सिद्धार्थ राजमार्ग पहिरोले तीन दिनदेखि ठप्प [तस्बिरहरू]- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

सिद्धार्थ राजमार्ग पहिरोले तीन दिनदेखि ठप्प [तस्बिरहरू]

माधव अर्याल

पाल्पा — अविरल वर्षासँगै खसेको पहिरो पन्छाउन नसकिँदा शुक्रबार रातिदेखि अवरुद्ध सिद्धार्थ राजमार्ग आइतबार पनि खुल्न सकेको छैन । पाल्पा–बुटवल सडकखण्डअन्तर्गत तिनाउ गाउँपालिकाका दर्जन बढी स्थानमा पहिरो खसेपछि शुक्रबार बेलुकीदेखि सडक अवरुद्ध भएको हो ।


राजमार्गका चिडियाखोला, कदमबास, सिद्धबाबा, हेडबक्स, पैठेडाँडा, भूतखोला, सिसुवा, झुम्सा, अर्घाछाप, पानीमिललगायतका स्थानमा ठूला–ठूला पहिरो खसेको दोभान प्रहरी चौकीका प्रहरी नायब निरीक्षक सोमबहादुर सारुमगरले जानकारी दिए ।

झुम्सादेखि बुटवलसम्मको क्षेत्रको पहिरो शनिबार बेलुकी अबेरसम्म हटाइए पनि सिसुवा, पानीमिललगायत स्थानको पहिरो पन्छाउन नसकिएको सडक डिभिजनले जनाएको छ ।

ठूलठूला ढुंगासँगै खसेको पहिरो पन्छाउन सडक डिभिजनसँगको समन्वयमा दुई तर्फबाट डोजर परिचालन गरिएको छ । दोभान प्रहरी चौकीका अनुसार आइतबार अपराह्न ३ बजेसम्म पहिरो पन्छाएर यातायात खोल्ने तयारी छ ।

पहिरोले पहाडी क्षेत्रमा आउने सवारीसाधन बुटवलतर्फ नै रोकिएका छन् भने पहाडबाट तराई झरेका सवारीसाधनलाई केराबारी, चर्चरे, जोरधारामा रोकिएको प्रहरीले जनाएको छ ।

प्रहरी उपरीक्षक सन्तोष कुमार भट्टराईका अनुसार तीन दिनदेखि राजमार्ग अवरुद्ध हुँदा धेरै यात्रु अलपत्र छन् । ‘डोजर, एक्स्काभेटर, ब्रेकर प्रयोग गरिए पनि धेरै पहिरो र ढुंगा भएकाले समस्या भएको हो,’ उनले भने, ‘दुवैतर्फबाट हेभी मेसिन लगाएर खुलाउने प्रयास जारी छ ।’

शुक्रबार बेलुकीदेखि ठूलो वर्षा भएकाले शनिबार बिहानदेखि पहिरो पन्छाउन थालिएको थियो ।

प्रकाशित : आश्विन ११, २०७७ १०:३१
प्रतिक्रिया
पठाउनुहोस्

स्कुल जान जोरबिजोर !

कक्षाकोठामा पस्दा साबुनपानीले हात धुन वा सेनिटाइजर लगाउन अनिवार्य छ । बेन्चमा दुई जना मात्रै बस्न पाइन्छ । विद्यार्थीको उपस्थितिमा पनि जोरबिजोर प्रणाली लागू गरिएको छ । जसअनुसार रोल नम्बरका आधारमा विद्यार्थी आलोपालो गर्दै विद्यालय आउँछन् ।
आश गुरुङ

लमजुङ — चैत पहिलो साता हतारमै वार्षिक परीक्षा सकाएपछि आइतमान गुरुङ विद्यालय जान पाएका थिएनन् । क्व्होलासोंथर गाउँपालिका–४ भुजुङस्थित त्रिभुवन माविमा कक्षा ९ मा पढ्ने उनलाई ६ महिनापछि विद्यालय पुग्दा नौलो लाग्यो । यस्तो लाग्नेमा उनी एक्लो विद्यार्थी थिएनन् । कारण विद्यालय प्रवेश गर्दा र पढ्दा अपनाइने व्यवहार यसअघिका भन्दा फरक थिए ।

अहिले कक्षाकोठामा पस्दा अनिवार्य साबुनपानीले हात धुनुपर्छ । नभए सेनिटाइजर लगाउनुपर्छ । बेन्चमा पहिले चार जना बस्थे, अहिले दुई जना मात्रै बस्न पाइन्छ । विद्यार्थीको उपस्थितिमा पनि जोरबिजोर प्रणाली लागू गरिएको छ । जसअनुसार रोल नम्बरका आधारमा विद्यार्थी आलोपालो गर्दै विद्यालय आउँछन् ।

क्व्होलासोंथर–६ पसगाउँस्थित पसगाउँ ठाँटी माविमा कक्षा १० मा पढ्ने मानिका घर्तीलाई पनि पठनपाठनको शैली नौलो लागेको छ तर ढिलै भए पनि विद्यालय खुलेकोमा खुसी छिन् । ‘मास्क लगाएर पढिरहेका छौं । सर पनि मास्क लगाएरै पढाउनुहुन्छ,’ उनले भनिन्, ‘पढाइ धेरै छुट्यो । ढिलै भए पनि पढाइ सुरु भयो, खुसी छु ।’

त्रिभुवन विद्याश्रम माविका प्रधानाध्यापक दुर्गाबहादुर गुरुङले विद्यार्थी आलोपालो आइरहेको बताए । सेनिटाइजर र मास्क गाउँपालिकाले उपलब्ध गराएको छ । पसगाउँ ठाँटी माविका प्रअ रतनसिंह गुरुङले स्वास्थ्य सुरक्षा सतर्कता अपनाएर पठनपाठन थालिएको बताए । टोल–टोलमा पढाउँदा प्रभावकारी नभएपछि विद्यार्थीलाई विद्यालयमै बोलाइएको उनको भनाइ छ । सुरक्षित तबरले कक्षा सञ्चालन गरिएकाले सबै विद्यार्थी पढ्न आएका उनले दाबी गरे ।

गाउँपालिकाका शिक्षा शाखा प्रमुख दीपक पौडेलले विद्यार्थीको सिट प्लान, मास्क र सेनिटाइजर अनिवार्य प्रयोग, साबुनपानीले हात धुनेलगायत १४ बुँदे आचारसंहिता जारी गरेर पठनपाठन थालिएको बताए ।

प्रकाशित : आश्विन ११, २०७७ १०:०९
पूरा पढ्नुहोस्
प्रतिक्रिया
पठाउनुहोस्
×