संक्रमित सबै होम आइसोलेसनमा, अक्सिजन छैन- लुम्बिनी - कान्तिपुर समाचार

संक्रमित सबै होम आइसोलेसनमा, अक्सिजन छैन

काशीराम डाँगी

रोल्पा — रोल्पा सदरमुकाम लिबाङदेखि सुदूरपश्चिम सीमामा अवस्थित गंगादेव गाउँपालिकाका जनप्रतिनिधि र कर्मचारीसहित एकैपटक ४५ जनामा केही दिनअघि कोरोना संक्रमण पुष्टि भयो । न अस्पताल, न अक्सिजनको व्यवस्था । संक्रमितको संख्या ह्वात्तै बढेपछि स्थानीय त्रसित बनेका छन् ।

यति धेरै संक्रमित भएको गाउँमा अक्सिजन आवश्यक परे के गर्ने ? यसको जवाफ कसैसँग छैन । जनप्रतिनिधि, स्वास्थ्यकर्मी र सरोकारवालाको आशा छ– कसैलाई गम्भीर समस्या नआओस् । आइहालेमा छिमेकी जिल्लाका अस्पतालमा पुर्‍याउनुको विकल्प छैन । रोल्पामा एउटा मात्र अस्पताल छ । १५ बेडको उक्त अस्पतालमा मुस्किलले १२ जना बिरामीलाई समेत अक्सिजन उपलब्ध गराउन सकिने अवस्था छैन । त्यसैले गम्भीर खालका बिरामीलाई दाङ, नेपालगञ्ज या बुटवल–भैरहवाका अस्पतालमा पुर्‍याउनु एक मात्रै विकल्प हो । तर त्यहाँ पुर्‍याइएका बिरामीले पनि बेड पाउने सम्भावना निकै कम छ ।

गाउँपालिकाका अध्यक्ष वीरबहादुर खत्रीले भने, ‘संक्रमितलाई सामान्य ज्वरो, रुघाखोकी र श्वासप्रश्वासमा समस्या देखिएको छ । तीमध्ये केहीलाई कुनै पनि लक्षण देखिएको छैन ।’ एक साताअघि आशंकाको आधारमा ४३ जनाको पीसीआर परीक्षण गर्दा ४२ जनामा कोरोना संक्रमण पुष्टि भएको थियो ।

सबै संक्रमितलाई होम आइसोलेसनमा राखेको अध्यक्ष खत्रीले बताए । उनले भने, ‘सबैलाई स्वास्थ्यको मापदण्ड पालना गराउन स्वास्थ्यकर्मी मेहरमान वलीको संयोजकत्वमा स्वास्थ्य सहयोग समिति गठन गरेका छौं ।’ उक्त समितिले जिल्ला स्वास्थ्य, जिल्ला कोभिड–१९ संकट व्यवस्थापन केन्द्र (डीसीसीएमसी) लगायतसँग सम्पर्क र समन्वय गर्ने जिम्मेवारी पाएको छ । गम्भीर स्वास्थ्य समस्या देखिएमा साबिकको गाविस भवनमा निर्माण गरिएका १० बेडको अक्सिजनरहित आइसोलेसन केन्द्रमा लैजाने र थप गम्भीर बिरामी भएमा जिल्ला अस्पताल रेउघामा वा छिमेकी जिल्लाका कोभिड अस्पतालमा लैजाने व्यवस्था मिलाइएको छ ।

गंगादेवमा शंकास्पद कम्तिमा एक सय बढीको पीसीआर परीक्षण गर्ने गाउँपालिकाको योजना छ । कर्मचारी र जनप्रतिनिधिको सम्पर्कमा आएका उपभोक्ता समितिका पदाधिकारी, होटल व्यवसायी, शिक्षक र उनीहरुका परिवारलाई लक्षित गरेर पीसीआर परीक्षण गर्न प्राथमिकता दिने योजना रहेको उनले बताए ।

तर जिल्ला स्वास्थ्यले १५ वटा एन्टिजेन किट मात्रै पठाएको छ । स्वाब परीक्षण गर्ने भीटीएम वा एन्टिजेन किट पर्याप्त मात्रामा नभएकाले शंकास्पद व्यक्तिहरुको अवस्था परीक्षण गर्न ढिलाइ भएको वडा नं ५ का अध्यक्ष मानबहादुर डाँगीले बताए ।

संक्रमितमध्ये ५/६ जनाको परिवारका सबै सदस्य संक्रमित छन् । गंगादेवका स्वास्थ्य विभाग संयोजक नै कोरोना संक्रमित भएपछि शंकास्पद संक्रमित पहिचान गर्न थप समस्या देखिएको छ । संक्रमितमध्ये गाउँपालिकाकी उपाध्यक्ष, एकजना वडा अध्यक्ष र आईटी विभागका कर्मचारीमा गम्भीर लक्षण देखिएको अध्यक्ष खत्रीले बताए । उक्त गाउँपालिकालाई गत शुक्रबारदेखि सिल गरिएको छ ।

जिल्ला जनस्वाथ्य प्रमुख नोखराज पोखरेलले गंगादेवमा एकैपटक बढी जनामा कोरोना संक्रमण देखिएपछि परीक्षण र कन्ट्याक्ट ट्रेसिङमा ध्यान दिएको बताए । ‘जुनजुन स्थानमा संक्रमण पुष्टि भएको छ, त्यस क्षेत्र आसपासमा पम्पर्कमा आएकाको पनि स्वाब परीक्षण गर्नुपर्ने हुन्छ’ पोखरेलले भने, ‘संक्रमितको सम्पर्कमा आएकाको पहिचान गरेर उनीहरुको पीसीआर गर्ने योजना छ ।’ उनका अनुसार शंकास्पदहरुको सूची तयार भइरहेको छ । डीसीसीएमसीमार्फत् सबैको तत्काल पीसीआर गर्ने निर्णय भएको उनले बताए ।

प्रमुख जिल्ला अधिकारी नवराज सापकोटाले संक्रमितको उपचार र शंकास्पदहरुको पीसीआर गरेर सबैलाई सुरक्षित राख्न पहल भइरहेको बताए । जिल्लामा आवश्यकता अनुसारको भीटीएम, एन्टिजेन किट, अक्सिजन सिलिन्डर लगायतका स्वास्थ्य सामग्रीको आपूर्ति गर्न प्रदेश र संघीय सरकारसँग समन्वय भइरहेको उनले बताए ।

प्रकाशित : वैशाख २१, २०७८ १३:४१
प्रतिक्रिया
पठाउनुहोस्

एम्बुलेन्स नपाएर संक्रमितको ज्यान गएको भन्दै नगरपालिकामा तालाबन्दी

नारायण शर्मा

पूर्वी नवलपरासी — कोरोना व्यवस्थापनमा ध्यान दिन नसकेको आरोप लगाउँदै देवचुली नगरपालिकाका मेयर र उपमेयरको कार्यकक्षमा स्थानीयले तालाबन्दी गरेका छन् । 

वडा नम्बर १३ मा सोमबार एक कोरोना संक्रमितको मृत्यु भएकोमा नगरपालिकाले व्यवस्थापकीय जिम्मेवारी पूरा नगरेको भन्दै स्थानीयले मेयर पूर्णकुमार श्रेष्ठ र उपमेयर पार्वता तिवारीको कार्यकक्षमा मंगलबार तालाबन्दी गरेका हुन् । ती संक्रमितको उपचार अभावमा मृत्यु भएको स्थानीयले बताएका छन् ।

स्थानीय अगुवा श्याम शर्मा भुसालले नगरपालिकाले कोरोना संक्रमितको उपचारमा सघाउने सुनिश्चितता नगरेसम्म ताला नखोलिने बताए ।

सोमबार दिउँसो साढे २ बजे देवचुली–१३ का ६८ वर्षीय पुरुषको कोरोनाका कारण मृत्यु भएको थियो । वैशाख २० गते काठमाडौंको स्टार अस्पतालमा जँचाउँदा कोरोना पोजिटिभ देखिएका उनी घरै आएर आइसोलेसनमा बसेका थिए ।

त्यही क्रममा उनलाई श्वास फेर्न गाह्रो भएको र अस्पताल लैजान एम्बुलेन्स नपाएपछि आफन्तले ट्याक्टरमा राखेर लैजाँदै गर्दा उनको मृत्यु भएको थियो । उनको घरबाट दुम्कौली नगर अस्पतालको दूरी ५ सय मिटर छ ।

देवचुली नगरपालिकामा सबै गरेर आठवटा एम्बुलेन्स छन् । नगर स्वास्थ्य शाखा प्रमुख रामकुमार श्रेष्ठले स्वास्थ्यकर्मीहरूले कोभिडको लडाइँमा कुनै कसर बाकी नछोडेको भन्दै कार्यपालिकाको निर्णय आाफूहरूले पालना गर्दै आएको बताए ।

मेयर श्रेष्ठले नगरपालिकाका सबै एम्बुलेन्स अन्यत्रका बिरामी बोक्न गएकाले ती संक्रमितले सुविधा नपाएको आफूले थाह पाएको सुनाए । आफूले वडाध्यक्ष र स्वास्थ्यकर्मीसमेतलाई एम्बुलेन्स खोज्न परिचालन गरे पनि नपाइएको उनको भनाइ छ ।


प्रकाशित : वैशाख २१, २०७८ १३:३९
पूरा पढ्नुहोस्
प्रतिक्रिया
पठाउनुहोस्
×