तालाबन्दीले लुम्बिनी सांस्कृतिक नगरपालिकामा काम ठप्प- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

तालाबन्दीले लुम्बिनी सांस्कृतिक नगरपालिकामा काम ठप्प

सन्जु पौडेल

तिलोत्तमा — दलहरूले तालाबन्दी गर्दा रुपन्देहीको लुम्बिनी सांस्कृतिक नगरपालिकाको कार्यालयमा ६ दिनदेखि काम ठप्प छ । जनता समाजवादी पार्टी, नेपाल कम्युनिस्ट पार्टी, राष्ट्रिय प्रजातन्त्र पार्टी, जनमत पार्टी र मार्क्सवादी पार्टीले संयुक्त रूपमा तालाबन्दी गरेका हुन् ।

नगरपालिकाले आफूहरूले उठाएका दुईवटा माग पूरा नगरेकाले ताला लगाइएको जनता समाजवादी पार्टी प्रदेश समिति सदस्य इनामुल्लाह फकिरले बताए । उनीहरूले भदौ २९ गते नगरपालिकामा आफ्ना मागसहित ज्ञापनपत्र बुझाएका थिए । पत्रमा नगरभित्रका सामुदायिक विद्यालय व्यवस्थापन समितिको अध्यक्ष अभिभावक भेलाबाट नभई वडाध्यक्षलाई चुनिने निर्णय खारेज गर्न र छाडाचौपाया नियन्त्रण तथा तस्करी रोक्न नगरपालिकाले भूमिका खेल्नुपर्ने माग गरिएको फकिरको भनाइ छ ।

तालाबन्दीका कारण नगरपालिकामा कुनै काम हुन नसकेको उपप्रमुख जानकीदेवी श्रीवास्तवले बताइन् । ‘राजनीतिक दलले उठाएका विषयमा बैठक भइरहे पनि निष्कर्ष निस्कन सकेको छैन,’ उनले भनिन्, ‘कार्यालय नखुल्दा सेवाग्राही मर्कामा छन्, नगरपालिकामा गर्नुपर्ने काम रोकिएको छ ।’


प्रकाशित : आश्विन ११, २०७७ ०९:४१
प्रतिक्रिया
पठाउनुहोस्

बिचौलिया रोक्न किसानलाई अटोरिक्सा

अमृता अनमोल

बुटवल — कृषि–उपज बजारसम्म पुर्‍याउन र बिक्रीवितरण सहज बनाउन प्रदेश ५ सरकारले व्यावसायिक किसानका लागि अटोरिक्सा सहयोग कार्यक्रम सञ्चालनमा ल्याएको छ । कार्यक्रमअन्तर्गत किसान समूह र सहकारीलाई लक्षित गरी अटोरिक्सा उपलब्ध गराइनेछ । 

भूमि व्यवस्था कृषि तथा सहकारीमन्त्री आरती पौडेलले बिचौलिया रोकिने, किसानले उचित मूल्य र उपभोक्ताले पनि सुपथ मूल्यमा कृषि उपज पाउने भएकाले यस्तो कार्यक्रम ल्याइएको बताइन् । कार्यक्रमका लागि यस वर्ष ६० लाख रुपैयाँ बजेट छुट्ट्याइएको छ जसमा एक किसान समूह वा सहकारीलाई अटोरिक्सा किन्न ५ लाख रकम उपलब्ध गराइनेछ ।

कृषि विकास निर्देशनालय प्रमुख यामनारायण देवकोटाले अटोरिक्सा दिन तराईका जिल्लामा किसान छनोट प्रक्रिया थालिएको बताए । कोरोना त्रास र लकडाउनको समयमा साना किसानले अटोरिक्सामा कृषि–उपज घरघरमा लगेर बेचेका थिए । त्यसबाट किसान प्रभावित भएकाले कार्यक्रम ल्याइएको देवकोटाको भनाइ छ । यसअघि लकडाउनका बेला किसानको खेतबारीमा पुगेर तरकारी ल्याउने र बेच्ने काममा प्रदेश सरकारले १२ वटै जिल्लामा पुग्ने गरी कृषि एम्बुलेन्स नाम दिएर ४४ वटा पिकअप भ्यान चलाएको थियो ।


प्रकाशित : आश्विन ११, २०७७ ०९:१०
पूरा पढ्नुहोस्
प्रतिक्रिया
पठाउनुहोस्
×