पाल्पाको दसैंघरमा फूलपाती भित्र्याइयो- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

पाल्पाको दसैंघरमा फूलपाती भित्र्याइयो

माधव अर्याल

पाल्पा — दसैंको सातौं दिन शुक्रबार पाल्पाको तानसेनस्थित ऐतिहासिक दसैंघरमा फूलपाती भित्र्याइएको छ । तत्कालीन जनरल कर्णेल उजिरसिंह थापाले दुई सय वर्षअघि स्थापना गरेको दसैंघरमा फूलपाती भित्र्याइएको हो । 

जिल्ला प्रशासन कार्यालय परिसर सिल्खान टोलस्थित दसैंघरमा भगवती सलामीसहित घटस्थापनादेखि पूजाआजा गर्ने परम्परा छ । सिलेखाना परिसरमा रहेको कोतघरमा पनि दैनिक सैनिक सलामीसहित पूजाआजा गरिन्छ । यहाँ पनि पनि फूलपाती भित्र्याइएको छ ।

प्रमुख जिल्ला अधिकारी, सैनिक, प्रहरी र मन्दिरका पुजारी दरबार परिसरमा रहेको दसैंघरबाट बाजागाजासहित फूलपाती लिन टुँडिखेलस्थित नागपोखरीमा जाने चलन छ ।

स्थानीयका अनुसार यहाँ पनि टुंडिखेलमा जस्तै बढाइँ गर्ने र सलामी दिने चलन थियो । तानसेनमा गोरखाबाटसमेत फूलपाती ल्याउने शाहवशीय परम्परा थियो । पछिल्लो केही वर्षयता भने परम्परा धान्नका लागि मात्रै दसैंघरमा पूजा गर्ने गरिएको छ । सैनिक, प्रहरी र प्रशासनले मात्रै यो परम्परा धानिरहेका छन् ।

दरबारबाट बाजा बजाउँदै असनटोल, नारायणटोल हुँदै नागपोखरीमा फूलपाती लिन जाने परम्परा भए पनि यस वर्ष कोरोनाका कारण भिडभाड गरिएन । बाजा पनि बजाइएन । तानसेन, वसन्तपुर र विभिन्न स्थानबाट संकलन गरेर ल्याइएको १० किसिमको फूलपाती पूजाआजासहित पुनः बजार परिक्रमा गरी दसैंघरमा भित्र्याउने चलन छ । जिल्लाका मुझुङ, छहरा, भुवनपोखरी, बौघागुम्हा, मस्याम, वीरकोट, जब्गादी, सिलुवा, रामपुरलगायत स्थानमा रहेका कोतघरका साथै स्थानीयका घरमा पनि फूलपाती भित्र्याइएको छ ।

प्रकाशित : कार्तिक ७, २०७७ ११:२१
प्रतिक्रिया
पठाउनुहोस्

गोरखाबाट हनुमानढोका दरबारका लागि पठाइयो फूलपाती

हरिराम उप्रेती

गोरखा — झन्डै चार सय वर्षदेखिको परम्परालाई निरन्तरता दिँदै गोरखा दरबारको दसैंघरबाट काठमाडौंस्थित हनुमानढोकामा फूलपाती पठाइएको छ ।

शुक्रबार बिहान गोरखा दरबारका कर्मचारी चूडामणि तिवारीले बा२झ ३३२१ नम्बरको गाडीमार्फत फूलपाती हनुमानढोका लगेका हुन् ।

हनुमानढोका पठाउन तथा गोरखा दरबारको दसैंघरमा भित्र्याउन शुक्रबार बिहानै गोरखा दरबारका सुसारेहरूले अमराई, ठूलो वनलगायत जंगलबाट ९ प्रकारका फूलपाती संकलन गरेका थिए । ‘परपम्परालाई निरन्तरता दिँदै फूलपाती काठमाडौंस्थित हनुमानढोका पठायौँ,’ गोरखा दरबारका पुजारी शारदाप्रसाद भट्टराईले भने, ‘यस वर्ष कोभिड त्रासका कारण धूमधामका साथ कार्यक्रम भएन, विधि पूरा गरी परम्परालाई निरन्तरता दिएका हौँ ।’

तत्कालीन राजा पृथ्वीनारायण शाहले काडमाडौं उपत्यका विजय गरेर हनुमानढोकाबाट राजकाज सुरु गरेसँगै गोरखा दरबारको फूलपाती हनुमानढोका भित्र्याउने प्रचलन सुरु भएको हो । विगतमा तामझामपूर्वक फूलपाती काठमाडौं पठाइने गरे पनि यस वर्ष कोरोना महामारीका कारण सामान्य तबरले पठाइएको हो ।


सडक सञ्जाल नखुल्दासम्म गोरखाबाट धादिङको केवलपुर–जीवनपुरको पैदलमार्ग हुँदै लैजाने प्रचलन थियो । पहिले एकीकरण पदमार्गबाट काठमाडौं पुर्‍याइने फूलपाती सडक सञ्जाल विस्तार भएसँगै गाडीमार्फत पठाउने गरिएको गोरखा दरबार हेरचाह अड्डाका प्रमुख हरि भुसालले बताए । ‘पृथ्वीनारायण शाहले राजधानी काठमाडौं सारे पनि गोरखा राज्यसँग भावनात्मक सम्बन्ध स्थापित गर्न फूलपाती लैजाने प्रचलन सुरु भएको हो, भावी पुस्तालाई समेत गोरखासँगको सम्बन्ध नटुटोस् भनेर सुरु गरिएको परम्पराले आजसम्म निरन्तरता पाएको छ,’ उनले भने, ‘गाडी नचल्दासम्म एकीकरण मार्गमार्फत पैदल नै फूलपाती पठाइन्थ्यो, गाडी चलेपछि गाडीबाटै पठाउने गरेका छौँ ।’

प्रकाशित : कार्तिक ७, २०७७ ११:०४
पूरा पढ्नुहोस्
प्रतिक्रिया
पठाउनुहोस्
×