पासोमा मृत बाघ फेला- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

पासोमा मृत बाघ फेला

कान्तिपुर संवाददाता

बर्दिया — बर्दिया राष्ट्रिय निकुञ्ज मुख्यालय ठाकुरद्वारानजिक पासोमा पारेर दुर्लभ पाटेबाघ मारेको पाइएको छ । निकुञ्जभित्रको ठाकुरबाबा–७ पकुवा गाउँमा चोरी सिकारीले बाघलाई पासो थापेर मारेका हुन् । कुहिएको अवस्थामा उक्त बाघ लम्कोइली फाँटामा फेला परेको हो ।

मारिएको पोथी बाघ करिब ५ वर्षको भएको अनुमान गरिएको छ । चोरी सिकारीले बँदेल, चित्तल मार्ने उद्देश्यले पासो थापेको हुन सक्ने र त्यसैमा परेर बाघ मरेको निकुञ्जका प्रमुख संरक्षण अधिकृत विष्णु श्रेष्ठले बताए । महिनौं दिनसम्म पासोमा परेको बाघबारे थाहा नपाउनु सुरक्षा गस्ती फितलो भएको स्थानीय संरक्षणकर्मीले गुनासो गरेका छन् ।

प्रकाशित : आश्विन ९, २०७७ १९:१४
प्रतिक्रिया
पठाउनुहोस्

अर्घाखाँचीकाे शीतगंगा पहिरोमा सबै परिवार सुरक्षित

वीरेन्द्र केसी

अर्घाखाँची — शीतगंगा नगरपालिका–१२ स्थित कोठिया मैदानको जोख्ले गैरा गाउँका पहिरोले बगाएका १७ घरका सबै परिवार सकुशल रहेका छन् । पहिरो क्षेत्रमा खोजी गर्दा १७ घरका ९९ जना सम्पर्कमा आएपछि मानवीय क्षति नभएको प्रहरी नायब उपरीक्षक माधव बुढाथोकीले बताए ।

पहिरो जाँदाजाँदै हो–हल्ला गरेर सबै दौडिएर जोगिन सफल भएका छन् । ‘पहिरो जाँदा भागेर तितरवितर भएका कारण सबै सम्पर्कमा थिएनन्, हामीले खोजी गर्दा सबै सुरक्षित रहेछन्’, उनले भने ।

१७ घर–गोठ क्षति भएर नष्ट भएका छन् । केही घर पुरिएका र केही ढलेका छन् । गोठमा पालिएका सबै चौपाया मरेको उनले बताए । दिउँसो तीन बजेतिर पहिरो जाँदा घाम लागेपनि अहिले अबिरल पानी परिरहेकाले चौपाया र घरमा रहेका अन्नपात, नगद लगायतका सामाग्रीको खोजी गर्न समस्या रहेको पहिरोस्थलबाट प्रहरी निरीक्षक बाबुराम बस्नेतले बताए ।

गाईभैंसी, बाख्रा, खसीबोका, कुखुरा लगायत घरपालुवा जनावर मरेका छन् । पहिरो आसपास क्षेत्रमा बसोबास गर्ने १८ घर अति उच्च जोखिममा रहेकाले १८ घरपरिवारलाई सुरक्षित स्थानमा सारिएको उनले बताए । पानी परिरहेकाले पहिरो बग्ने क्रम जारी रहेको बस्नेतले बताए ।

पहिरो स्थलमा अहिले सुरक्षाकर्मी, जनप्रतिनिधि, दलका नेता र स्थानीय गएका छन् । पहिरोबाट विस्थापित भएका घरपरिवारलाई शीतगंगा नगरपालिका भित्रका स्कुल, सार्वजनिक भवन र व्यक्तिगत घरमा राख्नेबारे छलफल भइरहेको एवं उनीहरुलाई खाने–बस्ने व्यवस्था नगरपालिकाले मिलाउने नगर प्रमुख सूर्यप्रसाद अधिकारीले बताए । तीन दिनदेखि लगातार परिरहेको अविरल वर्षाका कारण पहिरो गएको उनले बताए ।

प्रकाशित : आश्विन ९, २०७७ १८:४४
पूरा पढ्नुहोस्
प्रतिक्रिया
पठाउनुहोस्
×