घर नबन्दै जग्गाधनी पुर्जा वितरण- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

घर नबन्दै जग्गाधनी पुर्जा वितरण

वीरेन्द्र केसी

अर्घाखाँची — प्रदेश सरकारको जनता आवास कार्यक्रमअन्तर्गत घर हस्तान्तरणपूर्व जग्गाधनी पुर्जा वितरण सुरु गरिएको छ । घर निर्माण सम्पन्न नभएकाले नगरपालिकाले जग्गाधनी पुर्जा बनाएर वितरण सुरु गरेको हो ।

प्रदेश सांसद चेतनारायण आचार्य, सन्धिखर्क नगरपालिका प्रमुख कमलप्रसाद भुसाल, उपप्रमुख ठाकुर विक, प्रमुख प्रशासकीय अधिकृत कृष्णप्रसाद सापकोटाले घरबारविहीन १३ जनालाई शनिबार पुर्जा वितरण गरेका हुन् ।

वर्षौंदेखि खोला किनारको जंगलमा छाप्रोमुनि बस्दै आएका मधु वादी पुर्जा पाएपछि दंग देखिए । चार वर्षअघि डढेलोले छाप्रो जलेपछि लामो समय उनी खुला चौरमा बसेका थिए । ‘वर्षामा भेल छाप्रोभित्र पस्दा भत्किएर सधैं दुःख पाउँथेँ,’ उनले भने, ‘अब छाप्रो जलेर खुला आकाशमुनि बस्नुपर्ने बाध्यता पनि टर्ने भो ।’ दिनभरि खोलामा गिट्टी र बालुवा चालेर परिवार पाल्दै आएका उनले प्रदेश सरकारको जनता आवास कार्यक्रम अन्तर्गत दुई कोठे घरको जग्गाधनी पुर्जा पाएका हुन् । सन्धिखर्क–२, भद्रीखोला किनारमा छाप्रोमा बस्दै आएका उनी पुर्जा पाएपछि खुसी थिए । अहिलेसम्म उनका नाममा एक टुक्रा जग्गा थिएन ।

खोला किनारको जंगलको छाप्रोबाट उनी पक्की घरमा केही समयपछि सर्दै छन् । मजदुरी र बालुवा चालेर गुजारा चलाएको उनले बताए । ‘मजदुरीको पैसाले बिहान बेलुका छाक टार्न मात्रै पुग्छ,’ उनले भने, ‘घडेरी किन्ने उपाय थिएन । खोला किनारमा बस्दा बर्खामा भेलले घर बगाइदिने, हिउँदमा डढेलोले घर जल्ने गर्दा साह्रै दुःख भएको थियो ।’ घर बनाइदिन थालेपछि बल्ल गरिबको सरकार आएजस्तो भएको उनले बताए । बाहिरबाट बाँसको चिमले बारेर स्याउलाको छानोमुनि वर्षौंदेखि बस्दै आएको उनले बताए । केहीले कच्ची गारो लगाएर काठ र टिनको ढोकासम्म राखेका छन् ।

‘६ वर्षअघि वनमा डढेलो लाग्दा हाम्रा झुप्रा पनि जलेर खरानी भएका थिए,’ लक्ष्मी वादीले भनिन्, ‘धेरै समय खुला ठाउँमा बस्यौं । बर्खामा छाप्रोभित्र भेल पसेर ओछ्यान र कपडा निथ्रुक्क भिज्ने, अन्नपाता बगाउने जस्ता समस्या छन् ।’ पुर्जा पाएपछि बल्ल जग्गाधनीको महसुस भएको उनले बताइन् । उनका सबै परिवारले मजदुरी गर्छन् । बाँगी खोलामा गिटी कुट्ने, बालुवा चाल्ने, केहीले घर निर्माणमा सघाउने, मालबाहक गाडीमा सामान लोड, अनलोड गर्ने जस्ता काम गर्दै आएका छन् ।

बन्दै गरेका घरमा नारायण वादी दिनमा एकपटक पुगेकै हुन्छन् । ‘घर पाउने भएपछि हामी औधि खुसी छौं,’ उनले भने । नगरपालिकाले १० लाख ९९ हजार ९ सय रुपैयाँमा भद्रीखोलामा २ रोपनी ४ आना १ दाममा १३ वटा घडेरी किनेर जग्गाधनी पुर्जा बनाएर हस्तान्तरण गरेको सन्धिखर्क नगरपालिका प्रमुख प्रशासकीय अधिकृत कृष्णप्रसाद सापकोटाले बताए । जनता आवास कार्यक्रममार्फत लुम्बिनी प्रदेश सरकारको ३ लाख ५० हजार रुपैयाँमा घर निर्माणको काम अन्तिम चरणमा छ । ‘घर बन्दै छन्, हामीले पुर्जा दिएका छौं,’ प्रमुख प्रशासकीय अधिकृत सापकोटाले भने, ‘अब आवास निर्माण सम्पन्न भएपछि हस्तान्तरण गर्नेछौं ।’

प्रकाशित : वैशाख ७, २०७८ ०९:५८
प्रतिक्रिया
पठाउनुहोस्

पुथाउत्तरगंगाका सबै वडा सचिवविहीन

वडादेखि गाउँपालिकाको कामकाज प्रभावित
कान्तिपुर संवाददाता

रुकुम पूर्व — १४ वडा रहेको पुथाउत्तरगंगा गाउँपालिकाका सबै वडा सचिवविहीन छन् । स्थानीय तह कार्यान्वयनमा आएदेखि नै यो गाउँपालिकाका सबै वडामा कहिल्यै निजामती कर्मचारी पूर्ति भएनन् । वडासचिवको जिम्मेवारी लामो समयदेखि सम्बन्धित वडाका स्वास्थ्यकर्मीले निर्वाह गरिरहेका छन् ।


२०७३ फागुनयता केही समय चार वडामा सचिव थिए । पछिल्लो एक वर्षदेखि सबै वडा सचिवविहीन बनेका हुन् । गाउँपालिकामा पनि कर्मचारी अभाव छ । वडासहित गाउँपालिकामा ६० जनाको दरबन्दी छ । तर हाल गाउँपालिकामा ६ जना मात्रै कर्मचारी छन् । ती पनि शाखाका कर्मचारी हुन् । एक जना कर्मचारी हाजिर भएको दुई दिन भयो । गाउँपालिकाको कृषि शाखामा एक, पशु सेवामा एक, शिक्षा शाखामा एक, कम्युटर सहायक चौथो एक, खानेपानी सब टेक्निसियन एक र लेखापाल एक जना छन् ।

गाउँपालिकाको प्रमुख प्रशासकीय अधिकृत पनि निमित्त छन् । झण्डै डेढ महिनायता यहाँको प्रमुख प्रशासकीय अधिकृतको जिम्मा प्राथमिक स्वास्थ्य केन्द्र कोलका प्रमुख वशिष्ठनारायण यादवलाई दिइएको छ । उनी जनस्वास्थ्य निरीक्षक छैटौं तहका हुन् । यादवले आर्थिक अख्तियारीसहितको कामकाज थालेका छन् । सुरुवातदेखि केही कर्मचारी करारमा नियुक्त गरेर कामकाज गराइएको छ ।

कर्मचारी नहुँदा वडादेखि गाउँपालिकासम्मको कामकाज प्रभावित भएको छ । एउटा वडाको सर्वसाधारण सचिव खोज्दै स्वास्थ्य चौकी भएको ठाउँसम्म पुग्नुपर्दा समस्या भइरहेको छ । पुथाउत्तरगंगा–२ का हर्कबहादुर बुढाले पञ्जीकरणको कामका लागि अर्को वडामा जानुपर्ने बाध्यता रहेको बताए । १ नम्बर वडामा रहेको स्वास्थ्य चौकी इन्चार्जले १, २, ३ र ४ नम्बर वडाको पञ्जीकरणको काम गर्ने जिम्मेवारी पाएका छन् । पुथाउत्तरगंगा–१२ का वडाध्यक्ष गंगाबहादुर पुन मगरले कर्मचारी अभावमा वडादेखि गाउँपालिकासम्म समस्या भइरहेको बताए । स्थानीय तह सञ्चालनमा आएदेखि नै वडा र गाउँपालिकाले कर्मचारीको समस्या भोग्दै आएको उनले बताए । साबिकको मैकोट, हुकाम, जाङ, तकसेरा, राङसी गाविस मिलाएर यो गाउँपालिका बनाइएको हो । साबिकका स्वास्थ्य चौकी पनि साबिकका गाविसमै छन् । यसैले पनि पञ्जीकरणको काम गर्न सर्वसाधारण अर्को वडामा जानुपर्ने बाध्यता छ । घरनजिकको सरकार भनिए पनि वडा कार्यालयबाट सेवा नपाई स्वास्थ्य चौकीसम्म जानुपर्ने बाध्यता रहेको पुथाउत्तरगंगा–९ का भीमबहादुर रोकाले दुखेसो गरे ।

गाउँपालिका अध्यक्ष ओमप्रकाश घर्ती मगरले पुथाउत्तरगंगा गाउँपालिकालाई सबैतिरबाट हेपिएजस्तो महसुस भइरहेको बताए । सुरुवातदेखि नै गाउँपालिकाले कर्मचारी नपाएको उनको भनाइ छ । ‘कर्मचारी आउँदै नआउने समस्या छ । आए पनि बस्दै नबस्ने भएपछि जनता र हामी आफैंले पनि दुःख पाइरहेका छौं,’ उनले भने, ‘हरेक बैठकबाट कर्मचारीको माग हुन्छ तर पूर्ति कहिल्यै भइरहेको छैन ।’ लोक सेवा आयोगदेखि प्रदेश र संघ सरकारसँग पटक–पटक कर्मचारीका लागि हारगुहार गर्दा पनि त्यो आवाज नसुनिएकामा उनले गुनासो गरे । कर्मचारी नआएपछि करारमा नियुक्त गरेरै भए पनि काम चलाउनु परेको उनले बताए ।

प्रकाशित : वैशाख ७, २०७८ ०९:५६
पूरा पढ्नुहोस्
प्रतिक्रिया
पठाउनुहोस्
×