महामारीका बीच बन्यो सियारीमा स्वाथ्यचौकी- लुम्बिनी - कान्तिपुर समाचार

महामारीका बीच बन्यो सियारीमा स्वाथ्यचौकी

माधव ढुंगाना, अमृता अनमोल

भैरहवा,बुटवल — कोरोना संक्रमीतको उपचार प्रभावीत बनेपछि रुपन्देहीको सियारी गाउँपालिकामा स्वास्थ्य चौकी निर्माण गरिएको छ । महामारीकाबीच अर्घाखाँची सिमेन्ट प्रालिले सियारी गाउँपालिका–२ मैनहियामा  स्वास्थ्य चौकी निर्माण गरिदिएको हो । ७० लाख लागतमा निर्माण भएको स्वास्थ्य चौकी बुधबार गाउँपालिकालाई हस्तान्तरण गरेको छ ।

अर्घाखाँची सिमेन्ट उद्योग परिसर नजिकै निर्माण सम्पन्न उक्त स्वास्थ्य चौकीको बुधबार लुम्बिनी प्रदेशका स्वास्थ्य मन्त्री भोजप्रसाद श्रेष्ठले उद्घाटन गरेका थिए । उद्योगले आफ्नो सामाजिक उत्तरदायित्व कार्यक्रम अन्तर्गत स्वास्थ्य चौकीको निर्माण गरेको हो । उद्योगका प्रबन्ध निर्देशक राजेशकुमार अग्रवालले सियारी गाउँपालिकाका अध्यक्ष अयोध्या थारुलाई चाबी उपलब्ध गराएर स्वास्थ्य चौकीको हस्तान्तरण गरेका थिए ।

उद्योगले सम्झौता भएको १ सय २० दिनमा सरकारी मापदण्ड र नक्साअनुसार स्वास्थ्य चौकी बनाएको हो । उद्योगले स्वास्थ्य चौकीमा तत्काललाई १० शय्या र १० वटा अक्सिजन सिलिन्डरसमेत उपलब्ध गराएको उद्योगका प्रबन्ध निर्देशक अग्रवालले बताए । ‘गाउँपालिकाले आवश्यकता महसुस गरेमा तेस्रो तलासम्मको भवन बनाउन सघाउने छौं,’ उनले भने ।

२ हजार २ सय स्क्वायर फिट क्षेत्रफलमा करिव ७० लाख रुपैयाँको लागतमा निर्माण गरिएको एकतले स्वास्थ्य चौकीमा ६ वटा कोठा, ट्वाइलेट र बाथरुम छन् । स्वास्थ्य मापदण्ड अनुसार भवनमा १५ बेडसम्म राखेर बिरामीको उपचार गर्न मिल्ने गाउँपालिकाले जनाएको छ । त्यसअनुसार बिहीबारबाट १५ शय्याको कोरोना आइसोलेसन सेन्टर बनाउने अध्यक्ष अयोध्याप्रसाद थारुले बताए । ‘यसअघि अमवामा रहेको स्वास्थ्य चौकीमा ११ बेडको अक्सिजनसहितको आइसोलेसन चलाएका छौं । संक्रमीतहरु थपिदै छन्,’ उनले भने ‘बिहीबारदेखि यसलाई पनि आइसोलेसन सेन्टरमा रुपान्तर गर्नेछौं ।’

अर्घाखाँची सिमेन्टले कोरोनाको पहिलो लहरमा लुम्बिनी प्रदेश सरकारलाई ५० लाख रुपैयाँ हस्तान्तरण गरेको थियो । अहिले विभिन्न क्षेत्रमा २ लाख गोटा के ९५ माक्स लगायत सुरक्षा सामाग्री वितरण गरेको छ ।

प्रकाशित : जेष्ठ १२, २०७८ १७:१५
प्रतिक्रिया
पठाउनुहोस्

चिनियाँ समकक्षी सीलाई राष्ट्रपति भण्डारीको आग्रह,‘चीनबाट खोप खरिद गर्नको लागि सहजीकरण गरिदिनुहोस्’

कान्तिपुर संवाददाता

काठमाडौँ — राष्ट्रपति विद्यादेवी भण्डारीले चिनियाँ राष्ट्रपति सी चिनफिनलाई नेपाललाई खोप खरिदमा सहजीकरण गरिदिनका लागि आग्रह गरेकी छन् । 

भण्डारीले नेपालमा कोरोना भाइरस रोकथाम र नियन्त्रणको लागि चीन सरकारले सहयोग गरेकोमा धन्यवाद दिँदै अहिले नेपाललाई थप खोप आवश्यक रहेकोले खरिदको लागि सहजीकरण गरिदिन अनुरोध गरेकी हुन् ।

राष्ट्रपति भण्डारीका सञ्चार विज्ञ टीका ढकालका अनुसार भण्डारी र सी बीच बुधबार दिउँसो करिब ४० मिनेट कुरा भएको थियो । ‘अहिले नेपाली जनताको जीवन बनाउनको लागि आवश्यक छ । अहिलेको अवस्थामा कोभिड–१९ खोपको नेपाललाई आवश्यक छ । नेपाल खोप खरिद गर्न चाहन्छ । खोप खरिद गर्नको लागि सहजीकरण गरिदिन हुन अनुरोध गर्दछु,’ राष्ट्रपति भण्डारीको संवादलाई उदृत गर्दै सञ्चार विज्ञ ढकालले भने ।

जवाफमा चिनियाँ राष्ट्रपति सीले नेपाल चीनको एक असल र घनिष्ठ मित्र भएको उल्लेख गर्दै नेपाललाई सधै सहयोग गर्ने प्रतिबद्धता व्यक्त गरेको ढकालले जानकारी दिए ।

चीनले नेपाललाई कोरोना भाइरस रोकथाम र नियन्त्रणको लागि हालसम्म स्वास्थ्य सामग्रीसहित ८ लाख सिनोफार्मको भेरोसेल खोप अनुदान सहयोग गरेको छ ।

राष्ट्रपति भण्डारीले बुधबारै भारतीय राष्ट्रपति रामनाथ कोविन्दलाई पनि पत्र पठाएर नेपाललाई खोप सहयोग गर्नको लागि अनुरोध गरेकी थिइन् ।


प्रकाशित : जेष्ठ १२, २०७८ १७:१३
पूरा पढ्नुहोस्
प्रतिक्रिया
पठाउनुहोस्
×