बुटवलमा सुरु भयो अक्सिजन बैंक- लुम्बिनी - कान्तिपुर समाचार

बुटवलमा सुरु भयो अक्सिजन बैंक

सन्जु पौडेल

तिलोत्तमा — रुपन्देहीको बुटवल उपमहानगरपालिकाले मंगलबारदेखि अक्सिजन बैंकको सुरुवात गरेको छ । उपमहानगरभित्र होम आइसोलेसन, होटल आइसोलेसन तथा उपमहानगरको संस्थागत आइसोलेसनमा बसेका कोभिड संक्रमितलाई अक्सिजन आवश्यक परेमा तत्काल स्वास्थ्यकर्मीसहितको टोलीले अक्सिजन पुर्‍याउने गरी उपमहानगरमा अक्सिजन बैंक सेवा शुभारम्भ गरिएको उपमहानगरका जनस्वास्थ्य महाशाखा प्रमुख मित्रमणि खनालले बताए । 

'अहिले पहिलो लटमा १ सय वटा सिलिण्डर खरिद गरेका छौं,' उनले भने,'खपतको आधारमा बढाउने, रिफिल गर्ने र सेटअप गर्नेगरी थालनी भएको हो ।' पहिलो चरणमा १० लाख रुपैयाँ खर्च गरिएको भन्दै उनले अक्सिजन रिफिलमा लायन्स क्लब एरिया फोरले सहयोग गर्ने बताए ।

अक्सिजन बैंक बिरामीसम्म पुर्‍याउन, जडान र रेखदेखमा उपमहानगरका ८ शहरी स्वास्थ्य केन्द्रका स्वास्थ्यकर्मी र ८ उपमहानगरले थप गरी खटाएका कर्मचरीले बैंक अन्तर्गत काम गर्ने उनले जनाए ।

प्रकाशित : वैशाख २१, २०७८ १५:१६
प्रतिक्रिया
पठाउनुहोस्

उच्च ज्वरोले सर्लाहीको मिर्जापुरमा ४ को मृत्यु

ओमप्रकाश ठाकुर

सर्लाही — सर्लाहीको दक्षिणी क्षेत्रमा पर्ने बलरा नगरपालिकामा कोरोनासँग मिल्दोजुल्दो लक्षण भएका चार जनाको मृत्यु भएको छ । भारतसँगको सीमा जोडिएको सर्लाहीको बलरा नगरपालिका–६ मिर्जापुरमा शनिबार र आइतबार गरी दुई दिनमा उच्च ज्वरोले चार जनाको ज्यान गएको हो ।

मिर्जापुरका ८० वर्ष भन्दामाथिका दुई वृद्ध र ४०/४५ वर्षका दुई पुरुषको उच्च ज्वरोका कारण ज्यान गएको नगरपालिकाका प्रमुख अभयकुमार सिंहले बताए । चारजना मध्ये तीन जनाको गाउँमै र एकजनाको वीरगन्जमा उपचारको क्रममा ज्यान गएको मेयर सिंहले बताए । मेयर सिंहका अनुसार उच्च ज्वरो लागेर घरमै थलिएका तीनजनाको आइतबार ज्यान गएको हो । अर्का एकजनाको सोमबार वीरगन्जमा उपचारको क्रममा ज्यान गएको हो ।

नगरका विभिन्न बस्तीमा कोरोनासँग मिल्दोजुल्दो लक्षण भएका सयौंको संख्यामा बिरामीहरु घरमा बसिरहेको मेयर सिंहको भनाइ छ । ‘उच्च ज्वरो लागेर दुई दिनमा चारजनाको ज्यान गएको छ, कोरोनाको लक्षण भएका सयौं अझै गाउँमै छन्,’ उनले भने, ‘कोरोनाको संक्रमण समुदायमा फैलिसकिएको अनुमान छ ।’

मृतक सबै गाउँमै बसिरहेका थिए । भारतमा रोजगारीको क्रममा मृतक परिवारबाट कोही पनि नगएको भएपनि उनीहरुको प्रमुख बजार भारतको बसबिट्टा रहेको छ । सीमा बन्द भएपनि यस क्षेत्रका नागरिक भारतीय बजार पुग्ने गरेका थिए । सदरमुकाम मलंगवाबाट ३३ किलोमिटर पश्चिम पर्ने बलरा नेपाली बजारको पहुँचबाट टाढा छ । जसकारण यस क्षेत्रका नागरिकलाई भरतीय बजारको भर पर्नुपर्ने बाध्यता छ ।

मिर्जापुरमा उच्च ज्वरोका कारण चारजनाको मृत्यु भएपछि जिल्ला स्वास्थ्य कार्यालयले सोमबार एक टोली पठाएको थियो । मृत्यु भएका व्यक्तिको सम्पर्कमा आएका २९ जनाको जाँच गर्दा १० जनामा कोरोना पोजिटिभ देखिएको कार्यालयका प्रमुख श्रवणकुमार नायकले बताए । उनले मंगलबार पनि एक टोली मिर्जापुरतर्फ गएको जानकारी दिए ।

‘सोमबार मात्र स्वास्थ्यका एक टोली बलराको मिर्जापुर गएको थियो, त्यहाँ मृतक तीनजनाको सम्पर्कमा आएका २९ जनाको स्वाब संकलन गरेर जाँच गर्दा १० जनामा पोजिटिभ पाएको छ, उनीहरुमा समान्य लक्षण पनि देखा पर्न थालेको छ,’ उनले भने, ‘सोमबार थप एकजनाको मृत्यु भएपश्चात स्वास्थ्य कार्यालयबाट थप एक टोली पठाएका छौं ।’

प्रकाशित : वैशाख २१, २०७८ १४:२६
पूरा पढ्नुहोस्
प्रतिक्रिया
पठाउनुहोस्
×