पाल्पामा निषेधाज्ञा जेठ १५ गतेसम्म लम्बियो- लुम्बिनी - कान्तिपुर समाचार

पाल्पामा निषेधाज्ञा जेठ १५ गतेसम्म लम्बियो

माधव अर्याल

पाल्पा — जिल्ला प्रशासन कार्यालय पाल्पाले गत वैशाख १८ गतेदेखि लागू गरेको निषेधाज्ञा आगामी जेठ १५ गतेसम्मका लागि थप गरेको छ । सोमबार जिल्ला प्रशासन कार्यालयमा बसेको जिलला संकट व्यवस्थापन समितिको बैठकले निषेधाज्ञालाई निरन्तरता दिने निर्णय गरेको हो । 

निषेधाज्ञामा सुनसान पाल्पाको तानसेनस्थित लहरेपिपल क्याम्पसमार्ग । तस्बिर : माधव अर्याल/कान्तिपुर

कोरोना संक्रमित थपिने दर वृद्धि हुँदै गएकाले निषेधाज्ञालाई पनि निरन्तरता दिएको जिल्ला कोभिड संकट व्यवस्थापन केन्द्रका संयोजक तथा प्रमुख जिल्ला अधिकारी योगेन्द्रप्रसाद पाण्डेयले जानकारी दिए । अहिलेसम्म संक्रमितको संख्या हेर्दा निषेधाज्ञा थप गर्नुपर्ने अवस्था आएको उनले बताए । निषेधाज्ञा अवधिमा बैंक तथा वित्तीय संस्था बन्द रहने छन् । हिँडडुल नरोकिएर समस्या बढाइरहेकाले सशस्त्र, जनपथ, नेपाली सेनाको सहयोगमा थप निगरानी र नियमनलाई कडाइ गरिएको छ । खाद्य पसल, दूध, तरकारीको पसललाई ७ देखि ९ बजेसम्म मात्र खोल्ने निर्णय गरेको छ ।

जिल्लामा सोमबार थप २ सय २१ जनामा कोरोना भाइरसको संक्रमण पुष्टि भएको छ । २ सय ९० पीसीआर परीक्षणमा १ सय ४२ जना र १ सय ४६ एन्टिजेन परीक्षणमा ७९ जनामा पुष्टि भएको हो ।

स्वास्थ्य कार्यालयका सूचना अधिकारी ओमप्रकाश पन्थीले यो संख्या दोस्रो लहरपछि एकैदिनमा पहिचान भएका सबैभन्दा धेरै संक्रमित भएको बताए । जिल्लामा सक्रिय संक्रमितको संख्या १ हजार ५सय ६५ रहेको छ । हालसम्म पाल्पामा ६७ संक्रमितको मृत्यु भएको छ । दोस्रो लहरपछि मात्रै २९ जनाको मृत्यु भएको छ । जिल्लामा स्थानीय तह र अस्पतालमा गरी कोभिड बिरामीका लागि २ सय १० आइसोलेसन बेड रहेको छ ।

प्रकाशित : जेष्ठ ३, २०७८ १८:३१
प्रतिक्रिया
पठाउनुहोस्

अक्सिजनको हाहाकार हुनुको दोषी सीसीएमसीको निर्णय हो : एमाले सांसद श्रेष्ठ

कान्तिपुर संवाददाता

काठमाडौँ — सरकारको नेतृत्व गरिरहेको दल नेकपा (एमाले)का सांसद जीवनराम श्रेष्ठले कोरोना संक्रमित राखिएका अस्पतालहरूमा पछिल्लो हप्ता भएको अक्सिजनको हाहाकारको दोषी उपप्रधानमन्त्री ईश्वर पोखरेल नेतृत्वको कोभिड–१९ संकट व्यवस्थापन केन्द्र (सीसीएमसी) को एक निर्णय भएको बताएका छन् । 

एमाले सांसद जीवनराम श्रेष्ठ ।

प्रतिनिधिसभा अन्तर्गतको शिक्षा तथा स्वास्थ्य समितिको सोमबारको बैठकमा सांसद श्रेष्ठले सीसीएमसीले अस्पतालहरूलाई कोटा तोक्ने निर्णय गरेर अस्पतालहरूमा अक्सिजनको हाहाकार अवस्था ल्याएको बताएका हुन् ।

'अहिले अस्पतालमा अक्सिनजको हाहाकार हुनुको दोषी सीसीएमसीको निर्णय छ,' समितिले कोरोनासम्बन्धमा अध्ययन र अनुगमन गर्न गठित उपसमितिका संयोजकसमेत रहेका सांसद श्रेष्ठले भने, 'सीसीएमसीले फलानो अस्पतालाई यति र अर्कोलाई यति भनेर जुन कोटा तोक्ने काम गर्‍यो त्यसपछि यो हाहाकार सुरु भएको हो । सीसीएमसीले कुन अक्सिजन प्लान्टमा कति उत्पादन हुन्छ भन्ने पनि नहेरी त्यस्तो निर्णय गरियो । कति ठाउँमा अक्सिजन प्लान्टको क्षमताभन्दा बढी कोटा तोकिदियो ।'

यसअघि नियमित रूपमा अक्सिजन लिइरहेका अस्पताललाई अर्कै अक्सिजन प्लान्ट तोकिदिनाले पनि समस्या आएको सांसद श्रेष्ठको भनाइ थियो । त्यस कारणले अस्पतालले अक्सिजन प्राप्त गर्न नसकेको र अक्सिजन आपूर्ति प्रणाली भत्किँदा पनि हाहाकारको अवस्था आई बिरामीको मृत्यु भएको उनले बताए ।

उपप्रधानमन्त्री पोखरेल नेतृत्वको सीसीएमसी भीरमा फलेको फर्सीजस्तो भएको भन्दै सांसद श्रेष्ठले कोरोना नियन्त्रणको जिम्मेवारी प्रधानमन्त्री केपी शर्मा ओलीले लिनुपर्ने पनि माग गरेका छन् ।

स्वास्थ्य मन्त्रालयका प्रमुख विशेषज्ञ डा. रोशन पोखरेलले हाल स्वास्थ्य तथा जनसंख्या मन्त्रालयले अक्सिजनको कोटा नियन्त्रणको जिम्मेवारी फिर्ता पाएको बताए । उनले अहिले काठमाडौं उपत्यकामा मागको आधा मात्रै अक्सिजन उपलब्ध भइरहेको बताए । आगामी दिनमा अक्सिजन प्लान्ट तयार गरेर भए पनि त्यसको आवश्यकता पूर्ति गर्नुपर्ने उनले बताए ।

प्रकाशित : जेष्ठ ३, २०७८ १८:२८
पूरा पढ्नुहोस्
प्रतिक्रिया
पठाउनुहोस्
×