अस्पतालको कोरोना वार्ड भरिएपछि संक्रमित घरमै- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

अस्पतालको कोरोना वार्ड भरिएपछि संक्रमित घरमै

ठाकुरसिंह थारू

बाँके — भेरी अस्पताल नेपालगन्जको कोरोना वार्ड भरिएपछि संक्रमण पुष्टि भएका थप बिरामीलाई होम आइसोलेसनमा राखिएको छ । अस्पतालमा रहेका सबै बिरामीलाई अक्सिजन दिनुपर्ने भएकाले बेड खाली छैनन् ।

अस्पतालको ल्याबमा गरिएको पीसीआर परीक्षणमा बुधबार २ सय २३ जनामध्ये ७५ जनामा संक्रमण पुष्टि भएको थियो । उनीहरूलाई घरमा बस्न सुझाव दिइएको छ । अस्पतालका निमित्त प्रमुख डा.खगेन्द्र शाहले बेड भरिएकाले नयाँ बिरामी भर्ना गर्न नसकिएको बताए ।

अस्पतालका फिजिसियन डा. संकेतकुमार रिसालले भीडभाडमा अझ कोरोनाको संक्रमण फैलिने खतरा रहेको चेतावनी दिए । ‘बढी भीड हुने स्थानलाई व्यवस्थित राख्नुपर्छ । होइन भने अझै कोरोनाको महामारी फैलिने खतरा छ,’ उनले भने । जिल्ला स्वास्थ्य कार्यालय बाँकेका प्रमुख धीरजंग शाहले भेरी अस्पतालको बेड भरिएपछि नयाँ संक्रमण देखिएका व्यक्तिलाई होम आइसोलेसनमा बसाइएको बताए ।

‘भेरी अस्पतालबाहेक कोरोना वार्डहरू बन्द गरिएका छन् । त्यसैले अहिले समस्या देखिएको हो,’ उनले भने, ‘यसअघि कोरोना विशेष अस्पताल बनाइएको शिक्षण अस्पताल नेपालगन्जले पनि वार्ड राखेको छैन ।’ बाँकेमा कोरोनाको महामारी तीव्र रूपमा फैलिन थालेपछि जिल्ला कोभिड संकट व्यवस्थापन केन्द्रको आकस्मिक बैठकले नेपाल–भारत सीमामा कडाइ गर्नेलगायतका निर्णय गरेको छ ।

बिरामीका लागि शिक्षण अस्पताललाई पनि कोभिड वार्ड बनाउन र पालिकाले सञ्चालन गरी बन्द गरेका आइसोलेसन सेन्टर पुनः सञ्चालन गर्न अनुरोध गर्ने निर्णय गरिएको छ । बाँकेका प्रमुख जिल्ला अधिकारी शिवराम गेलालको अध्यक्षतामा बसेको बैठकले मास्क नलगाउने व्यक्तिलाई शुक्रबारदेखि कारबाही गर्ने निर्णय गरिएको छ । भीडभाड हुन नदिन, स्वास्थ्य मापदण्ड पूरा गराउन प्रहरीलाई जिम्मा दिइएको छ ।

भारतबाट घर फर्किनेहरूको सीमानाकामा स्वास्थ्य परीक्षण तथा एन्टिजेन परीक्षणका लागि थप कडाइ गर्ने निर्णय पनि केन्द्रले गरेको छ । सर्वसाधारणलाई मास्क अनिवार्य लगाउन अनुरोध गर्ने, स्वास्थ्य मापदण्ड पालना गराउने र मास्क नलगाई कारोबार गर्ने पसल व्यवसाय कम्तीमा एक साताका लागि बन्द गर्ने निर्णय समितिको छ ।

भेरी अस्पतालमा १ सय ४२ वटा कोरोना वार्ड बनाइएको छ । तर जनशक्ति अभावका कारण ६५ बेडमात्र सञ्चालनमा छन् । ती सबै वार्ड अहिले कोरोनाका बिरामीले भरिएका छन् ।

प्रकाशित : वैशाख ३, २०७८ १०:१२
प्रतिक्रिया
पठाउनुहोस्

खर्क गोठालालाई रेडियो

हरिराम उप्रेती

गोरखा — गाउँपालिकाले रेडियो दिँदै छ भन्ने खबर पाएपछि धार्चे–३ का साइँला गुरुङ बिहीबार गाउँपालिका केन्द्र पुगे । सूचना र सञ्चारमा पहुँच बढाउने उद्देश्यले बाँडिएको रेडियो पाउँदा गुरुङ निकै खुसी देखिए ।

खर्कमा बस्ने गोठालालाई रेडियो वितरण गरिँदै । तस्बिर सौजन्य : सन्तोष गुरुङ

कर्मचारीसमक्ष उनले पशु विकासका लागि आउने अनुदानबारे पनि सूचना प्रवाह भए आफूहरूलाई सहज हुने बताए । गाउँपालिकाले उनीजस्तै खर्कका गोठमा बस्ने २० गोठालालाई रेडियो उपलब्ध गराएको छ ।

सूचनासँग जोड्न यस वर्ष रेडियो वितरणको नयाँ कार्यक्रम सुरु गरिएको गाउँपालिका पशु सेवा शाखा प्रमुख ठाकुर ढकालले बताए । ‘खर्कमा घुम्ती गोठ हुन्छन्, पशु उपचारका लागि त्यहाँ पुग्दा भाषाको पनि समस्या छ,’ उनले भने, ‘रेडियो सुन्दासुन्दै भाषा पनि केही सिक्छन् भन्ने उद्देश्य हो ।’ गोठालालाई चाहिने सूचना रेडियोमार्फत् कसरी उपलब्ध गराउन सकिन्छ भनेर छलफल भइरहेको उनले बताए ।

खर्कमा दिनरात बिताउनेलाई मनोरञ्जन र सूचनाका लागि रेडियो वितरण प्रभावकारी बन्ने गाउँपालिकाको विश्वास छ । नेपाली र स्थानीय भाषा बोल्नेलाई लक्षित गरी सूचनासँग जोड्न सूचनामैत्री कार्यक्रमलाई प्राथमिकता दिइएको गाउँपालिका अध्यक्ष सन्तोष गुरुङ बताउँछन् । ‘यहाँका कतिपय वृद्धवृद्धा नेपाली भाषा राम्रोसँग बुझ्दैनन्, स्थानीय भाषा मात्र बुझ्छन्, बोल्छन्’ उनले भने, ‘उनिहरूलाई सूचना पुर्‍याउन स्थानीय भाषाको रेडियो कार्यक्रम गर्न लागेका छौं ।’ टेलिफोनसमेत नटिप्ने खर्कका गोठालाहरू सञ्चारको पहुँचसम्म पुग्न पाईरहेका छैनन् । ‘कम्तीमा रेडियो सुन्न पाए त देशविदेशमा के भइरहेको छ, थाहा पाउन सकिन्छ नि,’ उनले भने । गोठालालाई रेडियो वितरणका लागि गाउँपालिकाले चालु आर्थिक वर्षमा दुई लाख रुपैयाँ बजेट छुट्याएको थियो ।

कार्यक्रमको प्रभावकारिताका आधारमा आगामी वर्ष पनि रेडियो वितरण कार्यक्रमलाई निरन्तरता दिइने गाउँपालिकाले जनाएको छ । ‘गाउँपालिकाको सूचना प्रवाहका लागि स्थानीय भाषामा रेडियो कार्यक्रम पनि चलाउँछौं, बस्तीबाट टाढा भेडा चराउन जाने गोठालाले गाउँपालिकामा भइरहेको गतिविधि थाहा पाउन सक्छन्,’ अध्यक्ष गुरुङले भने । रेडियोसँगै गोठालालाई सोलार र त्रिपालसमेत उपलब्ध गराइएको छ ।

धार्चेका सबै वडामा अडियो बडापत्र पनि राखिएको छ । ‘हेल्लो गाउँले प्रमुख’ टोल फ्री नम्बर पनि गाउँपालिकाले सञ्चालन गर्दै आएको छ । ‘एक वडा एक कटुवाल’ भन्ने नारा तय गरेको गाउँपालिकाले कटुवाललाई प्रोत्साहनस्वरूप मासिक पारिश्रमिक पनि उपलब्ध गराउँदै आएको छ । स्थानीयलाई सूचना पुर्‍याउन संस्थागत गरिएको कटुवाल प्रथा प्रभावकारी रहेको अध्यक्ष गुरुङले बताए । ‘स्थानीयले टेलिफोनमार्फत् भनेका कुरामा भन्दा पनि कटुवाललाई बढी विश्वास गर्छन्,’ उनले भने ।

प्रकाशित : वैशाख ३, २०७८ १०:०७
पूरा पढ्नुहोस्
प्रतिक्रिया
पठाउनुहोस्
×