पाल्पामा ४ हजारलाई खोप लगाइँदै

यहाँको तानसेन र रामपुर नगरपालिकाका साथै माथागढी गाउँपालिकाले जेठ २७ गतेसम्म तीन दिन खोप लगाउनेछन् । तिनाउ, निस्दी, पूर्वखोला, रम्भा, बगनासकाली, रिब्दीकोट, रैनादेवीछहरा गाउँपालिकाले मंगलबार र बुधबार खोप लगाउनेछन् ।

खोपका लागि १० स्थानीय तहले तथ्यांक संकलन गरी स्वास्थ्य कार्यालयमा पठाएका छन् । यसअघि भने स्वास्थ्य मन्त्रालय र जिल्लास्थित स्वास्थ्य कार्यालयले ६० देखि ६४ वर्ष उमेर समूहको तथ्यांक संकलन गरेको थियो । जिल्लामा ७० वर्षदेखि माथिकाको पनि छुट्टै तथ्यांक संकलन भएको छ । तर, ५० प्रतिशत मात्र खोप आएकाले जिल्ला संकट व्यवस्थापन केन्द्रको निर्णयअनुसार खोप अपुग हुने भएपछि ६२ देखि ६४ वर्ष उमेर समूहकालाई मात्र लगाउने निर्णय भएको स्वास्थ्य कार्यालयका सूचना अधिकारी पन्थीले बताए ।

यस्तै, बर्दियामा पूर्वतयारी नहुँदा लक्षित उमेर समूहलाई बिहीबारबाट खोप लगाइने भएको छ । बुधबार मन्त्रालयबाट जानकारी आएपछि तालिका परिवर्तन गरिएको स्वास्थ्य कार्यालयका अधिकारीले बताए । ६२ देखि ६४ वर्ष उमेर समूहका लागि पनि पर्याप्त खोप आएको छैन । जिल्लामा १२ हजार ९ सय ९३ जना उक्त उमेर समूहका नागरिक रहेको अनुमान छ । सरकारले ६ हजार ४ सय ८५ जनाका लागि मात्र खोप उपलब्ध गराएको स्वास्थ्य प्रमुख गोकर्ण गिरीले बताए ।