रुकुम पूर्वलाई अर्गानिक जिल्ला घोषणा- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

रुकुम पूर्वलाई अर्गानिक जिल्ला घोषणा

हरि गौतम

रुकुम पूर्व — लुम्बिनी प्रदेशको एक मात्रै हिमाली जिल्ला रुकुम पूर्वलाई अर्गानिक जिल्ला घोषणा गरिएको छ ।

लुम्बिनी प्रदेशले प्रदेशका १२ जिल्ला मध्ये रुकुम पूर्वलाई अर्गानिक घोषणा गरेको हो । प्रदेश सरकारको प्रतिनिधिको रुपमा रहेको एकीकृत कृषि तथा पशुपन्छी विकास कार्यालयको पहलमा अर्गानिक जिल्ला घोषणा गरिएको हो ।

प्रदेशकी भूमि, व्यवस्था, कृषि तथा सहकारी मन्त्री आरती पौडेलले लुम्बिनी प्रदेशको एक मात्र हिमाली जिल्ला अब अर्गानिक जिल्लामा दर्ज भएको बताइन् । अर्गानिक जिल्ला घोषणाका लागि मन्त्री पौडेल जिल्ला पुगेकी थिइन् ।

अरु जिल्लाको भन्दा धेरै क्षेत्र र बस्तीहरु अर्गानिक नै रहेकाले यसैलाई अर्गानिक जिल्ला घोषणा गरिएको प्रदेश सरकारले जनाएको छ । चालू आर्थिक वर्षमा प्रदेश सरकारको नीति तथा कार्यक्रममा रुकुम पूर्वलाई अर्गानिक कृषि उत्पादन जिल्ला बनाउने उल्लेख गरेको थियो ।

अर्गानिक जिल्ला कार्यान्वयनका लागि प्रदेश सरकारले ५ करोड बजेट विनियोजन गरेको छ । विभिन्‍न शीर्षकमा विनियोजित उक्त बजेटबाट जिल्लालाई पूर्ण अर्गानिक गराउन विभिन्न कार्यक्रम सञ्चालनको तयारी भइरहेको छ ।

जिल्लाका तीन वटै सिस्ने, भूमे र पुथाउत्तरगंगा गाउँपालिकामा भेडा(बाख्रा मिसन कार्यक्रम, मासु उत्पादनका लागि बाख्रा पालन कार्यक्रम, प्रांगारिक मलमा अनुदान, तरकारी प्रवर्द्धन कार्यक्रम, माटो सुधार कार्यक्रम, स्मार्ट कृषि गाउँ कार्यक्रम, सुन्तला, स्याउ, ओखर, आलु, लसुन, टिम्मुर, मह उत्पादन कार्यक्रम सञ्चालन गरिनेछ ।

प्रकाशित : कार्तिक १, २०७७ १६:४७
प्रतिक्रिया
पठाउनुहोस्

श्रम बैंकले श्रमिकहरुको तथ्यांक राखिरहेको छ : श्रममन्त्री

कान्तिपुर संवाददाता

काठमाडौँ — श्रम, रोजगार तथा सामाजिक सुरक्षा मन्त्री रामेश्वर राय यादवले विदेशबाट फर्केका श्रमिकको हैसियत पहिचान गर्नको लागि श्रम सूचना बैंकले तथ्याङ राख्‍न थालेको बताएका छन् ।

‘को श्रमिकसँग के सीप छ भनेर पहिचान गर्न हामीले श्रम सूचना बैंकमा तथ्याङ राख्‍न थालेको हो । यसले रोजगारदातालाई आवश्यक श्रमिक सहजै उपलब्ध गराउँछ,’ गैरआवासीय नेपाली संघको मध्य पूर्व सम्मेलनलाई शनिबार सम्बोधन गर्दै उनले भने,‘यसमा औपचारिक र अनौपचारिक क्षेत्रमा कार्यरत श्रमिकको पूरा विवरण हुनेछ ।’

उनले श्रमिक बैंकमा आबद्ध हुने श्रमिकलाई योगदानमा आधारित सामाजिक सुरक्षामा जोड्ने तयारी भइरहेको बताए । ‘योसँग सम्बन्धित कार्यविधि र कानून बनाउने काम भइरहेको छ । यो कार्यान्वयनमा आएपछि यसमा श्रमिकको पूर्ण रुपमा हैसियत पहिचान गर्छ । यसमा सीप, रेमिट्यान्समा योगदानको सबै विवरण हुन्छ ।’

उनले सीपयुक्त जनशक्तिलाई स्वदेशकै राष्ट्रिय आयोजनाहरुमा प्रयोग गरिने वताए । सम्मेलनमा खाडीस्थित नेपाली दूतावासहरुले स्वदेश फर्केका श्रमिकलाई राष्ट्र निर्माणमा जोड्नुपर्ने बताए ।

प्रकाशित : कार्तिक १, २०७७ १६:३७
पूरा पढ्नुहोस्
प्रतिक्रिया
पठाउनुहोस्
×