सियारीमा काेराेना संक्रमित बोक्न गाउँपालिका अध्यक्ष र उपाध्यक्षको गाडी
बुटवल — काेराेना संक्रमितलाई बोक्न एम्बुलेन्स नपाएपछि रुपन्देहीको सियारी गाउँपालिकाले अध्यक्ष र उपाध्यक्षले प्रयोग गर्ने गाडीमा संक्रमीत बोक्न सुरु गरेका छन् ।
कोरोना संक्रमितलाई अस्पताल एवं आइसोलेसन केन्द्र पुर्याउन एम्बुलेन्स अभाव भएपछि बिहीबारदेखि गाउँपालिकाका अध्यक्ष अयोध्या थारू र उपाध्यक्ष अमृता गुरुङले प्रयोग गर्दै आएको लु १ झ ३७७ र लु १ झ ५०४ नम्बर सवारी साधनलाई कोरोना संक्रमित बिरामी बोक्न प्रयोग गरिएको हो ।
उपाध्यक्ष अमृता गुरुङले कोरोना संक्रमितलाई छिटो छरितो सेवा प्रवाह गर्ने उद्देश्यले आफ्ना गाडी कोरोना संक्रमित बोक्न प्रयोग गर्ने निर्णय गरेको बताइन् ।
यसअघि रुपन्देहीको तिलोत्तमा नगरपालिकाले मेयर र उपमेयरको गाडी बिरामी बोक्न दिने निर्णय गरेका थिए ।
प्रकाशित : वैशाख २३, २०७८ १४:४८प्रतिक्रिया