बुटवलमा अर्थमन्त्री पौडेललाई कालो झण्डा

लुम्बिनी प्रदेशको राजधानी मन्त्री पदसँग साटेको भन्दै उनीहरुले बुटवलको पुरानो बसपार्क (नेपालगञ्जरोड)मा नेकपाका महासतिवसमेत रहेका अर्थमन्त्री पौडेललाई कालो झण्डा देखाएका हुन् ।

पौडेलविरुद्ध तरुण दल र नेविसंघका कार्यकर्ताले नाराबाजीसमेत गरेका थिए । विरोध प्रदर्शनपछि नेपाली कांग्रेस बुटवल उपमहानगरका सभापति खेलराज पाण्डेले विकास निर्माणका काममा कांग्रेसको समर्थन भए पनि राजधानी सारेकामा कांग्रेसले विरोध गरेको जनाए ।

यसअघि राजधानी तोक्ने क्रममा पनि कांग्रेस कार्यकर्ताले विरोध गरेका थिए । मंगलबार रुपन्देही आएका पौडेल रुपन्देहीमा २ दिन विभिन्न कार्यक्रममा सहभागी हुँदैछन् ।

आफूलाई कालो झण्डा देखाएकोबारे प्रतिक्रिया दिँदै पौडेलले भने, 'बुटवलमा केही विकास निर्माणका कार्यक्रम उद्घाटन गर्न आएको हुँ । त्यसक्रममा केही व्यक्तिले मलाई कालो झण्डा देखाउनुभयो । यसलाई मैले विकास र समृद्धिको विरोधी झण्डाको रुपमा लिएको छु ।'