गुल्मीमा पौडी खेल्ने क्रममा दुई बालकको मृत्यु- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

गुल्मीमा पौडी खेल्ने क्रममा दुई बालकको मृत्यु

माधव अर्याल

पाल्पा — गुल्मीको मदाने गाउँपालिका–१, अग्लुङमा पनाहा खोलामा पौडी खेल्ने क्रममा डुबेर दुई बालकको मंगलबार मृत्यु भएको छ ।

अग्लुङका सन्जिव विकका छोरा ५ वर्षीय सुमन विक र मदाने–३, सिर्सेनीका विष्णु विकका छोरा ८ वर्षीय गोविन्द विकको नुहाउने क्रममा खोलामा डुबेर मृत्यु भएको जिल्ला प्रहरी कार्यालय गुल्मीका प्रहरी नायब उपरीक्षक पुरुषोत्तम पाण्डेयले जानकारी दिए ।

प्यूठानको गौमुखी गाउँपालिका–५, घर भएकी विष्णु विक माइती आएका बेला छोरा गोविन्दको मृत्यु भएको हो । उनी भारतबाट नयाँ वर्ष मनाउन सोमबार मात्र आएका बेला पनाहा खोलाको ढाडको रह भन्ने स्थानमा नुहाउने क्रममा डुबेको प्रहरीले जनाएको छ।

डुबेर बेहोस भएका दुवैको उपचारका लागि प्राथमिक स्वास्थ्य केन्द्र पुर्कोट दह लैजाने क्रममा निधन भएको हो । घटनाका सम्बन्धमा थप अनुसन्धान गर्न प्रहरी निरीक्षक महेश्वर उपाध्यायको टोली खटिएको छ ।

प्रकाशित : चैत्र ३१, २०७७ १६:०३
प्रतिक्रिया
पठाउनुहोस्

अन्तर्राष्ट्रिय क्रिकेट रंगशाला बनाउन व्यवसायीले दिए निर्माण सामग्री

माधव अर्याल

पाल्पा — धुर्मुस–सुन्तली फाउन्डेसनका अध्यक्ष सीताराम कट्टेल केही दिनअघि तिनाउ गाउँपालिका–३, दोभान सिद्धबाबा आए । उनी मन्दिर दर्शन गर्न आएका मात्र थिएनन् ।

उनी जनस्तरबाट संकलित रकमबाट चितवनमा निर्माण भइरहेको गौतमबुुद्ध अन्तर्राष्ट्रिय क्रिकेट रंगशाला निर्माणका लागि सहयोग जुटाउन हिँडेका थिए । मेची–महाकाली अभियानअन्तर्गत सिद्धबाबा आएका उनले मन्दिर व्यवस्थापन समितिका साथै तिनाउका टिपर व्यवसायीसँग सहयोगको अपिल गरे ।

‘तत्कालै एक लाख सहयोग जुट्यो,’ सिद्धबाबा मन्दिर व्यवस्थापन समितिका अध्यक्ष दलबहादुर गुरुङले भने, ‘त्योबाहेक समितिका सदस्यसमेत रहेका टिपर व्यवसायी साथीहरुले सहयोग गर्ने प्रतिबद्धता जनाए ।’ व्यवसायीले ५३ टिपर नदीजन्य सामाग्री लग्ने प्रतिबद्धता जनाएको उनले बताए । सोही दिन गरेको प्रतिवद्धता अनुसार नेपाली झण्डा र ब्यानर राखेर आइतबार तिनाउका टिपर व्यवसायीले सामग्री चितवन पुर्‍याए ।

रंगशाला निमार्ण सामाग्री सहयोग कार्यक्रमका संयोजक तथा तमन्ना मल्टिप्रपोजका कार्यकारी प्रमुख तोया लम्सालकाअनुसार प्रतिबद्धता गरेभन्दा बढी नै निर्माण सामग्री बोकेका टिपर चितवन गएका हुन् । सबैतिरबाट बुटवल गोलपार्कमा भेला भएका उनीहरुले बालुवा तथा गिट्टी लिएर गएका थिए । झुम्साका व्यवसायी कृष्ण प्रसाद पाण्डेयका अनुसार १५ लाख बराबरको सहयोग सामग्री रंगशाला निर्माणका लागि लगिएको छ । त्यसमा टिपरको भाडा हिसाब गरिएको छैन ।

पछिल्लो समय खेल मैदान निर्माणमा आर्थिक अभाव भएको भन्दै फाउण्डेशनले सार्वजनिक अपिल गरेको थियो । रंगशाला सम्पन्न गर्न दुई अर्ब ५० करोड रुपैयाँ खर्च हुने अनुमान गरिएको छ । चितवनको भरतपुर महानगरपालिकास्थित कृषि तथा वन विश्वविद्यालय परिसर शान्ति चोकमा २० बिघा ६ कठ्ठा क्षेत्रफलमा रंगशाला निर्माण भइरहेको छ ।

प्रकाशित : चैत्र ३०, २०७७ १३:२८
पूरा पढ्नुहोस्
प्रतिक्रिया
पठाउनुहोस्
×