पाल्पामा एक कोरोना संक्रमितको मृत्यु- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

पाल्पामा एक कोरोना संक्रमितको मृत्यु

माधव अर्याल

पाल्पा — पाल्पामा कोरोना संक्रमणबाट थप एक जनाको मृत्यु भएको छ । रामपुर नगरपालिका–५, रामपुरकी ५४ वर्षीय महिलाको उपचारका क्रममा शुक्रबार लुम्बिनी मेडिकल कलेज प्रभासमा मृत्यु भएको हो । कात्तिक २० गते उनलाई कोरोना पोजिटिभ पुष्टि भएको थियो ।

रामपुरमै होम आइसोलेसनमा बसेकी महिलालाई बिहीबार स्वास्थ्यमा थप समस्या देखिएपछि लुम्बिनी मेडिकल कलेज प्रभासमा उपचारका लागि ल्याइएको थियो । मधुमेह र उच्च रक्तचापको बिरामी रहेको स्वास्थ्य कार्यालय पाल्पाका सूचना अधिकारी ओमप्रकाश पन्थीले जानकारी दिए । योसँगै कोरोना संक्रमणबाट पाल्पामा मृत्यु हुनेको संख्या १९ पुगेको छ ।

प्रकाशित : मंसिर ५, २०७७ १४:२१
प्रतिक्रिया
पठाउनुहोस्

पोखरामा थप सात संक्रमितको मृत्यु

दीपक परियार

पोखरा — पोखरामा थप सात जना कोरोना संक्रमितको मृत्यु भएको छ । बिहीबार राति र शुक्रबार बिहान गरी सात जनाको मृत्यु भएको गण्डकी प्रदेश स्वास्थ्य निर्देशनालयले जनाएको छ ।

पोखरा महानगरपालिका–२७ का ७१ वर्षीय संक्रमितको बिहीबार राति गण्डकी मेडिकल कलेजमा उपचारका क्रममा मृत्यु भयो । अस्पतालका अनुसार कात्तिक २९ मा कोरोना पुष्टि भएका उनलाई बाइल्याटरन निमोनिया, उच्च रक्तचापको समस्या थियो ।

गण्डकी मेडिकल कलेजमै पोखरा–८ का ५४ वर्षीय पुरुषले शुक्रबार उपचारका क्रममा ज्यान गुमाए । कात्तिक २३ मा कोरोना पुष्टि भएका उनी बाइल्याटरल निमोनिया, मृगौला रोग, उच्च रक्तचापबाट समेत पीडित रहेको जनाइएको छ । मेडिकल कलेजमा उपचारकै क्रममा शुक्रबार बिहान अर्का कोरोना संक्रमित पुरुषको ज्यान गयो । तनहुँको म्याग्दे गाउँपालिका–४ का ५१ वर्षीय पुरुषको मृत्यु भएको हो । उनलाई कात्तिक ३ म कोरोना पुष्टि भएको थियो ।

पोखरा–९ का ६८ वर्षीय संक्रमितको पोखरा स्वास्थ्य विज्ञान प्रतिष्ठानमा उपचारका क्रममा बिहीबार राति ११ बजे मृत्यु भयो । बिहीबार नै कोरोना पुष्टि भएका उनलाई बाइल्याटरल निमोनिया र मधुमेहसमेत थियो । प्रतिष्ठानमै उपचारका क्रममा पोखरा–२१ का ७५ वर्षीय संक्रमितले बिहीबार राति ज्यान गुमाए । बिहीबार नै कोरोना पुष्टि भएका उनलाई पनि निमोनियाले च्यापेको थियो ।

शुक्रबार प्रतिष्ठानमा उपचारका क्रममा पोखरा–१७ का २९ वर्षीय कोरोना संक्रमित पुरुषको निधन भयो । शुक्रबार नै कोरोना परीक्षण पोजिटिभ आएका उनलाई निमोनिया र हातखुट्टा गल्ने समस्या देखिएको अस्पतालले जनाएको छ । पोखरा–१३ का ५५ वर्षीय कोरोना संक्रमित पुरुषको प्रतिष्ठानमै उपचारका क्रममा शुक्रबार निधन भयो । उनलाई निमोनिया, मृगौला रोग र मधुमेहको समस्या थियो ।

यससँगै गण्डकीमा कोरोना संक्रमणबाट मृत्यु हुनेको संख्या १ सय ३८ पुगेको प्रदेश स्वास्थ्य निर्देशक एवं गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोदविन्दु शर्माले बताए ।

प्रकाशित : मंसिर ५, २०७७ १४:१७
पूरा पढ्नुहोस्
प्रतिक्रिया
पठाउनुहोस्
×