२७.१२°C काठमाडौं
घरघरबाटै बिक्दै कृषि उपज
रुकुम पूर्व — रुकुम पूर्वका उत्पादित अन्न घरघरबाटै बिक्री हुन थालेको छ । यसअघि उत्पादित खाद्यान्न बिक्री नहुँदा निराश किसान यस वर्ष उत्सााहित बनेका हुन् । भूमे गाउँपालिकाका किसानले उत्पादन गरेका सिमी, कोदो, भटमास, टिमुर, भाङ, फापरलगायत घरघरबाटै सजिलै बिक्री भइरहेका छन् ।
भूमे–२ को खाबाङ बजार र ९ नम्बर वडाको चुनबाङमा स्थापना गरिएका संकलन केन्द्रले कृषि उपज जम्मा गर्छन् । मारिङ बहुद्देश्यीय सहकारी संस्थाले कृषि उपज संकलन गरेर बिक्री गर्न थालेको छ । गाउँपालिकासँगको सहकार्यमा सहकारीले कृषि उपज संकलन गर्ने र विभिन्न बजारमा बेच्न थालेको हो । सहकारीका प्रतिनिधि कृषि संकलनका लागि घरघर पुग्ने गरेका छन् । सहकारीका व्यवस्थापक सन्दीप अधिकारीले किसानले सट्टपट्टामा सामान दिने हुँदा चामल दिएर किसानको उत्पादन किनिएको अधिकारीले बताए ।
यसमा गाउँपालिकाले पनि किसानलाई थप अनुदान थपिदिएको सहकारीले जनाएको छ । विशेष गरी कोदो र फापर उत्पादन गरेका किसानले त्यसको मूल्यमा थप ५० प्रतिशत अनुदान पाएका छन् । त्यसका लागि लुम्बिनी प्रदेश सरकारले ५० लाख रुपैयाँ खर्च गर्दै छ । त्यसमा सहकारीले ५० लाख लगानी गर्दै छ ।
प्रकाशित : वैशाख ३, २०७८ १२:२२
