विवादले रुपन्देहीका चार पालिकामा खोप कार्यक्रम स्थगित- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

विवादले रुपन्देहीका चार पालिकामा खोप कार्यक्रम स्थगित

माधव ढुंगाना

भैरहवा — कोभिडविरुद्धको खोप लगाउने क्रममा विवाद भएपछि रुपन्देहीको चारवटा पालिकामा बु्धबार खोप कार्यक्रम स्थगित हुन पुगेको छ । रुपन्देहीमा ६२ देखि ६४ वर्ष उमेर समूहका १४ हजार ५५ जनालाई १६ वटा पालिका मार्फत् ६९ वटा खोप केन्द्रमा मंगलबार र बुधबार चीन सरकारले अनुदानमा उपलब्ध गराएको भेरोसेल खोप लगाउने कार्यक्रम तय भएको थियो ।

सुरुको दिनमै खोप लगाउन सुरु गर्दा लक्षित उमेर भन्दा कम उमेरका व्यक्तिलाई खोप लगाइएपछिको उत्पन्न विवादले रुपन्देहीको सिद्धार्थनगर नगरपालिका, तिलोत्तमा नगरपालिका, ओमसतिया गाउपालिका र मर्चवारी गाउँपालिकामा बुधबारको खोप कार्यक्रम स्थगित हुन पुगेको हो ।

खोप कार्यक्रम स्थगित हुनुको बारेमा सम्बन्धित पालिकाका स्वास्थ्य प्रमुखले यथार्थ जानकारी दिएनन् । गोलमोटल र झारा टार्ने जवाफ दिँदै तर्किने गरेका छन् । केही ठाउँमा अत्याधिक भिड र आवश्यकता अनुरुपको खोप नहुनु र केही स्थानमा स्थानिय जनप्रतिनिधिको स्वार्थ बाझिदा खोप कार्यक्रम विवादित हुन पुगेको हो ।

केही जनप्रतिनिधिले आफन्त, पार्टी निटककालाई खोपमा प्राथमिकता दिएपछि विवाद जारी छ । रुपन्देहीका प्रमुख जिल्ला अधिकारी अस्मान तामाङले केही स्थानीय तहका स्वास्थ्य चौकीमा विवाद हुदा खोप कार्यक्रम स्थगित भएको बताए ।

ओमसतिया गाउँपालिका एकजना वडा अध्यक्षले आफन्त र पार्टी कार्यकर्तालाई तोकिएको सरकारी मापदण्ड विपरीत खोप लगाउन दबाब दिएपछि त्यहाँ विवाद भएको हो । मापदण्ड भन्दा बाहिर गएर खोप कार्यक्रममा सहभागी गराएपछि जिल्ला प्रशासनले उनलाई स्पष्टिकरण सोधेको छ । ‘उनले तोकिएको भन्दा आफूखुशीकालाई खोप लगाउन दिएको जानकारीमा आएपछि हामीले स्पष्टिकरण सोधेका छौं,’ तामाङले भने ।

सिद्धार्थनगरमापनि आवश्यकता भन्दा कम खोप आएको र केही जनप्रतिनिधिले आफन्त र कार्यकर्तालाई बढी प्राथमिकता दिएपछि विवाद हुँदा खोप लगाउनै स्थगित गरिएको प्रशासनले जनाएको छ । प्रजिअ तामाङले विवादका विषयमा केन्द्र र प्रदेश सरकारलाई जानकारी गराइएको र सहजीकरण प्रयास भइरहेको बताए ।

सिद्धार्थनगर नगरपालिकाका स्वास्थ्य शाखा प्रमुख पिताम्बर पाठकले खोप कार्यक्रम स्थगित हुनुको वास्तविक कुरा बताउन चाहेनन् । सिद्धार्थनगरमा स्वास्थ्य कार्यालयबाट मंगलबारका लागि मात्रै खोप लागाउने कार्यक्रम रहेको र ७ सय ९७ जनाले लगाएपछि बाँकी भ्याक्सिन स्वास्थ्य कार्यालयमै पठाइएको बताए । सिद्धार्थनगरमा १ हजार ४५ जनालाई खोप लगाउने लक्ष्य थियो । ‘घाममा खटेर काम गर्दागर्दै र लक्षित समूहलाइ सेवा दिने भन्दा भन्दै त्यस्तै भयो, म यहाँभन्दा धेरै कुरा गर्दिन्न,’पाठकले भने, ‘जो जस्ले लगाएपनि नेपाली दाजुभाइले नै लगाए होलान । किन यसबारेमा सोधखोज गरेको ?’ लक्षित समूहलाइ लगाउने भन्दा भन्दै त्यस्तै भएको भन्ने बारेमा उनले थप खुलाउन चाहेनन् ।

रुपन्देहीका स्वास्थ्य कार्यालय प्रमुख डा.राजेन्द्र गिरीले आवश्यकता भन्दा कम परिमाणमा खोप आउनु र कतिपय ठाउमा लक्षित उमेर भन्दा कम उमेरकाले खोप लगाएपछि विवाद भएको बताए ।

प्रकाशित : जेष्ठ २६, २०७८ १४:४६
प्रतिक्रिया
पठाउनुहोस्

निषेधाज्ञाले मजदुरी छुटेपछि चेपाङलाई छाक टार्नै सकस

प्रताप विष्ट

हेटौंडा — राक्सिराङ गाउँपालिका–८ पाम्बुङका ८ वर्षीय सुरेश चेपाङ बिहान सबेरै उठेर कन्दमूल खोज्न घरनजिकैको जंगल जान्छन् । घरमा बाबु छैनन् । आमाले भाइबहिनी हेर्नुपर्छ ।उनीचाहिँ आँखा मिच्दै जाबी भिरेर जंगलतिर लाग्छन् । उनका २ दुई बहिनी र दुई भाइ छन् । 

जंगलबाट टिपेर ल्याएको गिट्ठा पकाउने तयारी गर्दै राक्सिराङ गाउँपालिकाको चेपाङ परिवार ।

उनैले ल्याएको कन्दमूल र टाँकी उसिनेर आमा र भाइबहिनीले पेट भर्दै आएका छन् । सुरेश जंगलबाट फर्केपछि आमा देवीटारतिर काम खोज्न जान्छिन् । ज्यालाबनीको काम पाए बेलुकीका निम्ति पिठो किनेर ल्याउँछिन् । नत्र गिट्ठाकै भर । सुरेश पाम्बुङस्थित नवजीवन प्राविमा २ कक्षामा पढ्छन् । अहिले निषेधाज्ञाका कारण स्कुल बन्द छ । उनका बाबुको चिउरी टिप्न रुखमा चढ्दा लडेर दुई वर्षअघि मृत्यु भएको थियो । आफ्नो बारीको उत्पादनले तीन महिना पनि खान पुग्दैन ।

सुरेशका छिमेकी नानी चेपाङ र मैया चेपाङ पनि बिहान सधैं कन्दमूल खोज्न जंगल जान्छन् । नानी र मैयाँ स्थानीय विद्यालयमा एक कक्षामा अध्ययन गर्छन् । खुट्टामा चप्पल पनि छैन । कन्दमूल खोज्न जाँदा काँडा बिझ्छन् ।

पाम्बुङका मात्र होइन, पाङथलीका बालबालिका पनि कन्दमूल खोज्न जंगल जाने गरेका छन् । ‘जंगलबाट गिट्ठा, भ्याकुर, चुइया, टाँकीको साग नल्याए उनीहरुको छाक नै टर्दैन,’ पाङथलीस्थित प्राथमिक विद्यालयका प्रअ कविराज तितुङले भने, ‘स्कुलमा पढ्न आउने अधिकांश विद्यार्थी अहिले कन्दमूल खोज्न जंगलमा जाने गरेका छन् ।’

गत वर्ष रासायनिक मलको अभावमा अन्न उत्पादन नभएपछि हाहाकार भएको वडा सदस्य राजु चेपाङले बताए । ‘साना–ठूला, पढ्ने, नपढ्ने सबै अहिले जंगल गएर कन्दमूल खोजेर ल्याउने गरेका छन्,’ उनले भने ।

पाम्बुङ र पाङथलीमा ४५ घर चेपाङहरू छन् । सबैका घरमा खाद्यान्न अभाव छ । काम गर्न भरतपुर, हेटौंडा, मनहरी, लोथर गएकाहरू पनि निषेधाज्ञाले गर्दा घर फर्केका छन् । ‘सबैका घरमा खानेमुखहरू बढेको छ तर अन्नको दाना छैन,’ स्थानीय मंगलबहादुर चेपाङले भने, ‘ज्यालाबनी गर्ने ठाउँ सबै बन्द भएको छ, त्यसैले कन्दमूल खाएर पेट भर्दै आएका छौं ।’

यस वर्ष भोकमरीको समस्या झन् जटिल बनेको वडा सदस्य चेपाङले बताए । ‘गाउँको समस्या गाउँपालिकाका अध्यक्ष र उपाध्यक्षले जानकारी गराइसकेको छु, हेरौं कतैबाट सहयोग जुट्छ कि ?,’ उनले भने । आफ्नो उत्पादनले यस क्षेत्रका चेपाङ परिवारलाई वर्ष दिनमा ३ महिनामात्र खान पुग्छ । उनीहरू ९ महिना ज्यालामजदुरी गर्छन् । जंगली कन्दमूल खाएर प्राण धान्छन् ।

मनहरी बजारबाट ५ घण्टा हिँडेर पुगिने पाम्बुङ, पाङथली, देवीटार, मैसिराङमा खाद्यान्नको समस्या छ । ‘अहिले सिंगो राक्सिराङ गाउँपालिकामा खाद्यान्नको अभाव छ,’ गाउँपालिका अध्यक्ष राजकुमार मल्लले भने, ‘एकातिर रोगले चपटेको छ, अर्कोतिर भोकमरी छ ।’

कोरोना संक्रमण नियन्त्रण गर्न गाउँपालिकाले गाउँमै आइसोलेसन र कोभिड अस्पताल निर्माण गरेको छ । अर्कातिर भोकमरी समस्या टार्न दाताहरुसँग खाद्यान्न सहयोगको निम्ति अनुरोध गर्दै आएको गाउँपालिकाले जनाएको छ ।

प्रकाशित : जेष्ठ २६, २०७८ १४:३३
पूरा पढ्नुहोस्
प्रतिक्रिया
पठाउनुहोस्
×